تامارا دۇيسەنوۆانىڭ تۇسىندىرۋىنشە, اكىمشىلىك راسىمدىك-پروتسەستىك كودەكسكە ساي وتىنىشتەردى قاراۋدىڭ جاڭا ءتارتىبى ەنگىزىلىپ وتىر. ماسەلەن, بيىلعى ءبىرىنشى توقساندا پرەزيدەنت اكىمشىلىگىنە 449 مىڭنان استام ارىز تۇسكەن. ونىڭ 50 پايىزى جەرگىلىكتى اتقارۋشى ورگانداردىڭ ۇلەسىنە تيەسىلى ەكەن.
– بۇرىن ارىز 30 كۇن ىشىندە قارالاتىن ەدى. ەندى جاڭا كودەكستىڭ تالابىنا ساي, 15 كۇندە قارالادى. ءار ارىزعا اكىمشىلىك ءىس اشىلادى, – دەدى ت.دۇيسەنوۆا.
– «ە-ءوتىنىش» – ءوتىنىشتى قاراۋدىڭ تاريحى ساقتالاتىن ءبىرتۇتاس بازا. بۇل بارلىق مەملەكەتتىك جانە سوت ورگاندارىنا, سونداي-اق ءوتىنىش بەرۋشىلەرگە قولجەتىمدى بولادى. «ە-ءوتىنىش»-كە 1 شىلدەدەن باستاپ كەزەڭ-كەزەڭمەن ءوتۋ باستالادى. ازاماتتاردىڭ وتىنىشتەرى مەملەكەتتىك ورگاندارعا ءبىرتۇتاس اقپاراتتىق جۇيە ارقىلى تۇسەدى.
وبلىس اكىمىنىڭ ءبىرىنشى ورىنباسارى سەرىك ايداربەكوۆتىڭ مالىمەتىنشە, مەملەكەت باسشىسى قاسىم-جومارت توقاەۆ ۇسىنعان حالىقتىڭ بارلىق سىندارلى ءوتىنىش-تىلەگىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىنا وراي قازىر اتىراۋ قالاسى مەن جەتى اۋداندا سەرۆيستىك اكىمدىكتەر ىسكە قوسىلدى. ال جاڭا كودەكس تالاپتارىن تۇسىندىرەتىن مەملەكەتتىك قىزمەتشىلەر ارنايى وقۋ كۋرسىنان ءوتىپ, ءتيىستى سەرتيفيكات الدى.
– قازىر «ە-ءوتىنىش» اقپاراتتىق جۇيەسىنە 213 مەملەكەتتىك مەكەمە قوسىلىپ, وتىنىشتەردى وڭدەۋ جۇمىسى ۇيىمداستىرىلىپ وتىر. ازاماتتاردىڭ قۇقىعىن قورعاۋ باعىتىندا ىسكە اسىرىلاتىن رەفورمالاردىڭ ماڭىزدىلىعى ەسكەرىلىپ, الداعى ۋاقىتتا بۇل جۇمىس وبلىستىق اكىمدىكتىڭ تىكەلەي باقىلاۋىندا بولادى, دەدى سەرىك ايداربەكوۆ. – تۇرعىنداردىڭ وزەكتى ماسەلەلەردى قوزعاعان وتىنىشتەرى جەر, تۇرعىن ءۇي, جۇمىسپەن قامتۋ, الەۋمەتتىك كومەك كورسەتۋ, ءبىلىم بەرۋ مەن دەنساۋلىق ساقتاۋ سالالارىن قامتىدى.
ونىڭ ايتۋىنشا, جىل باسىنان بەرى ءوڭىردىڭ جەرگىلىكتى اتقارۋشى ورگاندارىنا 16 مىڭعا جۋىق ءوتىنىش ءتۇسىپ, ونىڭ 20 پايىزى قاناعاتتاندىرىلىپتى. ال قالعانىنا زاڭعا سايكەس جاۋاپ بەرىلىپتى.
اتىراۋ وبلىسى
