وتىرىستا ۇكىمەت پەن ەسەپ كوميتەتىنىڭ 2020 جىلعا ارنالعان رەسپۋبليكالىق بيۋدجەتتىڭ اتقارىلۋى تۋرالى ەسەپتەرى قارالادى.
ايتا كەتەيىك, اتالعان ەسەپتەر وسىعان دەيىن ءماجىلىس پەن سەناتتىڭ جالپى وتىرىستارىندا تالقىلانعان بولاتىن. 2020 جىلى رەسپۋبليكالىق بيۋدجەتتىڭ اتقارىلۋى جاھاندىق داعدارىسقا بايلانىستى ىسكەرلىك بەلسەندىلىكتىڭ ايتارلىقتاي تومەندەۋى جاعدايىندا جۇزەگە اسىرىلدى. قارجى مينيسترلىگىنىڭ مالىمەتىنشە, جالپى ىشكى ءونىم ناقتى 2,6 پايىزعا تومەندەدى. بۇل نەگىزىنەن كارانتيندىك شارالاردىڭ ەنگىزىلۋىنەن قىزمەتتەر كورسەتۋدىڭ 5,4 پايىزعا تومەندەۋىنە بايلانىستى بولدى. دەگەنمەن ەكونوميكانىڭ ناقتى سەكتورى 2 پايىزعا وسكەنىن كورسەتتى.
بيۋدجەتتىڭ باسىم باعىتتارى توتەنشە جاعداي كەزىندە ازاماتتاردى جانە ناقتى سەكتوردى قولداۋعا ارنالعان شىعىستار بولدى. بۇل - الەۋمەتتىك تولەمدەردى يندەكستەۋ, شاعىن جانە ورتا بيزنەس سۋبەكتىلەرىنە سالىق اۋىرتپالىعىن تومەندەتۋ, «جۇمىسپەن قامتۋ جول كارتاسى», «بيزنەس جول كارتاسى», «ەڭبەك» جانە باسقا دا باعدارلامالار.
بيۋدجەت تۇسىمدەرى 100,3 پايىزعا ورىندالىپ, 12 ترلن 49 ملرد تەڭگەگە جەتتى. شىعىستار 98,3 پايىزعا يگەرىلدى جانە 14 ترلن 234 ملرد تەڭگەنى قۇرادى. الەۋمەتتىك شىعىستار 2019 جىلمەن سالىستىرعاندا 1,4 ترلن تەڭگەگە ۇلعايىپ, 6,6 ترلن تەڭگەنى قۇرادى.
بۇل رەسپۋبليكالىق بيۋدجەتتىڭ جالپى كولەمىنىڭ 47 پايىزى. پارلامەنت پالاتالارىنىڭ بىرلەسكەن وتىرىسى ونلاين-فورماتتا كورسەتىلىپ جاتىر.
