«كيدس گوۋ فري» (بالالار تەگىن ساياحاتتايدى) باعدارلاماسىنىڭ نەگىزگى ماقساتى – قازاقستاندىقتاردى ەلدىڭ تۋريستىك ورىندارىندا وتباسىمەن دەمالۋعا ىنتالاندىرۋ. بۇل بالالاردىڭ اۋەبيلەتتەرىن سۋبسيديالاۋ ارقىلى ىسكە اسىرىلادى.
ەرجان ەركىنباەۆتىڭ ايتۋىنشا, «كيدس گوۋ فري» تۋرپاكەتىن كەز كەلگەن تۋروپەراتوردان ساتىپ الۋعا بولادى.
«نەلىكتەن اۋە رەيستەرى سۋبسيديالانادى؟ قازاقستاندىقتار ءوز بالالارىنا ەلىمىزدىڭ باسقا دا وڭىرلەرىن تاماشالاپ, كورسەتۋى ءۇشىن سۋبسيديا بەرىلەدى. بىزدە ادەمى لاندشافتار كوپ -13 ۇلتتىق ساياباق بار. كوپشىلىگىمىز ءوز وڭىرىمىزدەن تىس جەرلەرگە شىقپادىق. بۇل جاقسى مۇمكىندىك بولادى, سوندىقتان بۇل باعدارلامانى تۋىستارىنىڭ ۇيىندە بولۋمەن سالىستىرۋعا بولمايدى دەپ سانايمىن», دەدى ەرجان ەركىنباەۆ.
قر مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ جاۋاپتى بولجامدى ەسەپتەرمەن تولىقتىردى.
«ەگەر ءسىز تۋروپەراتوردى تارتپاي, ءوز بەتىڭىزشە ۇشاتىن بولساڭىز, سايكەسىنشە سىزگە بالالار بيلەتتەرىنىڭ قۇنى سۋبسيديالانبايدى. بۇل جاعدايدا ۆاۋچەردىڭ قۇنى 20-30 پايىزعا ارزاندايدى دەپ بولجايمىز. مىسالى, ءبىز نۇر-سۇلتاننان الاكولگە ساياحات جاسايمىز. ءۇش بالاسى بار وتباسى ءبىر اپتاعا ۇشادى دەلىك. بۇل ولارعا ۇشۋدى قوسا العاندا, شامامەن 350-400 مىڭ تەڭگە تۇراتىن بولادى. بۇل سومانىڭ 100 مىڭ تەڭگەسى بالالار ءۇشىن بارىپ-قايتۋ بيلەتتەرىنە كەتەدى. 350-دەن 100 مىڭ الامىز, دەمالىستىڭ قۇنى 250 مىڭ تەڭگەنى قۇرايدى. ەگەر ءسىز ۇيىمداستىرىلعان دەمالىستى پايدالانعىڭىز كەلسە, وندا بۇل جۇيەنىڭ كومەگىمەن ارزانىراق بولادى», دەپ سەندىردى داستان رىسپەكوۆ.
