يتاليانى ۋەلس تە توقتاتا المادى
بيىلعى دوپ دوداسىنىڭ فاۆوريتىنە اينالعان يتاليا اسا تارتىستى وتكەن كەزدەسۋدە ۋەلستەن باسىم ءتۇسىپ, تولىق 9 ۇپاي جيدى. تورەشى ىسقىرا سالىسىمەن ۋەلس قاقپاسىن تورۋىلداعان مانچيني شاكىرتتەرى اقىرى 39-مينۋتتا قاقپا كىلتىن تاپتى. ماتتەو پەسسينا ەسەپ اشىپ, كومانداسىن العا شىعاردى. ەكىنشى تايمدا دا يتاليالىقتار قارقىندى ويىن ورنەگىن كورسەتتى. 55-مينۋتتا يتان امپادۋ دورەكى ويىنى ءۇشىن قىزىل قاعاز الىپ, الاڭنان قۋىلدى. ون ويىنشىمەن ويناۋ ۋەلسكە ءتىپتى قيىنعا سوقتى. سوعان قاراماستان كەزدەسۋ سوڭىنا دەيىن ەسەپ وزگەرىسسىز كۇيىندە قالدى.
ءسويتىپ روبەرتو مانچيني شاكىرتتەرى توپتىق كەزەڭدەگى ءۇش ويىندا جەڭىسكە جەتىپ, جەڭىلىسسىز ويىن سەرياسىن 30-عا دەيىن جەتكىزدى. وسىلايشا, مانچيني 1930 جىلعى ۆيتتوريو پوتستسونىڭ رەكوردتى قايتالادى. سونداي-اق يتاليا كەيىنگى 11 ويىندا ءوز قاقپاسىنا بىردە-ءبىر گول وتكىزگەن جوق. ەسەپ – 32:0. سوڭعى رەت «سكۋادرا ادزۋررا» قاقپاسىنا 2020 جىلدىڭ قازان ايىندا نيدەرلاند فۋتبولشىلارى گول سوققان ەكەن.
ەندى يتاليا قۇراماسى 26 ماۋسىمدا لوندوندا وتەتىن 1/8 فينال باسەكەسىندە س توبىندا ەكىنشى ورىنعا جايعاساتىن ۋكراينا نەمەسە اۋستريامەن كەزدەسەدى.
ايتا كەتەيىك, 2016 جىلى فرانتسيادا ۇيىمداستىرىلعان ەۋروپا چەمپيوناتىندا دا يتاليا قۇراماسى توپتىق كەزەڭدى ءبىرىنشى ورىنمەن اياقتاپ, شيرەك فينالدا گەرمانيادان ماتچ سوڭىنداعى پەنالتي سەرياسىندا جەڭىلىپ قالعان ەدى.
تۇركيا توپتىق كەزەڭنەن شىعا المادى
ازەربايجان استاناسى – باكۋدەگى وليمپيادالىق ستاديونىندا وتكەن ويىندا ماڭىزدى جولداماعا تالاسقان شۆەيتساريا مەن تۇركيا ماتچى الدىڭعى قۇرامانىڭ ءىرى جەڭىسىمەن اياقتالدى. شۆەيتساريا قۇراماسىنان حاريس سەفەروۆيچ جانە دجەردان شاكيري (دۋبل) مەرگەندىگىمەن كوزگە تۇسسە, تۇركيانىڭ جالعىز گولىن يرفان كاحفەدجي سوقتى. بۇل – تۇركيانىڭ بيىلعى ەۋروداعى ءبىرىنشى جانە ەڭ سوڭعى گولى.
دەگەنمەن ستاتيستيكالىق كورسەتكىش بويىنشا, ەكى قۇرامانىڭ كۇشى تەڭ ءتۇستى. سوققىلار بويىنشا شۆەيتساريالىقتار ءسال عانا باسىمدىققا يە بولدى – 23:19 (تۋرا سوققىلار – 10:6). ال دوپقا يەلىك ەتۋ بويىنشا كۇشتەر تەڭ ءتۇستى – 51 پايىزعا 49 پايىز. پاستاردىڭ دالدىگى بويىنشا ەكى قۇراما دا بىردەي ناتيجە كورسەتتى – 86 پايىز. بىراق مۇمكىندىكتەردى پايدالانۋ جاعىنان شۆەيتساريالىقتار دالدىك تانىتتى. سەفەروۆيچ جىلدام گول سوعىپ, باسىمدىقتى قولدارىنا السا, كەيىننەن شاكيري ەكى گول سالىپ ويىننىڭ ەڭ ۇزدىك فۋتبولشىسى اتاندى.
وسىلايشا, ا توبىندا بىردە-ءبىر ويىندا جەڭىلمەگەن يتاليا 9 ۇپايمەن كوش باستادى. ۋەلس قۇراماسى يتاليادان جەڭىلسە دە 4 ۇپايمەن ەكىنشى ورىنعا تابان تىرەدى. نەگىزى ۋەلس پەن شۆەيتساريا ەكەۋىنىڭ ۇپايى تەڭ. بىراق دوپ ايىرماشىلىعى روب پەيدج كومانداسىنىڭ پايداسىنا. دەگەنمەن شۆەيتساريا قۇراماسىنىڭ 1/8 فينالدان ءالى دە بولسا ءۇمىتى بار. ويتكەنى ءۇشىنشى ورىن العان ەڭ ۇزدىك 4 ۇجىم جيعان ۇپاي مەن قوسىمشا كورسەتكىشتەرىنە بايلانىستى پلەي-وفف كەزەڭىنە شىعا الادى. ازىرشە شۆەيتساريا بۇل تىزىمدە ءبىرىنشى ورىندا تۇر.
شەنول گيۋنەش جاتتىقتىراتىن تۇركيا قۇراماسى ەۋروپا چەمپيوناتىندا سوقىر ۇپاي جيناي الماي, ەلىنە ابىرويسىز قايتاتىن بولدى. تۇركيا 1996 جىلدان كەيىن العاش رەت ەۋرودودانىڭ فينالدىق كەزەڭىنىڭ توپتىق باسەكەسىندە ۇپاي الا الماعان ەۋروپاداعى جالعىز قۇراما بولىپ تۇر. 1996 جىلعى انگليادا وتكەن تۋرنيردە دە قۇرامىندا حاكان شۇكىر, بۇلەنت قورقماز, رۋشتۋ رۋجبەر سەكىلدى جۇلدىز فۋتبولشىلارى بار تۇركيا ءۇش ويىننىڭ بارىندە جەڭىلگەن ەدى. ءبىرىنشى تۋردا حورۆاتيادان (0:1), ەكىنشى تۋردا پورتۋگاليادان (0:1), ءۇشىنشى تۋردا دانيادان (0:3) ۇتىلعان بولاتىن.
ال 2016 جىلعى ەۋرودا انادولى ەلىنىڭ فۋتبولشىلارى چەحيانى 2:0 ەسەبىمەن جەڭىپ, يسپانيا مەن حورۆاتيادان 0:1 ەسەبىمەن ۇتىلىپ قالعان ەدى.
