ايماقتار • 12 ماۋسىم، 2021

نۇر-سۇلتاندا جاياۋ جۇرگىنشىلەرگە ارنالعان كوشە اشىلدى

69 رەت كورسەتىلدى

«نۇر-سۇلتان-جايلى قالا» ماستەر – جوسپارى اياسىندا ءا.مامبەتوۆ كوشەسىندە جاياۋ جۇرگىنشىلەرگە ارنالعان «Demalys Promenade» كوشەسى اشىلدى. ءا.مامبەتوۆ كوشەسىنىڭ كەنەسارى كوشەسى مەن اباي داڭعىلىنىڭ اراسىنداعى بولىگى دەمالىس جانە مەرەكە كۇندەرى جاياۋ جۇرگىنشىلەر كوشەسىنە اينالادى. ەندى بۇل كوشەدە اۆتوكولىكتەردىڭ قوزعالىسىنا تىيىم سالىنادى، دەپ حابارلايدى Egemen.kz.

بۇندا جازدا دەمالىس كۇندەرى ساعات 10.00-22.00 ارالىعىندا شىعارماشىلىق قويىلىمدار، ءتۇرلى ويىن ساۋىقتىق باعدارلامالار، بي جارىستارى، سپورتتىق شەبەرلىك سىنىپتارى، تاقىرىپتىق فەستيۆالدار جانە ت.ب وتكىزىلەدى.

جاياۋ ءجۇرۋ اۋماعى كىرەبەرىس اركادان باستالادى، وعان جاقىن جەردە ورنالاسقان ساحنادا كونتسەرتتەر مەن قويىلىمدار ۇيىمداستىرىلادى. كوشە بويىندا قالا تۇرعىندارى مەن قوناقتارى ءۇشىن شاتىرلارى بار ساۋدا-كورمە، سۋرەتشىلەر الاڭدارى، شاحمات ويناۋعا، ۇلتتىق ويىندارعا («اسىق اتۋ» جانە «توعىز قۇمالاق») ارنالعان ورىندار قاراستىرىلعان.

سونداي-اق، ەرەكشە ينستاللياتسيالار، بار-ۇستەلدەر مەن ارت-نىسانداردان فوتو ايماقتار ورناتىلعان.

سونىمەن قاتار، جاز بويى «ORDA FM» راديوسى Demalys Promenade-تان تىكەلەي ەفير جۇرگىزەدى. كوشەنىڭ اشىلۋ سالتاناتىندا ەفيردىڭ العاشقى قوناعى قالا اكىمى ا. س. كولگىنوۆ بولدى.

ء«بىز ەلوردانى «نۇر-سۇلتان-جايلى قالا» ماستەر – جوسپارى اياسىندا دامىتۋدامىز. بۇل، ەڭ الدىمەن، قالانىڭ ادامدار ءۇشىن ىڭعايلى بولۋى. جىل سايىن ءبىز قوعامدىق كەڭىستىكتەردىڭ سانىن كوبەيتۋدەمىز، قالا تۇرعىندارى تازا اۋادا ۋاقىت وتكىزە الاتىن تارتىلىس نۇكتەلەرى كوبىرەك بولادى. قازىر كوپتەگەن ادامدار سپورتپەن اينالىسا باستادى. بۇل ءبىزدى قۋانتادى.

بۇگىن جاياۋ جۇرگىنشىلەر كوشەسى اشىلدى، جاز بويى دەمالىس كۇندەرى بۇل جەردە كولىك قوزعالىسىنا تىيىم سالىنادى. «Demalys Promenade» — بۇل قالا تەاترلارىنىڭ، شىعارماشىلىق ۇجىمداردىڭ اشىق اۋادا ونەر كورسەتۋىنىڭ نەگىزگى بولىگى وتەتىن تارتىمدىلىقتىڭ تاعى ءبىر نۇكتەسى. «Demalys Promenade» سونداي-اق، جاس ارتىستەرگە، جاستار سۋبمادەنيەتتەرى مەن كرەاتيۆتى يندۋستريا وكىلدەرىنە ىسكە اسىرۋعا مۇمكىندىك بەرەدى.

«Demalys Promenade» «تەاترالنىي» جاياۋ بۋلۆارى (وماروۆ كوشەسى) مەن قالانىڭ جاعالاۋىن بىرىكتىرەدى، مۇندا دا اباتتاندىرۋ جۇمىستارى جۇرگىزىلۋدە. جاعالاۋدا وزىندىك باقىلاۋ الاڭى، سونىمەن قاتار، اتكەنشەكتەر مەن قىزىقتى ارحيتەكتۋرالىق فورمالار پايدا بولادى. اعىمداعى جىلى بارلىعى 150 اۋلا مەن 40 قوعامدىق كەڭىستىكتى (ساياباقتار، سكۆەرلەر، بۋلۆارلار) سالامىز جانە اباتتاندىرامىز.

وتكەن جىلى 76 گەكتاردان استام اۋماق اباتتاندىرىلدى. العاش رەت سپورت الاڭدارى، ياعني كونكي، فۋتبول جانە باسكەتبول الاڭدارى جانە ت.ب. بار كوپىر استىنداعى ورىن اباتتاندىرىلدى. سونداي - اق، كوگالداندىرۋ جۇمىستارىن بەلسەندى جۇرگىزۋدەمىز، بۇل ەكولوگياعا جاعىمدى اسەر ەتەدى»، دەدى ەلوردا اكىمى التاي كولگىنوۆ جاياۋ جۇرگىنشىلەر كوشەسىنىڭ اشىلۋىندا.

سوڭعى جاڭالىقتار

اقتوبەدە قوقىس پوليگونى ورتەندى

ايماقتار • بۇگىن، 19:58

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار