ادەبي ساۋالدامامىزدىڭ كەزەكتى قوناعى – جازۋشى-دراماتۋرگ مادينا ومار. ءداستۇرلى سۇراق: نە جازىپ ءجۇرسىز؟
– جازۋدى كاسىپ ەتكەن ادامعا جازاتىن نارسە وتە كوپ. قاراپ تۇرساڭىز, قازىرگى قوعام, زامان بارلىق مۇمكىندىكتى بەرىپ وتىر. اسىرەسە قازىرگى زامان – جازۋشى ءۇشىن تاپتىرمايتىن كەن ءتارىزدى. قازىپ تا اۋرە بولمايسىڭ, بارلىعى (قازىنا-بايلىق) جەردىڭ بەتىنە شىعىپ, شاشىلىپ جاتىر. كەڭەس كەزىندەگى اقىن-جازۋشىلاردان ءبىزدىڭ ارتىقشىلىعىمىز وسى. ادام بالاسى دا سان قيلى, قيتۇرقى بولمىسىن جاسىرىپ-جاۋىپ اۋرە بولمايدى. كەرىسىنشە, «مەن مىنادايمىن, ماعان قاراشى» دەگەندەي بىرىنەن-ءبىرى اسىرىپ, نەشە ءتۇرلى قىلىقتار مەن مىنەزدەرىن جاريا ەتىپ, جانتالاسادى. كەز كەلگەن الەۋمەتتىك جەلىدەگى پاراقشانى نەمەسە پىكىرلەردى ال دا پورترەت جاساي بەر. ادامدار وسىلاي بەتپەردەلەرىن سىپىرىپ, ارسىزدانعان سايىن جازۋشى قاۋىم قۇتىرىناتۇسەدى (شىعارماشىلىق تۇرعىسىنان) دەگەن ويدامىن. دەگەنمەن بۇل وزگەرىستەرگە نە سەبەپ؟ اقىل-وي كەمىستىگى ەپيدەمياسى ما الدە ەسەپسىز ەركىندىك, قۇدايدى ۇمىتۋ ادامزاتتى ماس قىلا ما؟
ءبىر وكىنىشتىسى, بىزدە جاقسى شىعارمالار كەڭىنەن ناسيحاتتالىپ, كوزى قاراقتى وقىرمانعا جەتىپ جاتقان جوق. ادەبي كىتاپ – ادام جانىنىڭ تاربيەشىسى بولسا, قازىرگى تاڭدا وقىرمان (حالىق) مەن سول اقىلدى, مەيىرىمدى تاربيەشى ءبىرىن-ءبىرى كورمەيدى, ءبىر-بىرىمەن كەزدەسپەيدى.
كوركەمدىك سۇزگى, رەداكتسيالىق القا دەگەن ۇعىم مۇلدە جوعالدى. ول, ءبىر جاعىنان, جازامىن, جازعانىمدى كىتاپ ەتىپ باسىپ شىعارامىن دەگەن ادامعا بارلىق مۇمكىندىكتى بەرەتىن بولسا, ەكىنشى جاعىنان, وقىرمان جاقسى مەن جاماندى, كوركەم تۋىندى مەن شالاجانسار گرافوماندىق تۇسىنىكتىڭ اراجىگىن اجىراتا الماي قالدى. كىمنىڭ جارناماسى, مەنەدجمەنتى مىقتى – سول توپ باستايتىنداي, سونداي ءبىر ءۇردىس پايدا بولدى.
بىزگە شۇعىل تۇردە ادەبيەتتانۋشىلاردان تۇراتىن بەدەلدى ءبىر ۆەدومستۆو, ينستيتۋت كەرەك. ول قۇرامعا اقىن-جازۋشىلار سياقتى شىعارماشىلىق ادامدارى ەنبەۋى ءتيىس. سەبەبى ونەر جۇرگەن جەردە باسەكە, داۋ-داماي, ادامدىق قارىم-قاتىناس جۇرەتىنى زاڭدى. ول توپ – سالقىنقاندى, كاسىبي ادامداردان, تەك قانا عالىمداردان تۇرۋى ءتيىس. جانە بۇل اۋقىمدى, ۇلكەن قۇرىلىم بولۋى كەرەك. سەبەبى نارىققا شىعىپ, وقىرماندارعا ۇسىنىلىپ جاتقان كىتاپتا ەسەپ جوق. سولاردى جۇيەلەپ, ەسەپتەرىن, قورىتىندىلارىن ماقالا تۇرىندە تۇراقتى جاريالاپ وتىراتىن (الەۋمەتتىك جەلىلەر, گازەت-جۋرنالدار ارقىلى, جيناقتار تۇرىندە), وزگە تىلدەرگە اۋدارۋ ءۇشىن ىرىكتەۋلەر جاسايتىن ء(دال قازىرگى, بۇگىنگى ادەبيەتكە) مەملەكەتتىك ينستيتۋت كەرەك... وسى ماسەلەنى كوتەرىپ دابىل قاعاتىن ءسات تۋدى.
ەگەر جالپىدان جالقىعا ءوتىپ, ء«وزىڭ نە تىندىرىپ ءجۇرسىڭ» دەگەن ساۋالعا اۋاتىن بولساق, مەن توعىز جىلدىڭ ءجۇزى بولدى, م.اۋەزوۆ اتىنداعى قازاق مەملەكەتتىك دراما تەاترىندا دراماتۋرگ بولىپ قىزمەت ەتىپ كەلە جاتىرمىن. وزىندىك جۇمىس جاساپ, مونو بولسىن, كوپ كەيىپكەرلى بولسىن, ءوز سپەكتاكلىندە باس رولدە ويناعىسى كەلەتىن اكتەرلەردىڭ يدەيالارىن جۇزەگە اسىرۋ ءۇشىن پەسالار ىزدەيمىز, اۆتورلارعا تاپسىرىس بەرەمىز, كەيدە ء(تىپتى كوپ جاعدايدا) ءوزىمىز جازىپ بەرەمىز, ينستسەنيروۆكالار جاسايمىز. وسى تەاترداعى توعىز جىلدىق ەڭبەك وتىلىمدە جيىرماعا جۋىق پەسا جازىپپىن. قازىر عانا اكتريسا گ.شىڭعىسوۆانىڭ تاپسىرىسىمەن «ۇزىلگەن ءان» اتتى ميۋزيكلدى جازىپ بولا سالىپ, اكتەر ج.سادىرباەۆتىڭ مونوسپەكتاكلگە تاپسىرىسىن قابىلداپ الدىم. وسىنداي ۇزدىكسىز شىعارماشىلىق پروتسەسس ءجۇرىپ جاتىر...
– شىعارماشىلىق وي-سىرىڭىزبەن بولىسكەنىڭىزگە راحمەت.
