بيىل XVIII مارتە وتكىزىلگەن «يسكۋسستۆو كنيگي» بايقاۋىنا قازاقستان رەسپۋبليكاسى توراعالىق ەتتى. ۇيىمداستىرۋ جانە قاتىسۋشى مەملەكەتتەر ۇسىنعان كىتاپتاردى جيناقتاۋ جۇمىستارىن ۇلتتىق مەملەكەتتىك كىتاپ پالاتاسى اتقاردى. حالىقارالىق جوبانىڭ قورىتىندى جينالىسى جۋىردا ونلاين فورماتتا ءوتتى.
قورىتىندى جينالىستىڭ العاشقى كۇنىندەگى وتىرىسقا بايقاۋ توراعاسى, مادەنيەت جانە سپورت ۆيتسە-ءمينيسترى نۇرعيسا داۋەشوۆ قاتىسىپ, ۇسىنىلعان كىتاپتاردىڭ ساپاسى دا ايتارلىقتاي وسكەنىن اتاپ ءوتتى. «بۇل بايقاۋدىڭ باستى ماقساتى – تمد مەملەكەتتەرى اراسىنداعى باسپا ءىسى سالاسى بويىنشا ءارى جالپى رۋحانيات بويىنشا ءوزارا ىنتىماقتاستىق قارىم-قاتىناستى تەرەڭدەتۋ, دامىتۋ جانە جاڭا جوبالاردى بىرىگىپ جۇزەگە اسىرۋ, قولداۋ كورسەتۋ, تاجىريبە الماسۋ», دەدى ول.
ءبىرىنشى كۇننىڭ جوسپارى بويىنشا التى مەملەكەتتەن ۇسىنىلعان كىتاپتاردى تانىستىرۋ جانە تالداۋ جۇمىستارى جۇرگىزىلىپ, پىكىرتالاس ءۇش ساعاتقا سوزىلعان. قازىلار القاسى ۇسىنىلعان كىتاپتاردىڭ حالىقارالىق ىنتىماق- تاستىق, تاۋەلسىزدىكتىڭ 30 جىلدىعى, كىتاپتىڭ بەزەندىرىلۋى سياقتى باعىتتارداعى باسىمدىقتارىن, ەرەكشەلىكتەرىن, ىزدەنىس ناتيجەلەرىن باعالادى. نەگىزگى باسىمدىق ۇسىنىلعان ەڭبەكتەردى نوميناتسيا تالاپتارىنا ساي ەكەنىن انىقتاۋعا, جاڭا تاقىرىپتاردىڭ ۇسىنىلۋىنا باعىتتالدى. بايقاۋ شارتىنا سايكەس ۇسىنىلعان كىتاپتار 10 نوميناتسيا بويىنشا («سودرۋجەستۆو», «مويا سترانا», «ديالوگ كۋلتۋر», «كنيگا دليا دەتەي ي يۋنوشەستۆا», «ناۋكا ي وبرازوۆانيە», «ارت-كنيگا», «يسكۋسستۆو يلليۋستراتسي», «وتپەچاتانو ۆ سودرۋجەستۆە», «پوبەدا», «گران-پري») سىنعا تۇسەدى.
ايتا كەتەيىك, قورىتىندى وتىرىسقا ارمەنيا رەسپۋبليكاسىنان ۇلتتىق كىتاپحانانىڭ حالىقارالىق جوبالار كوورديناتورى مارگارەت اسلانيان, بەلارۋس رەسپۋبليكاسىنان اقپارات مينيسترلىگىنىڭ باسپا ءىسى جانە پوليگرافيا ءىسى باسقارماسىنىڭ باسشىسى ۆلاديمير اندريەۆ, قازاقستان رەسپۋبليكاسىنان ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ جانە «بالالار ادەبيەتى» باسپاسىنىڭ ديرەكتورى شايزادا بايكەنوۆا, قىرعىز رەسپۋبليكاسىنان مەملەكەتتىك كىتاپ پالاتاسىنىڭ ديرەكتورى كويچىمبەك مومۋنكۋلوۆ, رەسەي فەدەراتسياسىنان تسيفرلىق دامۋ, بايلانىس جانە بۇقارالىق اقپارات قۇرالدارى مينيسترلىگىنىڭ باق-تاعى مەملەكەتتىك ساياسات باسقارماسىنىڭ باسشىسى الەكساندر ۆوروپاەۆ قاتىستى.
