قازاقستان • 24 ماۋسىم، 2021

قازاقستان مەن اقش-تىڭ اسكەري-مەديتسينالىق قىزمەت جۇيەسىندەگى IT-تەحنولوگيالار تالقىلاندى

117 رەت كورسەتىلدى

الماتىداعى قورعانىس مينيسترلىگىنىڭ اسكەري مەديتسينا ورتالىعىندا قازاقستان مەن اقش قورعانىس ۆەدومستۆولارى وكىلدەرىنىڭ كەزدەسۋى ءوتتى، دەپ حابارلايدى Egemen.kz.

ەكىجاق مەديتسينا قىزمەت ماماندارىن وقىتۋ دايىندىعىندا تسيفرلىق تەحنولوگيالاردى قولدانۋ ماسەلەلەرىن تالقىلادى.

اتالمىش شاراعا ەكى ەلدىڭ قورعانىس ۆەدومستۆولارىنىڭ ماماندارى، سونىڭ ىشىندە اسكەري مەديتسينا ورتالىعىنىڭ، راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ، اقپاراتتاندىرۋ دەپارتامەنتىنىڭ وكىلدەرى قاتىستى.

امەريكالىق ماماندار اسكەري مەديتسينا ورتالىعىنداعى سىنىپتاردىڭ IT-جابدىقتارىمەن تانىستى. تاجىريبە ساباقتارىندا قازاقستاندىق دارىگەرلەر ۇرىس الاڭىندا العاشقى مەديتسينالىق كومەك كورسەتۋ، جاياۋ اسكەردىڭ جاۋىنگەرلىك كولىگىنەن جارالانعانداردى شىعارۋ، سودان سوڭ ولاردى كوشىرۋ ماشىقتارىن كورسەتتى.

رەتى كەلگەندە اقش ۇلتتىق گۆاردياسىنىڭ كيبەرترانسپورت تەحنيگى ەريك دجونس ەلەكتروندى مەديتسينالىق وقىتۋ تاقىرىبىندا ونلاين تۇردە بايانداما جاسادى. ول قولجەتىمدى ءبىلىم بەرۋ پلاتفورمالارى مەن باعدارلامالارىن پايدالانۋ ارقىلى تىڭداۋشىلاردى قاشىقتىقتان وقىتۋدى ۇيىمداستىرۋ ماسەلەلەرىن جان-جاقتى ايتتى.

اقپارات الماسۋ بارىسىندا ورتالىقتى تسيفرلىق جابدىقتاۋ، اقپاراتتىق تەحنولوگيالار اياسىنداعى جوبالاردى ازىرلەۋ ماسەلەلەرى دە قوزعالدى.

ايتا كەتسەك، اقش-تىڭ قر-داعى ەلشىلىگىنىڭ قاۋىپسىزدىك سالاسىنداعى اسكەري ىنتىماقتاستىق كەڭسەسى ەكى ەلدىڭ قورعانىس ۆەدومستۆولارى اراسىنداعى اقپارات الماسۋدى اسكەري ىنتىماقتاستىق جوسپارى نەگىزىندە ۇيىمداستىردى.

سوڭعى جاڭالىقتار

دوللار قىمباتتادى

قارجى • بۇگىن، 15:52

ۇقساس جاڭالىقتار