قازاقستان • 24 ماۋسىم، 2021

ەكپە العاننان كەيىن جۇكتىلىكتى جوسپارلاۋعا بولا ما؟

135 رەت كورسەتىلدى

كوروناۆيرۋسقا قارسى ۆاكتسينا نەلىكتەن 18 جاستان اسقاندارعا سالىنادى جانە ەكپە العاننان كەيىن جۇكتىلىكتى جوسپارلاۋعا بولا ما؟ قالالىق №4 ەمحانانىڭ دارىگەر-ەپيدەميولوگى ايمان دوسانوۆا ۆاكتسيناتسيانىڭ تيىمدىلىگى جانە ونىڭ ادام اعزاسىنا اسەرى تۋرالى ءتۇسىندىرىپ بەردى، دەپ حابارلايدى Egemen.kz.

كوروناۆيرۋس پاندەمياسىمەن كۇرەس ەكىنشى جىلعا سوزىلىپ بارادى. بۇل سالاداعى ۇلكەن كۇش دەنساۋلىق ساقتاۋ جۇيەسى مەن مەديتسينالىق قىزمەتكەرلەرگە جۇكتەلىپ وتىر. جىل باسىنان بەرى دارىگەرلەرگە كومەك رەتىندە ۆاكتسيناتسيا جەتكىزىلدى. بۇل ۇجىمدىق يممۋنيتەتتى دامىتۋدىڭ جانە ءومىردىڭ بۇرىنعى جاعدايىنا ورالۋدىڭ جالعىز، ءتيىمدى ءادىسى.

«قازىر ۆاكتسينا الاردا ونىڭ تۇرىنە تاڭداۋ بەرىلەدى. قولدانىستا قازاقستاننىڭ، رەسەيدىڭ، قىتايدىڭ ۆاكتسينالارى بار. ونىڭ ءبارى ەرىكتى تۇردە جاسالادى. ۆاكتسينانىڭ ماڭىزى وتە زور. سەبەبى جاپپاي ۆاكتسينالاۋ بۇگىنگە دەيىن ادامزاتتى ءتۇرلى ىندەتتەن قۇتقارىپ كەلدى. وكىنىشكە قاراي، عالامتور بەتتەرىندە كوروناۆيرۋسقا قارسى ۆاكتسينا جايلى شىندىققا ساي كەلمەيتىن، جالعان اقپاراتتار بار. ول ۆاكتسينانىڭ ءبارى قولدانىسقا ەنەردەن بۇرىن ءتۇرلى سىناقتان ءوتتى. سوندىقتان جۇرت جالعان اقپاراتقا ەمەس، عىلىمي تۇردە دالەلدەنگەن مالىمەتتەرگە سەنۋى ءتيىس»، دەدى دارىگەر.

ونىڭ ايتۋىنشا، پاندەميانى توقتاتۋ ءۇشىن حالىقتىڭ شامامەن 60-70% ۆاكتسيناتسيادان ءوتۋى ءتيىس. سول كەزدە عانا ۇجىمدىق يممۋنيتەت دامۋى مۇمكىن، ناتيجەسىندە ۆيرۋس ەشكىمگە جۇقپايدى.

«مۇمكىندىكتى پايدالانا وتىرىپ، جۇرتشىلىققا قاراپايىم سانيتارلىق تالاپتاردى ساقتاۋى كەرەكتىگىن ايتقىم كەلەدى. ءبىز، دارىگەرلەر ماسكا تاعىپ، انتيسەپتيكتەردى تۇراقتى پايدالانامىز. اراقاشىقتىق ساقتاۋ – باستى مىندەتىمىزدىڭ ءبىرى. بۇل – ۆيرۋستىڭ تارالۋىنىڭ الدىن الاتىن بىردەن ءبىر ءتاسىل. جۇرت اراسىندا ماسكا تاعۋعا قارسىلىق بىلدىرەتىن، ادام كوپ جينالعان ورىنداردا الاڭسىز جۇرەتىن، قوناققا ەش قينالماستان باراتىن جاندار بار. مۇنداي الاڭسىزدىق ناۋقاستار سانىن ارتتىرادى. ال قازىر ءۇندى شتامى دەگەن اتاۋمەن بەلگىلى ينفەكتسيانىڭ ەڭ قاۋىپتى ءتۇرى تارالىپ جاتىر»، دەيدى دوسانوۆا.

ۆاكتسيناتسيا جايلى ايتا وتىرىپ، دارىگەر كوروناۆيرۋسقا قارسى ەكپەنى 18 جاستان اسقاندار عانا الاتىنىن قوزعاپ ءوتتى. ۆاكتسينا الۋعا جۇكتى، بالا ەمىزەتىن، ونكولوگيالىق اۋرۋلارى، سونداي-اق ءتۇرلى پرەپاراتتارعا اللەرگيالىق رەاكتسياسى بار ادامدارعا بولمايدى. ماماننىڭ ايتۋىنشا، ۆاكتسينا العاننان كەيىن جۇكتىلىكتى جوسپارلاۋعا بولادى. الايدا ەكى كومپونەنتتىڭ اراسىندا ەمەس. ەكپەنى تولىق الىپ بولعاننان كەيىن ءبىر جارىم ايدان كەيىن عانا جوسپارلاۋ قاجەت. دەگەنمەن ۆاكتسينا كوروناۆيرۋستان تولىقتاي قورعامايتىنىن، بىراق ەكپە العان ادام كوروناۆيرۋسپەن اۋىراتىن بولسا، جەڭىل وتەتىنىن ءمالىم ەتتى.

«كوبىسى قانداي دا ءبىر پرەپاراتقا قارسى اللەرگيا پايدا بولسا نە ىستەۋ كەرەك دەپ سۇرايدى. مۇنداي جاعدايدا ۆاكتسينا الاردان بۇرىن ۋچاسكەلىك دارىگەرگە كورىنۋ قاجەت. بۇل سول سياقتى ۇزاق مەرزىمدى جۇرەك اۋرۋىمەن اۋىراتىندارعا دا قاتىستى. ۆاكتسينا العاننان كەيىن ءۇش كۇن ىشىندە ادامدا السىزدىك، دەنە اۋىرۋى، دەنە قىزۋىنىڭ كوتەرىلۋى سەكىلدى وزگەرىستەر بولۋى مۇمكىن. مۇنداي اسەر ۆاكتسينانىڭ وزگە دە تۇرلەرىندە كەزدەسەدى. سول سەبەپتى ءۇش كۇن ۋاقىت بەرىلەدى. ال سالعاننان كەيىن پاتسيەنت قانداي دا ءبىر رەاكتسيالار بولعان جاعدايدا دەرەۋ ءتيىستى شارالار قابىلداۋ ءۇشىن 30 مينۋت باقىلاۋدا بولادى. بىراق مۇنداي جاعداي بىزدە ءالى كەزدەسكەن جوق»، دەپ قوستى سپيكەر.

سوڭعى جاڭالىقتار

شىعىس «قىزىل» ايماقتا

ايماقتار • كەشە

تسيفرلى تەڭگە جوباسى تالقىلاندى

ەكونوميكا • 23 شىلدە، 2021

اقپاراتتىق حابارلاما

ەگەمەن قازاقستان • 23 شىلدە، 2021

ۇقساس جاڭالىقتار