ونەر • 20 ماۋسىم، 2021

«استانا كەشتەرى» ح حالىقارالىق ونەر فەستيۆالىنىڭ گالا-كونتسەرتى مەديتسينا قىزمەتكەرلەرىنە ارنالدى

35 رەت كورسەتىلدى

«MuzVac - ۇزدىك مۋزىكالىق ۆاكتسينا!» اتاۋىمەن وتكەن «استانا كەشتەرى» ح حالىقارالىق ونەر فەستيۆالى ۇلكەن گالا-كونتسەرتپەن اياقتالدى. بۇل اۋقىمدى ءىس-شارا حالىق دەنساۋلىعىن قورعاپ، كوروناۆيرۋسپەن كۇرەستە الدىڭعى شەپتەن كورىنگەن مەديتسينا قىزمەتكەرلەرىنە شىنايى العىس ايتۋ ماقساتىندا ۇيىمداستىرىلدى، دەپ حابارلايدى Egemen.kz.

نۇر-سۇلتان قالاسى ەمحانالارىنىڭ قىزمەتكەرلەرى كونتسەرتتىڭ باستى قوناقتارى بولىپ، الەمگە بەلگىلى ارتىستەردىڭ ونەرىن تەگىن تاماشالاي الدى. فەستيۆالدىڭ ۇيىمداستىرۋشىلارى ولارعا كومەك رەتىندە MuzVac دەپ اتالاتىن وزدەرىنىڭ جاڭا مۋزىكالىق ۆاكتسيناسىن ويلاپ تاپتى. بۇل – ۆيرۋستى جەڭۋ ءۇشىن يممۋنيتەتتى نىعايتۋدىڭ، كوتەرىڭكى كوڭىل-كۇي سىيلاۋدىڭ ءتيىمدى قۇرالى. مۋزىكالىق ۆاكتسينانىڭ قۇرامىنا ساحنا مايتالماندارى شىرقاعان كلاسسيكالىق ونەردىڭ جاۋھارلارى ەندى.

كورەرمەن قاۋىم بۇل كەشتە يتاليا مەن شۆەتسيانىڭ تانىمال جۇلدىزدارى – انتونەللو كاروتستسا، ريككاردو بەرتوتستسيني، ميا ستەگمار - دجەنني تارنەبەرگتىڭ ونەرىن تاماشالادى. بۇعان قوسا، وزدەرىنىڭ ورىنداۋشىلىق شەبەرلىگىن بەلگىلى وتاندىق ارتىستەر ەرلان رىسقالي مەن الفيا كاريموۆا، «استانا وپەرا» تەاترىنىڭ سيمفونيالىق وركەسترى مەن نۇر-سۇلتان قالاسى فيلارمونياسىنىڭ كامەرالىق حورى پاش ەتتى. ديريجەرلىك تۇعىردى يتاليادان كەلگەن ماەسترو، الەمنىڭ ۇزدىك وركەسترلەرىمەن جۇمىس ىستەگەن روبەرتو مولينەللي باسقاردى. ديريجەر ءوز سوزىندە پاندەميا كەزىندە قايسارلىق تانىقتان دارىگەرلەرگە العىسىن ءبىلدىرىپ، فەستيۆالدىڭ ىزگى ماقساتتارىن ءبولىسۋ ءۇشىن بۇل ءىس-شاراعا بارلىق ارتىستەردىڭ زور قۋانىشپەن كەلگەندەرىن جەتكىزدى.

كونتسەرتتىك باعدارلاما الەمدەگى سان مىڭ تىڭدارمانعا جاعىمدى اسەر سىيلاعان حح عاسىردىڭ ۇزدىك تۋىندىلارىنان قۇرىلدى. اتاپ ايتقاندا، «اۆۆا» جانە «Queen» توپتارىنىڭ اتاقتى اندەرى، «پروفەسسيونال»، «ز ۇلىم، جامان، جاقسى»، «ميسسيا» سىندى ايگىلى كينوفيلمدەرگە جازىلعان ەننيو مورريكونەنىڭ مۋزىكاسى. ءتىپتى ارنايى وسى كونتسەرت ءۇشىن يتالياندىق كومپوزيتور ەننيو مورريكونەنىڭ ۇلى ءوزىنىڭ بەينەقۇتتىقتاۋىن جولدادى. ول ءوز ونەرىمەن ادامداردىڭ جان دۇنيەسىن ساۋىقتىرۋعا جانە جاقسىلىق جاساۋعا ۇمتىلعان مورريكونەنىڭ مۋزىكاسى «دەگدار» قورىنىڭ قايىرىمدىلىق قىزمەتىمەن ۇندەس ەكەنىن اتاپ ءوتتى.

تىڭدارمان قاۋىم «استانا كەشتەرى» فەستيۆالىنىڭ قورىتىندى كونتسەرتىنە جوعارى باعا بەردى. زالداعى كورەرمەننىڭ ىستىق ىقىلاسى مەن زور قوشەمەتى سوعان دالەل بولدى.

«بۇگىنگى ەرەكشە كونتسەرت شىنىمەن دە ءوز اتاۋىنا سايكەس بولدى. ءبىز الەمدەگى ۇزدىك ۆاكتسينا – مۋزىكالىق ۆاكتسينانىڭ كوپ مولشەرىن زور ىقىلاسپەن قابىلدادىق. ءار كومپوزيتسيا ءبىز ءۇشىن سىيلىق سياقتى بولدى. وسى كەشتە شىرقالعان كەرەمەت مۋزىكانى ءبىز ۇزاق ۋاقىت جادىمىزدا ساقتايمىز» - سىندى پىكىرلەر ارقىلى كورەرمەندەر ءوز لەبىزدەرىن جەتكىزدى.

فەستيۆالدىڭ ۇيىمداستىرۋشىلارى – «دەگدار» گۋمانيتارلىق قورى، نۇر-سۇلتان قالاسىنىڭ اكىمدىگى، JTI كومپانياسى. ۇيىمداستىرۋشىلاردىڭ ءباسپاسوز قىزمەتى مالىمدەگەندەي، فەستيۆال «MuzVac - ۇزدىك مۋزىكالىق ۆاكتسينا!» ۇرانىن ارقاۋ ەتىپ، ەلوردا كۇنىن مەرەكەلەۋ اياسىندا وتكىزىلدى. قايىرىمدىلىق جوبا ەلوردالىق كورەرمەنگە 3 كونتسەرت ۇسىندى.

جالپى، «استانا كەشتەرى» ونەر فەستيۆالى داريعا نازارباەۆانىڭ باستاماسىمەن جاس ەلوردامىزعا دەگەن زور سۇيىسپەنشىلىكتىڭ بەلگىسى رەتىندە دۇنيەگە كەلگەنى بەلگىلى. بۇل فەستيۆال مۋزىكالىق ونەردىڭ سان ءتۇرلى جانرلارىن بىرىكتىرەتىن ەرەكشە  كونتسەپتسيانىڭ ارقاسىندا ەلىمىزدىڭ مادەني ومىرىندەگى يگى داستۇرگە اينالدى.

فەستيۆالدىڭ سەرىكتەستەرى – قر مادەنيەت جانە سپورت مينيسترلىگى، «قازاقكونتسەرت» مەملەكەتتىك كونتسەرتتىك ۇيىمى، «استانا وپەرا» تەاترى، «حابار» اگەنتتىگى.

 

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار