نۇر-سۇلتان قالاسى ەمحانالارىنىڭ قىزمەتكەرلەرى كونتسەرتتىڭ باستى قوناقتارى بولىپ, الەمگە تانىمال ارتىستەردىڭ ونەرىن تەگىن تاماشالادى. بەينەلەپ ايتساق, فەستيۆال ۇيىمداستىرۋشىلارى ولارعا كومەك رەتىندە MuzVac دەپ اتالاتىن جاڭا مۋزىكالىق ۆاكتسيناسىن ويلاپ تاپتى. بۇل, ەڭ الدىمەن, ۆيرۋستى جەڭۋ ءۇشىن يممۋنيتەتتى نىعايتۋدىڭ, جاقسى كوڭىل كۇي سىيلاۋدىڭ ءتيىمدى قۇرالى.
كەشتە يتاليا مەن شۆەتسيانىڭ تانىمال جۇلدىزدارى – انتونەللو كاروتستسا, ريككاردو بەرتوتستسيني, ميا ستەگمار – دجەنني تارنەبەرگ, سونداي-اق ەرلان رىسقالي, الفيا كاريموۆا, «استانا وپەرا» تەاترىنىڭ سيمفونيالىق وركەسترى مەن نۇر-سۇلتان قالاسى فيلارمونياسىنىڭ كامەرالىق حورى ونەر كورسەتتى.
ديريجەرلىك تۇعىردا يتاليادان كەلگەن ماەسترو روبەرتو مولينەللي تۇردى. ديريجەر ءوز سوزىندە پاندەميا كەزىندە قايسارلىق تانىتقان دارىگەرلەرگە العىسىن ءبىلدىرىپ, فەستيۆالدىڭ ىزگى ماقساتتارىن ءبولىسۋ ءۇشىن بۇل ءىس-شاراعا بارلىق ارتىستەردىڭ زور قۋانىشپەن كەلگەندەرىن جەتكىزدى.
كونتسەرتتىك باعدارلاما الەمدەگى سان مىڭ تىڭدارمانعا جاعىمدى اسەر سىيلاعان حح عاسىردىڭ ۇزدىك تۋىندىلارىنان قۇرالدى. اتاپ ايتقاندا, اۆۆا جانە Queen توپتارىنىڭ اتاقتى اندەرى, «كاسىپقوي», «ز ۇلىم, جامان, جاقسى», «ميسسيا» سىندى ايگىلى كينوفيلمدەرگە جازىلعان ەننيو مورريكونەنىڭ مۋزىكاسى كورەرمەن كوڭىلىنەن شىقتى.
ايتا كەتەيىك, فەستيۆال «MuzVac – ۇزدىك مۋزىكالىق ۆاكتسينا!» ۇرانىن ارقاۋ ەتىپ, ەلوردا كۇنىن مەرەكەلەۋ اياسىندا وتكىزىلدى. قايىرىمدىلىق جوبا ەلوردالىق كورەرمەنگە 3 كونتسەرت ۇسىندى.
