پرەزيدەنت • 18 ماۋسىم، 2021

مەملەكەت باسشىسى «التىن جۇرەك» ەسكەرتكىشىنىڭ اشىلۋ راسىمىنە قاتىستى

25 رەت كورسەتىلدى

قاسىم-جومارت توقاەۆ «التىن جۇرەك» ەسكەرتكىشىنىڭ اشىلۋ راسىمىنە قاتىستى، دەپ حابارلايدى Egemen.kz.

مەملەكەت باسشىسى كوروناۆيرۋس ىندەتىنە قارسى كۇرەسكە زور ۇلەس قوسقان مەديتسينا قىزمەتكەرلەرىنە ارناپ تۇرعىزىلعان «التىن جۇرەك» ەسكەرتكىشىنىڭ اشىلۋ راسىمىنە قاتىستى.

ەسكەرتكىش ەلوردانىڭ سول جاعالاۋىندا الماتى مەن اقمەشىت كوشەلەرىنىڭ قيىلىسىنداعى جاڭا ساياباقتىڭ اۋماعىندا ورنالاسقان. پرەزيدەنت سالتاناتتى لەنتانى قيىپ، ەسكەرتكىشكە گۇل شوعىن قويدى. سودان كەيىن اشىلۋ راسىمىنە جينالعان مەديتسينا قىزمەتكەرلەرىنىڭ الدىندا ءسوز سويلەدى.

قاسىم-جومارت توقاەۆ ءوز سوزىندە «التىن جۇرەك» ەسكەرتكىشىنىڭ اشىلۋى اسا قاۋىپتى ىندەتپەن بەتپە-بەت كەلگەن وتانداستارىمىزدىڭ ىنتىماعى مەن بىرلىگىن كورسەتەتىنىن اتاپ ءوتتى. مەملەكەت باسشىسى دارىگەرلەرگە ارناپ ەسكەرتكىش ورناتۋ تۋرالى تاپسىرمانى بىلتىر ء«بىز بىرگەمىز» جالپىۇلتتىق ونلاين-فورۋمىندا بەرگەن ەدى.

«بۇل – جاھاندىق دەرتكە قارسى كۇرەسكەن وتانداستارىمىزعا دەگەن ەل قۇرمەتىنىڭ بەلگىسى. سونداي-اق حالىقتىڭ ادال پەرزەنتتەرىنە ىستىق ىقىلاسىنىڭ كورىنىسى. ەسكەرتكىش ەل باسىنا قيىندىق تۋعان ساتتە قاھارماندىق كورسەتكەن جانداردىڭ رۋحىنا تاعزىم ەتۋ ورنىنا اينالادى»، دەدى پرەزيدەنت.

مەملەكەت باسشىسى دەنساۋلىق ساقتاۋ سالاسىندا جۇمىس ىستەيتىن 10 مىڭعا جۋىق قىزمەتكەر كوروناۆيرۋس جۇقتىرىپ، ونىڭ 200-دەن استامى قايتىس بولعانىن جەتكىزدى.

بىلتىر قازاقستان پرەزيدەنتىنىڭ جارلىعىمەن «حالىق العىسى» مەدالى بەكىتىلىپ، پاندەمياعا قارسى كۇرەستە العى شەپتە بولعان كوپتەگەن وتانداسىمىز ماراپاتتالدى. پرەزيدەنتتىڭ ايتۋىنشا، بۇل ولاردىڭ قاجىرلى ەڭبەگى مەن ەرەن ەرلىگىنە دەگەن حالىقتىڭ ىستىق ىقىلاسىنىڭ بەلگىسى. ماراپاتقا يە بولعان ازاماتتاردىڭ كوپشىلىگى دەنساۋلىق ساقتاۋ سالاسىنىڭ قىزمەتكەرلەرى.

قاسىم-جومارت توقاەۆ پاندەميا كەزىندە مەملەكەت تاراپىنان دارىگەرلەر مەن جالپى مەديتسينا قىزمەتكەرلەرىن قولداۋعا باعىتتالعان ىنتالاندىرۋ شارالارى توپتاماسى قابىلدانعانىن ايتتى.

«كوروناۆيرۋسپەن كۇرەسكە اتسالىسقان دارىگەرلەرگە تولەنەتىن تەك ۇستەمەاقى مەن ساقتاندىرۋ جاردەماقىلارى ءۇشىن 180 ميلليارد تەڭگەگە جۋىق قارجى ءبولىندى. ۇكىمەت بيىلعى قازان ايىنا دەيىن تولەماقى بەرۋدى جالعاستىرۋ ءۇشىن وسى ماقساتقا قوسىمشا 71،5 ميلليارد تەڭگە بولەدى. ءبىز دارىگەرلەردىڭ ەڭبەكاقىسىن كەزەڭ-كەزەڭىمەن ارتتىرۋدى باستادىق. بۇل ءۇردىس جالعاسا بەرەدى»، دەدى مەملەكەت باسشىسى.

پرەزيدەنت ءوز سوزىندە مەديتسينا قىزمەتكەرلەرىن الەۋمەتتىك تۇرعىدان قورعاۋدىڭ ءتيىمدى جۇيەسىن قۇرۋ ماڭىزدىلىعىنا نازار اۋداردى.

