باتىس قازاقستان وبلىستىق دەنساۋلىق ساقتاۋ باسقارماسى باسشىسى مىندەتىن اتقارۋشى ارمان قاليبەكوۆتىڭ ايتۋىنشا, وڭىردەگى 4 كارانتيندىك ستاتسيوناردا 32 ادام, 18 ينفەكتسيالىق ستاتسيوناردا 419 ادام جاتىر. ناۋقاستاردىڭ كوپشىلىگى, ياعني 360 ادام ورال قالاسىنداعى اۋرۋحانالاردا جاتىر.
«جىل باسىندا ءبىزدىڭ ينفەكتسيالىق ستاتسيونارلاردا ورتا ەسەپپەن 180 ادام ەم الاتىن, بىراق قاڭتاردىڭ سوڭىنا قاراي كۇرت كوبەيىپ, 410 ادامعا دەيىن جەتتى. قازىرگى احۋال دا وسىنداي. جان ساقتاۋ بولىمىندە ازىرلەنگەن 72 كەرەۋەتتىڭ 31-ءى بوس ەمەس», دەپ مالىمدەدى ارمان تالعات ۇلى.
وڭىردە جىل باسىنان بەرى سovid-19 دەرتىنەن 185 ادام قايتىس بولعان. مارقۇمداردىڭ ەڭ كوبى (56 ادام) مامىر ايىندا تىركەلدى. ولاردىڭ 135-ءى – جاسى 65-تەن اسقان ادامدار. ماماندار ءولىم-ءجىتىمنىڭ كوپتىگىن ناۋقاستاردىڭ دارىگەرگە دەر كەزىندە قارالماۋىنان جانە قوسىمشا سوزىلمالى دەرتتەرىنىڭ اسقىنۋىنان دەپ وتىر. قازىر كۇن سايىن وبلىستىق ينفەكتسيالىق اۋرۋحاناعا ورتا ەسەپپەن 31-32 ناۋقاس قابىلدانىپ جاتىر.
وتكەن اپتادا وڭىرىمىزدە كوروناۆيرۋس ينفەكتسياسىن جۇقتىرعانداردىڭ قاتارى قايتا كوبەيە باستاعان. قوعامدىق كولىكتەردە ادامداردىڭ كوبى ماسكاسىز ءجۇر. تۇرعىنداردان ماسكا تاعۋدى تالاپ ەتپەگەن جولاۋشى تاسىمالداۋشى كومپانيالارعا ەندى سۋبسيديا بەرىلمەيدى. بۇل تۋرالى وبلىسى اكىمى عالي ەسقاليەۆ وتكىزگەن جەدەل شتاب وتىرىسىندا ايتىلدى.
ا.قاليبەكوۆتىڭ ايتۋىنشا, 12 ماۋسىمدا قىتايلىق CoronaVac ۆاكتسيناسىنىڭ 8 مىڭ دوزاسى جەتكىزىلگەن.
سوڭعى كەزدەرى تۇرعىنداردىڭ ۆاكتسينا الۋ قارقىنى دا تومەندەگەن. ماسەلەن, ءساۋىر ايىندا كۇنىنە 3 مىڭداي تۇرعىن ۆاكتسينا العان بولسا, قازىرگى كۇندە كۇنىنە 1 مىڭ ادام, سەنبى-جەكسەنبى كۇندەرى 400-دەي تۇرعىن ۆاكتسينا الادى ەكەن.
«كوروناۆيرۋستىڭ قۇربانى بولعان تۇرعىندارىمىز از ەمەس. ماسەلەن, قاڭتاردا – 28, ناۋرىزدا – 30, مامىردا – 56, ماۋسىمدا 14 ادام ينفەكتسيادان كوز جۇمدى. كۆي اۋرۋىنان كەيىن ناۋقاستاردىڭ كوبىندە ارتەريا ترومبوزى, وكپە زاقىمدانۋى (فيبروز) بايقالادى. سوندىقتان تۇرعىنداردى كارانتيندىك شارالاردى ساقتاپ, بوساڭسىماۋعا شاقىرامىن», دەدى باسقارما وكىلى.
