زايىبى امانقىز دا وتاعاسىن قولداپ, ويسىلقارانىڭ كوبەيگەنىن قالايدى. سوڭعى جىلدارى جۇمىستى ۇيلەستىرۋ جاۋاپكەرشىلىگىن وزىنە العان. جانتاق, شەڭگەل, قاراسورا, الابوتا باردا تۇيە اش قالماس. دەگەنمەن شاعىن شارۋا قوجالىعى مال ازىعىن دايىنداۋ ماقساتىندا جايىلىمدىق, سۋارمالى جەر اۋماعىن ۇلعايتادى. بۇگىندە شارۋا قوجالىعى مەملەكەتتىك قولداۋدىڭ ناتيجەسىندە مال سانىن كوبەيتىپ وتىر. شارۋا كوبەيىپ بارا جاتسا, مەحانيزاتور, باقتاشى, ساۋىنشىنى ناۋقاندىق جۇمىسقا قابىلدايدى. مال ازىعىن دايىنداۋعا قاجەت «متز-80» تراكتورىن نەسيەگە العان.
ءيا, بۇل ولكەدە تاڭمەن تالاسا تۇرىپ, ۋاقىتپەن ساناسپاي ەڭبەك ەتۋدەن ەشقاشان ەرىنبەيتىن جاندار كوپ. وتكەن عاسىردىڭ توقسانىنشى جىلدارىنان بەرى ويسىلقارا ت ۇلىگىن باعىپ-كۇتىپ, وسى ءىستىڭ ۇدەسىنەن شىعۋ جولىندا ايانباي جۇمىس ىستەگەن سوۆەت ەرجانوۆ وتباسىمەن ەڭبەكقور. جەتى ۇل مەن ءۇش قىزدى جارىق دۇنيەگە اكەلگەن كوپبالالى «باتىر انا» امانقىز تاسبولاتقىزى توراعالىق ەتەتىن «عاني» شارۋا قوجالىعى بۇگىندە كوپكە ۇلگى. ۇزاق جىلدار بويى اۋىل شارۋاشىلىعى سالاسىندا اگرونوم قىزمەتىن ادال دا جەمىستى اتقارىپ, زەينەتكەرلىك دەمالىسقا شىققان وتاعاسى سوۆەت امانقىز انانىڭ ءاربىر يگى ىسىنە قولداۋ كورسەتىپ ءجۇر.
ومىردەن كوكەيىنە تۇيگەن پايدالى اقىل-كەڭەستەرىمەن ءىستىڭ ىلگەرى جىلجۋىنا قوسقان ۇلەسى زور. وسىنداي ونەگەلى اتا-انادان ادەپتى ءتالىم-تاربيە العان پەرزەنتتەرى دە شەتتەرىنەن ەڭبەكسۇيگىش, ىسكە بەيىم بولىپ ءوستى. ادال ەڭبەكپەن وتباسىن اسىراپ, ءناسىبىن تاۋىپ جۇرگەن ازاماتتار قوعامعا قاي كەزدە دە ۇلگى.
تۇڭعىش نەمەرەلەرى ابدىقاسىم ۇلى عانيدىڭ اتىنان اشىلعان قوجالىقتا قازىر 101 تۇيە بار. 65 تۇيەسى بار قوجالىق اۋىل شارۋاشىلىعىن قارجىلاي قولداۋ قورىنان 10 جىلعا 30 ميلليون تەڭگە جەڭىلدەتىلگەن نەسيە العان. ول قارجىعا 850 مىڭ تەڭگەدەن 36 تۇيە ساتىپ الىپتى.
«بۇگىندە ەڭبەك ەتۋگە نيەتتى جاندارعا بارلىق جاعداي جاسالعان. قوردان العان قارجى بىزگە ۇلكەن كومەك بولدى. مال باسىن وسىرۋگە العان نەسيەمىز 16 پايىزبەن بەرىلدى, ونىڭ 10 پايىزىن مەملەكەت سۋبسيديالايدى. سوندا ءبىز نەسيەنى 6 پايىزبەن عانا تولەيمىز. بۇل – مەملەكەتتىڭ شارۋالارعا كورسەتىپ وتىرعان قولداۋى», دەيدى امانقىز تاسبولاتقىزى.
