ەكى جولاقتى اۆتوموبيل كوپىرى قۇيعان اۋىلىنىڭ جانىنداعى جاساندى سۋ قويماسىنىڭ ەڭ جىڭىشكە ۋچاسكەسىندە سالىنادى. جوبادا كورسەتىلگەندەي, كوپىردىڭ ۇزىندىعى 1,3 شاقىرىمنان اسادى.
قۇرىلىس اياقتالعان سوڭ كوپىر كۇرشىم مەن كوكپەكتى اۋداندارىن جالعايدى. مەردىگەر كومپانيا «وبلشىعىسجول» جشس قۇرىلىستى 2024 جىلعا دەيىن اياقتاۋى ءتيىس.
«ەل تاۋەلسىزدىگىنىڭ 30 جىلدىعى قارساڭىندا مەملەكەت باسشىسىنىڭ تاپسىرماسى بويىنشا بۇقتىرما سۋ قويماسى ارقىلى وتەتىن كوپىردىڭ قۇرىلىسى باستالادى. بۇل وبلىس تۇرعىندارى ءۇشىن كوپتەن كۇتكەن ماڭىزدى وقيعا. جوبانىڭ ستراتەگيالىق ماڭىزعا يە ەكەنى بەلگىلى. ول شەكارالاس اۋدانداردى وبلىستىڭ باسقا وڭىرلەرىمەن بايلانىستىرادى, جولاۋشىلار مەن جۇك تاسىمالى جەڭىلدەيدى», دەدى كاپسۋلا سالۋ راسىمىندە وبلىس اكىمى دانيال احمەتوۆ.
