سونداي-اق رەسەي, فينليانديا, ۋكراينا, اۋستريا قۇرامالارى دا ءبىر اياعىمەن پلەي-وفف كەزەڭىنە ءوتىپ تۇر دەۋگە بولادى. اتالعان ەلدەردىڭ فۋتبولشىلارى سوڭعى تۋردا جەڭىسكە جەتەتىن بولسا, ەكىنشى جانە ءۇشىنشى ورىنمەن توپتىق كەزەڭنەن شىعۋعا مۇمكىندىكتەرى بار. ال D, E جانە F توبىنداعى قۇرامالاردىڭ جاعدايى ەكىنشى تۋردان كەيىن ودان ءارى شيەلەنىسىپ كەتتى.
ماسەلەن, العاشقى تۋردا حورۆاتيانى 1:0 ەسەبىمەن تىزە بۇكتىرگەن اعىلشىندار ەكىنشى تۋرداعى بريتانيا دەربيىندە شوتلانديامەن تەڭ ويناپ (0:0), مەرزىمىنەن بۇرىن كەلەسى كەزەڭگە شىعۋ مۇمكىندىگىنەن ايىرىلدى. دەگەنمەن انگليا قۇراماسىنىڭ ەكىنشى ورىنمەن دە پلەي-وفف كەزەڭىنە ءوتۋ مۇمكىندىگى بار. بىراق ءبارى دە سوڭعى تۋرداعى ويىنداردىڭ ناتيجەسىنە بايلانىستى بولماق. گارەت ساۋتگەيت شاكىرتتەرى ءۇشىنشى تۋردا جەكە كورسەتكىش بويىنشا D توبىندا ءبىرىنشى ورىندا تۇرعان چەحيا قۇراماسىمەن وينايدى. كەلەسى كەزەڭگە شىعۋ ءۇشىن ەكى قۇراماعا دا تەڭ ويىن جەتكىلىكتى.
ال توپتاعى ەكىنشى ويىندا ءبىر-ءبىر ۇپايى بار حورۆاتيا مەن شوتلانديا باق سىنايدى. بۇل ويىندا ەكى ۇجىمعا دا جەڭىس اۋاداي قاجەت. سەبەبى ءۇش ۇپاي ولجالاعان قۇراما 4 ۇپايمەن ءۇشىنشى ورىن ارقىلى دا پلەي-وففقا شىعۋى مۇمكىن. ال ەگەر تەڭ ەسەپ تىركەلەتىن بولسا, وكىنىشكە قاراي, حورۆاتيا دا, شوتلانديا دا بيىلعى دودانى توپتىق كەزەڭمەن اياقتاۋعا ءماجبۇر بولادى.
E جانە F توبىنداعى قۇرامالاردىڭ جاعدايى ءتىپتى قيىن. ماسەلەن, E توبىندا 4 ۇپايمەن كوش باستاپ تۇرعان شۆەتسيا سوڭعى تۋردا ءبىر ۇپايى بار پولشا فۋتبولشىلارىمەن كەزدەسەدى. ەگەر روبەرت لەۆاندوۆسكي باستاعان ۇجىم بۇل تەكەتىرەستە جەڭىسكە جەتىپ, يسپانيا سلوۆاكيانى تىزە بۇكتىرەتىن بولسا, پيرەنەي تۇبەگىنىڭ وكىلدەرى مەن پولشا ءبىرىنشى جانە ەكىنشى ورىنمەن كەلەسى كەزەڭگە شىعادى. ال 4 ۇپايمەن ءۇشىنشى ورىنعا سىرعيتىن شۆەتسيا توپتىق كەزەڭنىڭ ويىندارى اياقتالعانىن كۇتەدى. قىزىق بولعاندا, شۆەتسيا مەن سلوۆاكيا قارسىلاستارىمەن تەڭ ءتۇسىپ نەمەسە جەڭىسكە جەتەتىن بولسا, بيىلعى ەۋرو يسپانيا جانە پولشا قۇرامالارىنسىز ءارى قاراي جالعاسا بەرەدى.
F كۆارتەتىندەگى قۇرامالاردىڭ دا جاعدايى وزگە توپتارمەن سالىستىرعاندا اسا ءماز ەمەس. بيىلعى بىرىنشىلىكتىڭ «اجال توبى» اتانىپ كەتكەن تورتتىكتە ەۋروپانىڭ ەڭ ۇزدىك ۇجىمدارى جينالعان. اتاپ ايتار بولساق, گەرمانيا – ءۇش دۇركىن, فرانتسيا – ەكى دۇركىن ەۋروپا چەمپيونى. ال پورتۋگاليا قۇراماسى 2016 جىلعى قارت قۇرلىق بىرىنشىلىگىنىڭ جەڭىمپازى سانالادى. ماجارستان قۇراماسى دا قارا جاياۋ ەمەس. ولار 1964 جىلى ەۋروپا چەمپيوناتىنىڭ قولا جۇلدەسىن جەڭىپ العان.
وسىنداي كىل مىقتى قۇراما جينالعان توپتىڭ العاشقى تۋرىندا فرانتسيادان جەڭىلگەن گەرمانيا ەكىنشى تۋردا پورتۋگاليانى ءىرى ەسەپپەن تىزە بۇكتىردى – 4:2. بۇل ويىندا كريشتيانۋ رونالدۋ باستاعان ۇجىم «نەمىس ماشيناسىن» توقتاتا المادى. ال ءبىرىنشى تۋردا ءوز الاڭىندا پورتۋگاليادان وڭباي جەڭىلگەن ماجارستان فۋتبولشىلارى ەكىنشى تۋردا فرانتسيا قۇراماسىنا لايىقتى قارسىلىق كورسەتىپ, 1:1 ەسەبىمەن تەڭ وينادى. ءبىر ايتا كەتەرلىگى, وسى ماتچتىڭ ەڭ ۇزدىك ويىنشىسى دەپ تانىلعان لاسلو كلياينحايسلەردىڭ ەسىمى قازاقستاندىق فۋتبول جانكۇيەرلەرىنە جاقسى تانىس. ويتكەنى ماجارستاندىق جارتىلاي قورعاۋشى 2017 جانە 2018 جىلدارى ەلوردانىڭ «استانا» كلۋبىندا ونەر كورسەتىپ, ءوزىنىڭ ءتاۋىر ويىنىمەن جەرگىلىكتى جانكۇيەرلەردىڭ ىستىق ىقىلاسىنا بولەنگەن ەدى.
ەندى سوڭعى تۋردا ماجارستان گەرمانيا قۇراماسىمەن كەزدەسەدى. «نەمىس ماشيناسى» ءبىرىنشى تۋرداعىداي سىر بەرىپ قالماسا, كەلەسى كەزەڭگە شىعۋعا تولىق مۇمكىندىكتەرى بار. توپتاعى پورتۋگاليا مەن فرانتسيا اراسىنداعى ماتچ وسى ءتۋرنيردىڭ فينالىنان كەيىنگى ەڭ تارتىستى كەزدەسۋدىڭ ءبىرى بولادى دەپ كۇتىلۋدە. سەبەبى بۇل ويىندا تەڭ ناتيجە ەكى ۇجىمدى قاناعاتتاندىرمايدى, ەكەۋىنە دە تەك جەڭىس قاجەت. ەۋروپا بىرىنشىلىگى ءوزىنىڭ قىزعان شاعىنا ەندى ەنىپ كەلەدى.