«بايتەرەك» ۇلتتىق باسقارۋشى حولدينگىنىڭ قۇرامىنا كىرەتىن اۋىل شارۋاشىلىعىن قارجىلاي قولداۋ قورى جەڭىلدەتىلگەن نەسيە بەرۋ ارقىلى قوجالىقتار مەن فەرمەرلىك شارۋاشىلىقتارعا, جەكە كاسىپكەرلەرگە, اۋىل شارۋاشىلىعى وندىرىستىك كووپەراتيۆتەرىن اشۋعا جانە جەكە بيزنەستى كەڭەيتۋگە مول مۇمكىندىك جاساپ كەلەدى.
بۇگىندە امانقىز تاسبولاتقىزىنىڭ ۇلى ءابدىرايىم مەن كەلىنى ايبالا بارلىق جۇمىستى اتقارىپ وتىر. شارۋا قوجالىعى قازىر 37 تۇيە ساۋادى. ءابدىرايىمنىڭ 15 جاستاعى تۇڭعىشى ءالىبي دە اتا-اناسىنا قولعانات بولىپ ءجۇر. ەڭبەكسۇيگىشتىك سەكىلدى ىزگى قاسيەتتىڭ ۇرپاقتان ۇرپاققا جالعاسۋى دەگەنىمىز وسى بولسا كەرەك. يەلىگىندە 275 گەكتار جايىلىمدىق, 28 گەكتار سۋارمالى جەرى بار قوجالىقتا تۇيەلەر كۇنىنە 3 مەزگىل ساۋىلىپ, 200 ليتردەي ءسۇت الىنادى ەكەن. ءار ءليترى 500 تەڭگەگە باعالاناتىن بالداي قىمىرانعا سۇرانىس جوعارى. مەملەكەتتىك قولداۋدىڭ شاراپاتىن كورىپ, مال باسىن كوبەيتىپ وتىرعان وتباسى ەرتەڭىنە سەنىمدى ءارى شارۋاشىلىعىن تاعى كەڭەيتە ءتۇسۋدى جوسپارلاپ ءجۇر.
سونىمەن قاتار اۋىل شارۋاشىلىعىن قارجىلاي قولداۋ قورى «ەڭبەك» مەملەكەتتىك باعدارلاماسى اياسىندا كاسىپكەرلەردىڭ جوباسىن قارجىلاندىرىپ كەلەدى. اۋىل تۇرعىندارىنا, ونىڭ ىشىندە شالعاي ەلدى مەكەندەگى ەڭبەكقور جۇرتقا ۇلكەن قولداۋ بولىپ وتىرعان «ەڭبەك» باعدارلاماسىنىڭ ماقساتى – ازاماتتاردى كاسىپكەرلىككە تارتۋ. وڭىردە بۇل باعىتتا اتقارىلىپ جاتقان جۇمىستار وڭ ناتيجە بەرىپ كەلەدى.
مىسالى, «اۋىل شارۋاشىلىعىن قارجىلاي قولداۋ قورى» اق تۇركىستان فيليالىنىڭ ديرەكتورى مۇحيت جۋاسباي وتكەن جىلى وتىرار اۋدانى بويىنشا جالپى سوماسى 363,8 ملن تەڭگە بولاتىن 78 جوبا قارجىلاندىرىلىپ, قوسىمشا 111 جۇمىس ورنى قۇرىلعانىن ايتادى.
«بيىل جىل باسىنان بەرى اۋىل شارۋاشىلىعىن قارجىلاي قولداۋ قورى تۇركىستان وبلىسى بويىنشا 2,2 ملرد تەڭگەنىڭ 282 جوباسىن قارجىلاندىردى. ناتيجەسىندە 300-گە جۋىق جاڭا جۇمىس ورنى اشىلدى. جالپى وبلىسىمىزدا بيىل 9,5 ملرد تەڭگەنىڭ شاعىن نەسيەسىن بەرۋدى جوسپارلاپ وتىرمىز», – دەيدى فيليال ديرەكتورى مۇحيت جۋاسباي.
تۇركىستان وبلىسى
