ءسويتىپ, اتالعان ءىس-شاراعا قاتىسقان 30 قاراعاندىلىق جاس ۆيدەوروليكتەر ارقىلى ەلگە ەكپە الۋدىڭ ماڭىزىن ءتۇسىندىردى, ۆاكتسينالاۋدان وتكەن وزدەرىنىڭ تاجىريبەسىمەن ءبولىستى. ايتا كەتۋ كەرەك, اكتسياعا قاتىسۋشىلار اراسىندا قالالىق شتابتىڭ ەرىكتىلەرى, جاستار ءماسليحاتىنىڭ دەپۋتاتتارى جانە جاس وقىتۋشىلار بولدى. مىسالى, ە.بوكەتوۆ اتىنداعى قارمۋ-دىڭ بەلسەندى ستۋدەنتى بەكتاس جۇمان قالىپتى ومىرگە قايتا ورالۋدىڭ بىردەن-ءبىر كەپىلى ۆاكتسينا الۋ ەكەندىگىن ايتادى. «جامان تۇماۋدى» العاشقىلاردىڭ ءبىرى بولىپ جۇقتىرعان ول ەكپە سالۋ ورتالىقتارى اشىلعاندا, ويلانباستان تىزىمگە بىرىنشىلەردىڭ قاتارىندا تىركەلىپتى.
– مەنىڭ تۋىستارىم دا ىندەتتىڭ جەڭىل تۇرىمەن اۋىرىپ شىقتى. قازىر ولار ۆاكتسينا سالدىرىپ العان. ەكپە ءبىزدى ەل ىشىنە دەندەپ ەنگەن ىندەتتەن قۇتقارادى دەپ ويلايمىن, – دەيدى بەلسەندى جاس.
ال قاراعاندى تەحنيكالىق ۋنيۆەرسيتەتىنىڭ ماگيسترانتى جانە «جاس وردا» جاستار قاۋىمداستىعىنىڭ جەتەكشىسى ءىلياس سمايلوۆ بولسا, سپۋتنيك V ۆاكتسيناسىنىڭ ەكى كومپونەنتىن دە العانىن, قازىرگى جاعدايدا ءوزىن جاقسى سەزىنەتىنىن ايتادى. ونىڭ ايتۋىنشا, ەكپە الۋعا دوستارىمەن بىرگە بارعان ەكەن. «ۆاكتسينالاۋ ۇجىمدىق يممۋنيتەتتى قالىپتاستىرادى», دەگەن ماگيسترانت تا جۇرتتى جاپپاي ەكپە الۋعا شاقىردى.
«سارى» ايماققا وتكەن قاراعاندى وبلىسىنداعى ەپيدەميولوگيالىق جاعداي ءالى دە بولسا جاقسارىپ كەتكەن جوق. سوڭعى تاۋلىكتەگى مالىمەتتەر وسىلاي دەۋگە تولىق نەگىز بەرەدى. ماسەلەن, اپتا باسىندا وڭىردە «جامان تۇماۋمەن» اۋىرعاندار سانى 150 ناۋقاسقا جەتسە, جازىلىپ شىققاندارىنىڭ سانى بار-جوعى 50 ادامدى قۇراعان ەكەن.