«يسكۋسستۆو كنيگي» بايقاۋىنا قازاقستان رەسپۋبليكاسىنىڭ توراعالىق ەتۋى – تاۋەلسىزدىكتىڭ 30 جىلدىعى قارساڭىندا جاۋاپكەرشىلىگى جوعارى جۇمىس بولدى. اۋقىمدى ءىس-شارانىڭ جوعارى دەڭگەيدە ۇيىمداستىرىلعانىن ايتقان رەسەي فەدەراتسياسىنان تسيفرلىق دامۋ, بايلانىس جانە بۇقارالىق اقپارات قۇرالدارى مينيسترلىگىنىڭ باق-تاعى مەملەكەتتىك ساياسات باسقارماسىنىڭ باسشىسى الەكساندر ۆوروپاەۆ ەلدەر اراسىنداعى مادەني بايلانىستارعا توقتالدى.
ء«بىز «يسكۋسستۆو كنيگي» بايقاۋىن جىل سايىن ءداستۇرلى تۇردە وتكىزۋ ارقىلى تمد مەملەكەتتەرى اراسىنداعى رۋحاني بايلانىستى, مادەني قارىم-قاتىناستاردى نىعايتىپ كەلەمىز. وسى باعىتتان الىپ قاراساق, بۇل بايقاۋدىڭ تاجىريبە الماسۋ الاڭىنا اينالىپ, حالىقارالىق اۋقىمدا ماڭىزدى ءرول اتقارىپ وتىرعانىن بايقايمىز. قازاقستان رەسپۋبليكاسى بيىلعى بايقاۋدى قاشىقتان ۇيىمداستىرا وتىرىپ, وتە جوعارى دەڭگەيدە الىپ شىققانىن ايتا كەتۋىمىز كەرەك. بايلانىس ساپاسى دا, بايقاۋدى ۇيىمداستىرۋ جانە وعان جەرگىلىكتى مامانداردى شاقىرۋ, توراعانىڭ ءاردايىم تىكەلەي بايلانىستا بولۋى – ءىس-شارانىڭ ماڭىزىن ارتتىراتىن قادامدار», دەدى ول.
ال قىرعىز رەسپۋبليكاسىنىڭ مەملەكەتتىك كىتاپ پالاتاسىنىڭ ديرەكتورى كويچىمبەك مومۋنكۋلوۆ: «قازاقستان رەسپۋبليكاسىنىڭ باسپا ءىسى سالاسى جىل ساناپ قارقىندى دامىپ كەلە جاتقانىن وسى بايقاۋ توڭىرەگىندە كورىپ وتىرمىز. ەلدىڭ تاريحىن, مادەنيەتىن, ادەبيەتىن, سالت-ءداستۇرىن ناسيحاتتايتىن ءىرى شىعارمالار باسىلىپ جاتىر. ءبىز دە بيىل وسى حالىقارالىق كونكۋرسقا قازاقتىڭ زاڭعار جازۋشىسى مۇحتار اۋەزوۆتىڭ «اباي جولى» رومان-ەپوپەياسىنىڭ قىرعىز تىلىندەگى نۇسقاسىن ۇسىنىپ وتىرمىز. ادەبيەت پەن ونەردە شەكارا جوق, ءبىز باۋىرلاس حالىقتاردىڭ مادەنيەتىنە, ءدىنى مەن تىلىنە, سالت-داستۇرىنە ءاردايىم قۇرمەتپەن قارايمىز», دەپ اتاپ ءوتتى.
ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ جينالىستى قورىتىندىلاي كەلە, ەكى كۇن بويى ونلاين بايلانىسقا شىققان ءاربىر قاتىسۋشىعا العىس ءبىلدىردى. «بيىل ەكىنشى مارتە الەمدەگى ەپيداحۋال سالدارىنان حالىقارالىق بايقاۋدى ونلاين فورماتتا وتكىزىپ وتىرمىز. دەگەنمەن قىسىلتاياڭ ۋاقىت بولسا دا, ءبىز حالىقارالىق قارىم-قاتىناستاردى نىعايتۋدى, باسپا ءىسى سالاسىنداعى تاجىريبە الماسۋ ماسەلەلەرىن وزىنە جۇكتەيتىن «يسكۋسستۆو كنيگي» بايقاۋى ءوز دەڭگەيىندە ءوتتى دەگەن ويدامىز», دەدى ول.
بايقاۋدىڭ قازىلار القاسى ماسكەۋ حالىقارالىق كىتاپ كورمەسى اياسىندا بايقاۋ جەڭىمپازدارىن سالتاناتتى تۇردە ماراپاتتاۋ شاراسىن (ونلاين ءوتۋى مۇمكىن) تالقىلاپ, ەگەر ءداستۇرلى فورماتتا وتكەن جاعدايدا باسقوسۋعا ۋاعدالاستى.
