«قازىرگى تاڭدا قاشىقتان جۇمىس ىستەۋ الەمدىك ترەندكە اينالىپ وتىر. بۇعان ارينە, پاندەميا دا ءوز اسەرىن تيگىزدى. ەلىمىزدە ازاماتتار قاشىقتان جۇمىس ىستەۋ رەجيمىنە كوشكەن كەزدە ءتيىستى زاڭنامالىق رەتتەۋدىڭ جوقتىعى ەڭبەك قاتىناستارى سالاسىندا كەيبىر ماسەلەلەردى تۋعىزعانى بەلگىلى. وسى زاڭ قاشىقتان جۇمىس ىستەۋدىڭ قۇقىقتىق نەگىزدەرىن ودان ءارى قالىپتاستىرۋعا ارنالعان», دەدى سەنات توراعاسى ماۋلەن اشىمباەۆ.
پارلامەنت دەپۋتاتتارى قازاقستاندىقتاردىڭ ەڭبەك قۇقىقتارىن قورعاۋعا ارنالعان زاڭعا باستاما جاساعان بولاتىن. «قاشىقتاعى» قىزمەتكەرلەرگە ارنالعان جاڭالىقتاردىڭ ىشىندە - بەلگىلەنگەن جۇمىس ۋاقىتىنىڭ تىركەلگەن ەسەبى, جۇمىس بەرۋشىنىڭ ءوز قىزمەتكەرلەرىن جابدىقتارمەن, بايلانىس قىزمەتتەرىمەن قامتاماسىز ەتۋ جونىندەگى مىندەتى جانە باسقا دا بىرقاتار ەرەجەلەر بار.
ەگەر قىزمەتكەر ەڭبەك شارتىندا كورسەتىلگەن جۇمىس كولەمىن ورىنداسا, قاشىقتان جۇمىس سيپاتىنداعى جالاقى تولىق مولشەردە تولەنۋى كەرەك.
