اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە «قازاقستاننىڭ تاۋەلسىزدىگى جانە رۋحاني-مادەني قۇندىلىقتار» تاقىرىبىندا وتكەن حالىقارالىق ونلاين عىلىمي-پراكتيكالىق كونفەرەنتسيادا مادەني-رۋحاني سالاداعى قول جەتكەن جەتىستىكتەر مەن ورىن العان ولقىلىقتار جان-جاقتى تالقىلاندى.
كونفەرەنتسياعا فيلولوگيا جانە كوپتىلدى ءبىلىم بەرۋ ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى, پروفەسسور الۋا تاڭجارىقوۆا مودەراتورلىق ەتتى. جيىندى اشقان ۋنيۆەرسيتەت رەكتورى دارحان ءبىليالوۆ كۇن تارتىبىندەگى ماسەلەنىڭ وزەكتىلىگىنە توقتالدى.
اقىن, قازاقستاننىڭ ەڭبەك ەرى ولجاس سۇيلەيمەنوۆ تاۋەلسىزدىكتىڭ 30 جىلى ەل ءۇشىن ۇلكەن تاريحي كەزەڭ بولعانىن اتاپ كورسەتتى. «بىراق بۇعان دەيىنگى تاريحىمىز رەسەي يمپەرياسىنىڭ سولاقاي ساياساتىنا بايلانىستى بۇرمالانىپ كەلدى. ال وزىمىزدە ول زامانداردا جىلناماشى بولماعاندىقتان, كوپ نارسەنى دالەلدەي الماي قالدىق. سوندىقتان زور مۇمكىندىك تۋىپ تۇرعان قازىرگى تاڭدا تاريحىمىزدى تۇگەندەۋىمىز كەرەك», دەدى اقىن. سونىمەن قاتار «سەمەي-نەۆادا» انتيادرولىق قوزعالىسى ارقىلى سەمەي جەرىندەگى يادرولىق سىناقتار توقتاتىلىپ, پوليگوننىڭ جابىلۋى دا تاۋەلسىزدىك تاريحىنىڭ جارقىن بەتتەرى ەكەنىن ايتتى.
قازاقتىڭ تۇڭعىش عارىشكەرى, كەڭەس وداعىنىڭ باتىرى توقتار اۋباكىروۆ ولجاس سۇلەيمەنوۆتىڭ ويلارىن جالعاستىرا كەلە, ەل تاريحىنىڭ ءالى كۇنگە جالتاقتاپ وتىرعانىنا وكىنىش ءبىلدىردى. ء«وزىمىز ىستەگەن زور ىستەردى ءوزىمىز ايتا الماساق, كىم ايتادى؟ قازاق قازاق بولعالى مىڭ جىلدان استى. تاريحى ءتۇزۋ ەلدىڭ ەڭسەسى دە بيىك بولادى», دەدى ۇشقىش.
سونداي-اق قازاقستاننىڭ رۋمىنياداعى توتەنشە جانە وكىلەتتى ەلشىسى نۇرباح رۇستەموۆ ەل تاۋەلسىزدىگى جىلدارىنداعى قازاقستاننىڭ حالىقارالىق قاتىناستارداعى تابىستارى تۋرالى ايتتى. ال م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, فيلولوگيا عىلىمدارىنىڭ دوكتورى كەنجەحان ماتىجانوۆ وتىز جىلداعى قازاق ادەبيەتىنىڭ دامۋ تەندەتسيالارىنا توقتالدى.
اۋقىمدى ءىس-شاراعا ۇلتتىق عىلىم اكادەمياسىنىڭ پرەزيدەنتى, اكادەميك مۇرات جۇرىنوۆ, ق.تىنىستانوۆ اتىنداعى ىستىقكول مەملەكەتتىك ۋنيۆەرسيتەتىنىڭ رەكتورى اسقار يمانباەۆ, تۇڭعىش پرەزيدەنت – ەلباسى كىتاپحاناسىنىڭ ارنايى جوبالار قىزمەتىنىڭ باسشىسى ەرسۇلتان بەكتۇرعانوۆ, موڭعوليا-قازاقستان دوستىعى جانە ىنتىماقتاستىق وداعىنىڭ توراعاسى باكەي اعىپار ۇلى, كورەيا رەسپۋبليكاسىنىڭ قازاقستانداعى ەلشىلىگى جانىنداعى ءبىلىم بەرۋ ورتالىعىنىڭ ديرەكتورى كيم تەحۆان, ەۋرازيا ەكونوميكالىق كوميسسياسىنىڭ ەنەرگەتيكا جانە ينفراقۇرىلىم جونىندەگى القا مۇشەسى تايىر مانسۇروۆ, حالىقارالىق «تۇركسوي» تۇركى مادەنيەتى ۇيىمىنىڭ باس حاتشىسى دۇيسەن قاسەيىنوۆ قاتىسىپ, تاۋەلسىزدىكتىڭ 30 جىلى ەلدىڭ مادەني-رۋحاني دامۋىنىڭ ايتۋلى كەزەڭى بولعانىن اتاپ ءوتتى.