بقو باس سانيتارلىق دارىگەرى مۇحامعالي ارىسپاەۆتىڭ ايتۋىنشا, سوڭعى اپتادا وڭىردە كوروناۆيرۋس ينفەكتسياسىن جۇقتىرعاندار سانىنىڭ ءوسۋى بايقالادى. ماسەلەن, 1-7 ماۋسىم ارالىعىندا وڭىردە 634 ينفەكتسيا جۇقتىرسا, 8-14 ماۋسىم ارالىعىندا 712 ادام اۋرۋعا شالدىققان. ءوسىم 11%-دى قۇرايدى.
قالا اكىمى ابات شىنىبەكوۆتىڭ بەرگەن مالىمەتى بويىنشا جىل باسىنان بەرى كارانتيندى بۇزۋدىڭ 187 فاكتىسى انىقتالىپ, 6 ملن تەڭگەدەن اسا سوماعا 123 حاتتاما جاسالعان.
«سوڭعى كەزدەرى تۇرعىندار كارانتين تالاپتارىنا قاراماستان ۇيلەنۋ تويلارىن وتكىزە باستادى. دەركول كەنتىندەگى ء«امينا», زاشاعان كەنتىندەگى «مارسەل», «ايزات», جۇلدىز شاعىن اۋدانىنداعى «ناۋرىز» مەيرامحاناسى بويىنشا ماتەريالدار جينالىپ, شەشىم قابىلداۋ ءۇشىن سانيتاريالىق-ەپيدەميولوگيالىق باقىلاۋ دەپارتامەنتىنە جىبەرىلدى. شەكتەۋ شارالارىن بىرنەشە رەت بۇزعان «كىمگە 30» كافەسى بويىنشا ماتەريالدار سوتقا جىبەرىلدى. كافەنىڭ يەسىنە ايىپپۇل سالىنىپ, قىزمەتى توقتاتىلدى», دەدى ا.شىنىبەكوۆ.
ءوڭىر اكىمى عالي ەسقاليەۆ مونيتورينگتىك توپتاردىڭ جۇمىسىن جانداندىرۋ قاجەت ەكەنىن ايتتى.
«تۇرعىندارىمىزدىڭ كوپشىلىگى كوروناۆيرۋس ينفەكتسياسىمەن اۋىرسام دا, ەمدەلىپ شىعامىن عوي دەپ ويلايدى. بىراق ساراپشىلار بۇل اۋرۋدىڭ زاردابى بىرنەشە جىلعا سوزىلاتىنىن ايتۋدا. ءالى تولىق زەرتتەلمەگەندىكتەن, وڭالتۋ شارالارى دا ناۋقاستاردىڭ بارىنە بىردەي كەلە بەرمەيدى. ءار ناۋقاستىڭ دەنساۋلىعىن ەسكەرىپ, جەكە قاراۋعا تۋرا كەلەدى. ءبىز ەپيدەميا كەزىندە وتە قيىن جاعدايدا ءومىر ءسۇرىپ جاتىرمىز. سوندىقتان بارىنشا بوساڭسىماي, ءوزىمىزدى جانە جاقىندارىمىزدى قورعاۋىمىز قاجەت. بۇل ءۇشىن تازا اۋادا كوبىرەك بولىپ, دەنە جاتتىعۋلارىن جاساپ, ۇنەمى ماسكا تاعىپ, ساقتانىپ جۇرگەنىمىز ءجون», دەدى وبلىس باسشىسى.
ۆاكتسينانىڭ ەكىنشى كومپونەنتىن الا الماي جۇرگەن تۇرعىندار شاعىمى دا وبلىس باسشىسىنىڭ نازارىنان تىس قالمادى. بۇل ماسەلەنى كەزەك كۇتتىرمەي, شۇعىل شەشۋ وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ا.قاليبەكوۆكە تاپسىرىلدى.
باتىس قازاقستان وبلىسى
