استانا كۇنىن مەرەكەلەۋ اياسىندا 4 شىلدە كۇنى ساعات 18:00-دە تەاتردىڭ ۇلكەن زالى ساحناسىندا «استانا وپەرا» حالىقارالىق وپەرا اكادەمياسىنىڭ اشىلۋىنا وراي سالتاناتتى گالا-وپەرا وتەدى. كونتسەرتكە مارياندجەلا سيتسيليا, ماەسترو دجۋزەپپە اكۋاۆيۆا, فرانچەسكو مەلي, ماتتيا روسسي (يتاليا), ليبۋشە سانتوريسوۆا (چەحيا), الەكسەي شاپوۆالوۆ (رەسەي), بادرال چۋلۋنبااتار (موڭعوليا), سايان يسين (قازاقستان-قىرعىزستان), باۋىرجان اندەرجانوۆ (گەرمانيا-قازاقستان), مەدەت چوتاباەۆ, جۇپار عابدۋللينا, سالتانات احمەتوۆا (قازاقستان) سەكىلدى الەمدىك ءارى قازاقستاندىق ونەر جۇلدىزدارى قاتىسادى.
ورىنداۋشىلاردىڭ جۇلدىزدى قۇرامى ورتالىق قالالىق ساياباقتاعى امفيتەاتر ساحناسىندا دا ونەر كورسەتەدى. «استانا وپەرا» تەاترى مادەنيەت جانە سپورت مينيسترلىگى جانە نۇر-سۇلتان قالاسىنىڭ اكىمدىگىمەن بىرلەسىپ, 5 شىلدە كۇنى ساعات 20:00-دە گاەتانو دونيتسەتتيدىڭ ەكى ءبولىمدى «دون پاسكۋالە» وپەراسىن ۇسىنادى. باستى پارتيالاردى ورىنداۋشىلار: نورينا – ليبۋشە سانتوريسوۆا (چەحيا), ەرنەستو – ەتسۋو دوي (جاپونيا), مالاتەستا – الەكسەي شاپوۆالوۆ (رەسەي), دون پاسكۋالە – انتۋان بەرنحەيم (شۆەيتساريا), كارليتو – ەرۇلان كامەل. ديريجەر – كوررادو ۆالۆو (يتاليا).
«بۇل – وسىنداي دارىندى حالىقارالىق انشىلەر قۇرامىمەن العاشقى ىنتىماقتاستىعىم. اشىق اسپان استىندا ونەر كورسەتۋ كەزىندە ەڭ قيىنى – انشىلەر مەن وركەستر اراسىنداعى تەڭگەرىمدى تابۋ. ءوز باسىم وپەرالىق سپەكتاكلدەر ءۇشىن يتاليالىق ستيلدەگى تەاتردى قۇپ كورەمىن, بىراق جاز مەزگىلىندە بىزدە يتاليادا وپەرا ساحناسى رەتىندە قولدانىلاتىن ەجەلگى گرەك جانە ەجەلگى ريم تەاترلارى بار. «دون پاسكۋالە» – گ.دونيتسەتتيدىڭ كەرەمەت اۋەزدى كونسترۋكتسيالارعا, اسەرلى دراماتۋرگيالىق قۇرىلىمعا, كەيىپكەرلەردىڭ پسيحولوگيالىق جانە پاتەتيكالىق تەرەڭدىگىنە يە ءپىسىپ-جەتىلگەن شىعارماسى. بۇل – ستيليستيكالىق تۇتاستىققا قۇرىلعان جاڭا رومانتيكالىق سەزىمتالدىقتىڭ ناتيجەسى. وسىنىڭ ءبارى دونيتسەتتيدى ۆەرديدىڭ ۇلى ءىزاشارى ءارى ون توعىزىنشى عاسىردىڭ ءبىرىنشى جارتىسىنداعى ۇلى يتاليالىق وپەرا كومپوزيتورلارىنىڭ ءبىرى ەتەدى», دەدى ماەسترو كوررادو ۆالۆو (يتاليا).
6 شىلدەدە ورتالىق قالالىق ساياباقتاعى امفيتەاتر ساحناسىندا وتەتىن مەرەكەلىك گالا-كونتسەرتكە تەاتردىڭ جەتەكشى وپەرا سوليستەرى, حور ارتىستەرى مەن سيمفونيالىق وركەستردىڭ ورىنداۋىندا قازاقستاندىق اۆتورلار مەن باتىسەۋروپالىق كلاسسيك كومپوزيتورلاردىڭ تانىمال وپەرالىق اريالارى مەن دۋەتتەرى, اسپاپتىق ءارى حورعا ارنالعان شىعارمالارى شىرقالادى.
مەرەكەلىك 6 جانە 7 شىلدە كۇندەرى «استانا وپەرا» ۇلكەن زالىنىڭ ساحناسىندا افيشاعا ەكى بىردەي قويىلىم – «كۇمىس عاسىر بالەتتەرى» توپتاماسىنان م.فوكيننىڭ حورەوگرافياسىنداعى ف.شوپەننىڭ مۋزىكاسىنا «شوپەنيانا» مەن ن.ا.ريمسكي-كورساكوۆتىڭ مۋزىكاسىنا «شەحەرەزادا» ءبىر ءبولىمدى بالەتتەرى ەنگىزىلدى.
