«ەكى مەملەكەتتىڭ اراسىنداعى شەكارانى انىقتاۋدا بىرنەشە پروتسەدۋرا جۇزەگە اسىرىلادى. كەزىندە دەماركاتسيا ءوتتى, بىراق دەليميتاتسيا تولىق اياقتالماعان. وسىعان قاراماستان بيىل مەملەكەت باسشىسىنىڭ تاپسىرماسىمەن ۇكىمەت, سىرتقى ىستەر مينيسترلىگى, وبلىستىق اكىمشىلىك, اۋداندىق اكىمشىلىك, بارلىعى بىرىگىپ, وتە ۇلكەن كەشەندى جۇمىس اتقاردى. ناتيجەسىندە, بۇرىنعى شەشىلمەي تۇرعان 740 گا جەر وبلىس اۋماعىنا قوسىلدى», دەدى وبلىس اكىمى.
ءو.شوكەەۆ بۇل ماسەلە ۇكىمەتتىك دەڭگەيدە شەشىلگەنىن اتاپ ءوتتى. ەكى ەل اراسىندا ءتيىستى حاتتاما جاسالدى, ودان كەيىن ۇكىمەتتىڭ قاۋلىسى شىقتى. قازىرگى كەزدە اۋدان ەلدى مەكەندەگى جەردى پايدالانۋ ءتارتىبىن ورناتۋدا, ياعني جەرگىلىكتى تۇرعىنداردىڭ بارلىق ماسەلەسى شەشىلەدى. بارىنە ءوز جەرىنە ءتيىستى قۇجاتتار بەرىلەدى. سونىمەن قاتار, شىلدە ايىندا ەكى ەلدى مەكەن دە تولىققاندى گازبەن قامتاماسىز ەتىلەدى.
