فۋتبولدان ەۋروپا چەمپيوناتىنىڭ توپتىق كەزەڭى قىزىپ كەلەدى. شيرەك فينال جاقىنداعان سايىن جۇيرىكتەر شيرىعا تۇسكەن. ازىرگە ەل كۇتپەگەن اناۋ ايتارلىق سەنساتسيا بولا قويعان جوق.
20 ماۋسىم كۇنى توپتىق كەزەڭنىڭ ءۇشىنشى تۋرى باستالدى. ا توبىنىڭ كوماندالارى ريم مەن باكۋدە توقايلاستى. وسى توپتىڭ عانا ەمەس, ءتۋرنيردىڭ انىق فاۆوريتىنە اينالعان يتاليا اسا تارتىستى وتكەن كەزدەسۋدە ۋەلستەن باسىم ءتۇسىپ, تولىق 9 ۇپاي جيدى. تورەشى ىسقىرا سالىسىمەن ۋەلس قاقپاسىن تورۋىلداۋمەن بولعان مانچيني شاكىرتتەرى اقىرى 39 مينۋتتا قاقپا كىلتىن تاپتى. ماتتەو پەسسينا ەسەپ اشىپ, كومانداسىن العا شىعاردى. 2-ءشى تايمدا دا يتاليالىقتار قارقىندى ويىن ورنەگىن كورسەتتى. 55 مينۋتا يتان امپادۋ دورەكى ويىنى ءۇشىن قىزىل قاعاز الىپ, الاڭنان كەتتى. ون ويىنشىمەن ويناۋ ۋەلسكە ءتىپتى قيىنعا سوقتى. سوعان قاراماستان كەزدەسۋ سوڭىنا دەيىن ەسەپ وزگەرىسسىز كۇيىندە قالدى.
ال باكۋ ستاديونىندا ماڭىزدى جولداماعا تالاسقان شۆەيتساريا مەن تۇركيا ماتچى الدىڭعى قۇرامانىڭ جەڭىسىمەن اياقتالدى. ەسەپ – 3:1. التىنشى مينۋتتا حاريس سەفەروۆيچ گول سوعىپ, كومانداسىنا باسىمدىق سىيلاعان. 1:0 ەسەبىنىڭ قاشاندا سۋسىمالى ناتيجە ەكەنى بەلگىلى. وسىنى ەسكەرگەن شۆەيتساريالىقتار بەلسەندى شابۋىلدارىن ءارى قاراي جالعاستىرا ءتۇستى. ونىڭ ناتيجەسى دە كوپ كۇتتىرگەن جوق. دجەردان شاكيري 26 مينۋتتا ەسەپتى ەسەلەپ كەتتى. كوماندالار وسى ەسەپپەن ۇزىلىسكە شىققان. ال 62 مينۋتتا يرفان كاحفەدجي بۇل ويىنداعى عانا ەمەس, تۇرىكتەردىڭ وسى تۋرنيردەگى جالعىز گولىن سوقتى. ءسويتىپ, ەسەپ ايىرماسىن قىسقارتتى. الايدا كاحۆەدجي گولى تۇركيا قۇراماسىنا سەرپىلىس سىيلاي المادى. 68 مينۋتتا شاكيري تۋرنيردەگى ەكىنشى گولىن سوعىپ, بۇل كەزدەسۋدەگى دۋبل اۆتورى اتاندى.
ال توپتاعى ەكىنشى ورىنعا ۋەلس قۇراماسى يە بولدى. نەگىزى شۆەيتساريا ەكەۋىنىڭ ۇپايى تەڭ. بىراق دوپ ايىرماشىلىعى روب پەيدج كومانداسىنىڭ پايداسىنا جۇمىس ىستەدى. ال يتاليانىڭ ەكىنشى تۋردا-اق پلەي-وفف كەزەڭىنە شىعىپ قويعانىن بىلەمىز.
شەنول گيۋنەش جاتتىقتىراتىن تۇركيا قۇراماسى ەۋروپا چەمپيوناتىندا ءبىر عانا گول سوعىپ, ەشقانداي ۇپاي جيناي الماي ەلىنە قايتاتىن بولدى. شۆەيتساريا قۇراماسىنىڭ 1/8 فينالدان ءالى دە بولسا ءۇمىتى بار. ويتكەنى ءۇشىنشى ورىن العان 8 ۇجىم جيعان ۇپاي مەن قوسىمشا كورسەتكىشتەرىنە بايلانىستى پلەي-وفف كەزەڭىنە شىعا الادى.
