ەكولوگيا • 18 ماۋسىم، 2021

ارالدا توتەنشە جاعداي جاريالانادى

4221 رەت كورسەتىلدى

قىزىلوردا وبلىسىنىڭ ارال اۋدانىندا قاتتى ىستىق پەن جاۋىن-شاشىن مولشەرىنىڭ از بولۋىنا بايلانىستى قۋاڭشىلىق جاعداي ورىن الدى. وڭىردە توتەنشە جاعداي رەجيمىن جاريالاۋ جوسپارلانىپ وتىر، دەپ حابارلايدى Egemen.kz.

«قىزىلوردا وبلىسىنىڭ اكىمى گۇلشارا ابدىحالىقوۆانىڭ تاپسىرماسىنا سايكەس، قازىرگى تاڭدا ارال اۋدانىندا توتەنشە جاعداي جاريالاۋعا بايلانىستى قۇجاتتار دايىندالىپ جاتىر. وسى رەجيمنىڭ ەنگىزىلۋىن نەگىزدەۋ ءۇشىن قاجەت كەيبىر زەرتتەۋلەردى اياقتاۋ عانا قالادى»، دەدى ارال اۋدانى اكىمىنىڭ ورىنباسارى ەركىن ابىشەۆ.

ابىشەۆتىڭ ايتۋىنشا، ارال اۋدانىنىڭ كەيبىر ەلدىمەكەندەرى قۇرعاقشىلىقتان زارداپ شەككەن.

«ماماندار ءشوپتىڭ بيىلعى شىعىمدىلىعىنا قاتىستى اۋداندى شارتتى تۇردە ءۇش ساناتقا ءبولدى. ياعني، قىزىل، جاسىل، سارى. قىزىل ايماققا 13 ەلدى مەكەن ەندى. ويتكەنى، جايىلىمدىق جەرلەرى 90 پروتسەنتكە قۇرعاپ كەتكەن. ال سارى ايماقتاعى ەلدى مەكەندەردە 30-40 پروتسەنتتى قۇرايتىن ءشوپ بار. جاسىل تۇسپەن بەلگىلەنگەن ەلدى مەكەندەردە ءشوپتىڭ شىعىمدىلىعى جاقسى»، دەدى ەركىن ابىشەۆ.

گۇلشارا ابدىقالىقوۆانىڭ تىكەلەي نۇسقاۋى بويىنشا مال ازىعى اۋدان شارۋاشىلىقتارىنا جەتكىزىلىپ جاتىر.

«وڭىرگە 51880 جوڭىشقا جانە 2000 قاپ جەم جەتكىزىلدى»، دەپ ءتۇسىندىردى ارال اۋدانى اكىمىنىڭ ورىنباسارى.

سونىمەن قاتار ارال اۋدانىندا 5 ماۋسىم كۇنى جەم-ءشوپ جارمەڭكەسى ۇيىمداستىرىلدى. 20 توننا كۇرىش جەمى مەن 207 توننا جوڭىشقا قويىلدى. وبلىسقا باسقا وڭىرلەردەن بيداي مەن ارپا جەتكىزۋگە ءوتىنىم بەرىلدى.

قازىر ارال اۋدانىندا ەسكى 15 سۋ قۇدىعى تازارتىلۋدا. ولاردى قالپىنا كەلتىرۋ جايىلىمدارداعى جاعدايدى جاقسارتۋعا كومەكتەسەدى. 

سوڭعى جاڭالىقتار

ۇقساس جاڭالىقتار