ءبىرىنشى. جەكە سەكتوردى گازداندىرۋ
قالادا گازداندىرۋ جۇمىستارى جالعاسۋدا. وتكەن جىلىتۋ ماۋسىمىندا (2020-2021 ج) تەمىرجولشىلار, كوكتال-2 اۋداندارىنىڭ تۇرعىندارى, سول سياقتى اگروقالاشىقتىڭ ءبىر بولىگى گازعا قوسىلدى. وتكەن جىلى ەلوردانىڭ تۇرعىن ءۇي الاپتارىندا 345 كم گاز تاراتۋ جەلىلەرى سالىندى. بيىل تاعى 317 كم جەلى سالۋ جوسپارلانىپ وتىر, ونىڭ 170 شاقىرىمى 2021 جىلدىڭ ءبىرىنشى جارتىجىلدىعىندا سالىندى.
جاڭا جىلىتۋ ماۋسىمىندا ەلوردانىڭ تاعى 7 تۇرعىن الابىنىڭ تۇرعىندارى گازعا قوسىلا الادى.
قالانى گازداندىرۋ ەكولوگيانى ايتارلىقتاي جاقسارتادى. سونداي-اق, جەو-1 جانە جەو-2-ءنىڭ بىرقاتار سۋ جىلىتۋ قازاندىعى گازعا اۋىستىرىلدى. قالعان قازاندىقتار بيىل گازعا كوشىرىلەدى.
ەكىنشى. جاپپاي كوگالداندىرۋ
جىل سايىن قالادا جاسىل ايماقتار, ساياباق اۋماعى جانە ت.ب. كوبەيىپ كەلەدى. بيىلدىڭ وزىندە 1 ملن-عا جۋىق جاسىل جەلەك (اعاشتار, بۇتالار جانە ت.ب.) وتىرعىزىلادى. سونىڭ ىشىندە قالاعا تازا اۋا بەرىپ وتىرعان ەلوردانىڭ «جاسىل بەلدەۋىندە» جۇمىستار جۇرگىزىلۋدە.
ءۇشىنشى. ەكولوگيالىق تازا كولىك تۇرلەرىن ەنگىزۋ
اتموسفەراعا شىعاتىن زياندى زاتتاردى ازايتۋ ءۇشىن قالا اكىمدىگى 100 ەلەكتر اۆتوبۋسىن قولدانىسقا ەنگىزدى. بۇل ەلەكتر اۆتوبۋستارىنىڭ ارتىقشىلىعى – قورشاعان ورتاعا زياندى قالدىقتار شىعارمايدى. وسىنداي ەكولوگيالىق اۆتوبۋستاردىڭ سانىن جوسپارلى تۇردە ارتتىرۋ ءۇشىن قالادا ەلەكتر اۆتوبۋستارى بار زاماناۋي پاركتىڭ قۇرىلىسى ءجۇرىپ جاتىر.
ءتورتىنشى. قوقىس وڭدەۋ زاۋىتىن جاڭعىرتۋ
بيىلدىڭ وزىندە «سولتۇستىك جوتا» كارەرىن ودان ءارى قالپىنا كەلتىرە وتىرىپ, قۇرىلىس قالدىقتارىن قايتا وڭدەۋ الاڭى ىسكە قوسىلادى. وندا قۇرىلىس قالدىقتارىن قايتا وڭدەيتىن ۇنتاقتاۋ كەشەنى قاراستىرىلعان, بۇل قالدىقتاردى كادەگە جاراتۋ پروتسەسىن دە جەڭىلدەتەدى.
بۇدان باسقا, قوقىس وڭدەۋ زاۋىتىن جاڭعىرتۋ جالعاساتىن بولادى. سونداي-اق قاتتى تۇرمىستىق قالدىقتاردى جەكە جيناۋ, رۇقسات ەتىلمەگەن قوقىس ۇيىندىلەرىنىڭ پايدا بولۋىنا جول بەرمەۋ, ەكولوگيالىق سەنبىلىكتەر جانە ت.ب. بويىنشا جۇمىستار جۇرگىزىلۋدە.
بۇل شارالاردىڭ ءبارى جالعاساتىن بولادى. دەگەنمەن ەكولوگيانىڭ جاقسارۋىنا جالپى ۇلەس ادامنىڭ مادەنيەتى مەن تابيعاتقا دەگەن جەكە كوزقاراسىنا بايلانىستى.
