فۋتبول • 18 ماۋسىم، 2021

EURO-2020: شۆەتسيا العاشقى جەڭىسىنە قول جەتكىزدى

219 رەت كورسەتىلدى

فۋتبولدان ەۋروپا چەمپيوناتىنىڭ توپتىق كەزەڭدەگى ەكىنشى تۋر ويىندارى جالعاسۋدا، دەپ حابارلايدى Egemen.kz.

بۇگىن ە توبى توبىنىڭ ۇزدىكتەرى – شۆەتسيا جانە سلوۆاكيا قۇرامالارى كەزدەسىپ، ماتچ سكانديناۆيالىقتاردىڭ جەڭىسىمەن اياقتالدى.

سانكت-پەتەربۋرگتە (رەسەي) «گازپروم ارەنادا» وتكەن كەزدەسۋدىڭ ءبىرىنشى تايمىندا جانكۇيەرلەر گول كورە المادى. دەگەنمەن، العاشقى 45 مينۋتتا سلوۆاكيا فۋتبولشىلارى بەلسەندى بولدى. بىراق مارەك گامشيك باستاعان ۇجىمعا بۇگىنگى ويىندا گول سوعۋ باقىتى بۇيىرمادى.

ۇزىلىستەن كەيىن شۆەتسيا قۇراماسى ماتچتى وتە قارقىندى باستادى. ەكىنشى تايم باستالا سالا العا ۇمتىلعان سكانديناۆيالىقتار ماتچتىڭ 77-مينۋتىندا ءوز دەگەندەرىنە جەتتى. كەزەكتى ءبىر شابۋىل كەزىندە سلوۆاكيا قاقپاشىسى مارتين دۋبروۆكا ءوز الاڭىندا شۆەتسيا فۋتبولشىسىنا قارسى ويىن ەرەجەسىن بۇزىپ، تورەشى 11 مەترلىك ايىپ دوبىن بەلگىلەدى. ال ءوز كەزەگىندە ەميل فورسبەرگ پەنالتيدەن ءمۇلت كەتكەن جوق. ەسەپ – 1:0.

سلوۆاكيا فۋتبولشىلارى گول وتكىزىپ العاننان كەيىن ويىن تىزگىنىن ءوز قولدارىنا الىپ، ەسەپتى تەڭەستىرۋگە قانشا تىرىسقانىمەن شۆەتسيا قورعاۋشىلارى مەن قاقپاشىسى قىراعىلىق تانىتىپ، قارسىلاستارىنا ەش مۇمكىندىك بەرگەن جوق. وسىلايشا شۆەتسيا قۇراماسى ەۋروپا چەمپيوناتىنداعى العاشقى جەڭىسىنە قول جەتكىزدى. ولار وتكەن تۋردا يسپانيا قۇراماسىمەن تەڭ تۇسكەن ەدى.

ە توبىنىڭ تۋرنير كەستەسىندە شۆەتسيا 4 ۇپايمەن كوش باستادى. ال ءۇش ۇپايى بار سلوۆاكيا ازىرشە ەكىنشى ورىندا تۇر.

سوڭعى جاڭالىقتار

ۇقساس جاڭالىقتار