«بۇل جۇيەدە اۋىلدىق جەرگە كەلگەن ماماندارعا مىندەتتى تۇردە تۇرعىن ءۇي بەرۋ، بىرجولعى جاردەماقى تولەۋ جانە باسقا دا جەڭىلدىكتەر قامتىلعان. مۇنداي شارالار وبلىستار مەن قالالار اكىمدەرىنىڭ بەلسەندى اتسالىسۋىمەن ەلىمىزدىڭ بارلىق وڭىرىندە قابىلدانۋعا ءتيىس»، دەدى قاسىم-جومارت توقاەۆ.

سونىمەن قاتار پرەزيدەنت تەك قارجىلاي ىنتالاندىرۋدىڭ جەتكىلىكسىز ەكەنىن ايتتى.

«مەديتسينا قىزمەتكەرلەرىنىڭ مورالدىق جانە زاڭدىق جاۋاپكەرشىلىگى ارتىپ كەلەدى. ازاماتتار تاراپىنان قويىلاتىن تالاپ تا جوعارى. كوپتەگەن مامان قىسىمعا شىداماي، كاسىبي تۇرعىدان قاجىپ، دەنساۋلىق ساقتاۋ سالاسىنان باس تارتۋدا. وكىنىشكە قاراي، بۇل الاڭداتارلىق جاعداي. اتالعان ءۇردىس ەلىمىزدە عانا ورىن الىپ وتىرعان جوق. سونداي-اق بۇكىل الەمدە بەس ميلليوننان استام دارىگەر جەتىسپەيدى. وسى ورايدا مەديتسينا قىزمەتكەرلەرىنىڭ قۇقىقتىق جانە الەۋمەتتىك تۇرعىدان قورعالۋىن بىرتىندەپ كۇشەيتۋ قاجەت. مەنىڭ تاپسىرمام بويىنشا جىل سوڭىنا دەيىن مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ جۇيەسى ىسكە قوسىلادى»،  دەدى مەملەكەت باسشىسى.

پرەزيدەنت مەديتسينا قىزمەتكەرلەرىنىڭ قوعامداعى مارتەبەسىن ارتتىرۋ ءۇشىن «قازاقستان رەسپۋبليكاسىنىڭ ەڭبەك سىڭىرگەن دارىگەرى» اتاعىن ەنگىزۋدى ۇسىندى. اتاقپەن بىرگە ماتەريالدىق سىياقى دا بەرىلەدى. ونىڭ كولەمىن ۇكىمەت بەلگىلەيدى.

قاسىم-جومارت توقاەۆ دەنساۋلىق ساقتاۋ جۇيەسىندە قىزمەت ەتۋ وسكەلەڭ ۇرپاق ءۇشىن مارتەبەلى ءارى تارتىمدى بولۋى ءتيىس دەپ سانايدى.

سونىمەن قاتار پرەزيدەنت ورتا دەڭگەيدەگى مەديتسينا قىزمەتكەرلەرىنە قولداۋ كورسەتۋ ماسەلەسىنە توقتالدى. ونىڭ پىكىرىنشە، ولار دەنساۋلىق ساقتاۋ جۇيەسىنىڭ باستى رەسۋرسى جانە جۇمىستىڭ نەگىزگى بولىگىن اتقارادى. 

«بىزگە مەيىرگەرلەردىڭ جاڭا بۋىنىن قالىپتاستىرۋ قاجەت. ولار تەك ورىنداۋشىلار عانا ەمەس، كوپ سالالى ەمدەۋ توبىنىڭ جاۋاپكەرشىلىك جۇكتەلگەن تەڭ قۇقىقتىق مۇشەلەرى بولۋى ءتيىس. وسى ورايدا ولاردىڭ كاسىبي دايىندىعىنىڭ دەڭگەيىن بىرتىندەپ كوتەرىپ، مەيىرگەرلىك ءىسىنىڭ مارتەبەسىن ارتتىرۋ قاجەت»، دەدى مەملەكەت باسشىسى.

پرەزيدەنت ءوز سوزىندە ەلباسىنىڭ باستاماسىمەن ىسكە اسىرىلعان ء«بىز بىرگەمىز» اكتسياسى اياسىندا پاندەمياعا قارسى كۇرەسكە زور ۇلەس قوسقان ەرىكتىلەر مەن مەتسەناتتاردىڭ قىزمەتىن اتاپ ءوتتى.

قاسىم-جومارت توقاەۆ بارشا مەديتسينا قىزمەتكەرلەرىن كاسىبي مەرەكەسىمەن قۇتتىقتاپ، «التىن جۇرەك» ەسكەرتكىشى ورنالاسقان ساياباقتى «دارىگەرلەر اللەياسى» دەپ اتاۋدى ۇسىندى. مەملەكەت باسشىسى جاڭادان اشىلعان كەشەن اق حالاتتى ابزال جاندارعا دەگەن حالىق العىسىنىڭ بەلگىسى بولاتىنىنا سەنىم ءبىلدىردى.

جيىن سوڭىندا مەملەكەت باسشىسى مەديتسينا قىزمەتكەرلەرىمەن اڭگىمەلەستى. دارىگەرلەر كورسەتىلىپ جاتقان قولداۋعا العىس ايتتى.

سوڭعى جاڭالىقتار

ۇقساس جاڭالىقتار