2021 جىلى انا مەن بالانى قولداۋعا 756 ملرد تەڭگە قاراستىرىلعان. بۇل تۋرالى حالىققا ەسەپ بەرۋ كەزدەسۋىندە قر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ مالىمدەدى.
ەڭبەك مينيسترلىگىنىڭ باسشىسى انا مەن بالانى قولداۋ الەۋمەتتىك كومەك پەن الەۋمەتتىك ساقتاندىرۋدىڭ كوپدەڭگەيلى جۇيەسى ارقىلى قامتاماسىز ەتىلەتىنىن اتاپ ءوتتى. 2021 جىلدىڭ باسىنان باستاپ بالالى وتباسىلارعا بەرىلەتىن بارلىق مەملەكەتتىك الەۋمەتتىك جاردەماقىلار 5%-عا ارتتىرىلدى.
رەسپۋبليكالىق بيۋدجەت قاراجاتى ەسەبىنەن مەملەكەتتىك جاردەماقىلاردىڭ مىناداي تۇرلەرى كوزدەلگەن:
- بالا تۋعاندا بەرىلەتىن بىرجولعى جاردەماقى (2020 جىلى جاردەماقىنىڭ ورتاشا مولشەرى 121 348 تەڭگەنى قۇراپ, ونىمەن 52,3 ملرد. تەڭگە سوماسىنا 430 مىڭنان استام ادام قامتىلدى; 2021 جىلى وسى جاردەماقىنى تولەۋگە شامامەن 400 مىڭ ادامدى قامتي وتىرىپ, 51,4 ملرد تەڭگە باعىتتاۋ جوسپارلانۋدا);
- 1 جاسقا دەيىنگى بالا كۇتىمى بويىنشا اي سايىنعى جاردەماقى (2020 جىلى سارالانعان مولشەردە 16 002 تەڭگەدەن 24 725 تەڭگەگە دەيىنگى جاردەماقىنى شامامەن 121 مىڭ ادام 32 ملرد تەڭگە سوماسىنا الدى; 2021 جىلى جاردەماقىمەن 44 ملرد تەڭگە سوماسىنا 145 مىڭ ادامدى قامتۋ جوسپارلانۋدا);
- «التىن القا», «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان, I جانە II دارەجەلى «انا داڭقى» وردەندەرىمەن ماراپاتتالعان كوپبالالى انالارعا بەرىلەتىن اي سايىنعى جاردەماقى (2020 جىلى جاردەماقىمەن 49,1 ملرد تەڭگە سوماسىنا 232,3 مىڭ ادام قامتىلىپ, ورتاشا مولشەرى 17 780 تەڭگەنى قۇرادى; 2021 جىلى 52,8 ملرد تەڭگە سوماسىنا 234,7 مىڭ ادامدى قامتۋ جوسپارلانىپ وتىر);
- 4 جانە ودان دا كوپ كامەلەتكە تولماعان بالالارى بار كوپبالالى وتباسىلارعا بەرىلەتىن جاردەماقى (جاردەماقى مولشەرى وتباسىنداعى بالالار سانىنا بايلانىستى 46 760 تەڭگەدەن (4 بالا) 186 688 تەڭگەگە (16 بالا) دەيىن سارالانعان, 2020 جىلى جاردەماقىمەن 236,2 ملرد تەڭگە سوماسىنا 392,4 مىڭ وتباسى قامتىلعان; 2021 جىلى 282,4 ملرد تەڭگە سوماسىنا 442 مىڭ وتباسىنى قامتۋ جوسپارلانۋدا).
- كامەلەتتىك جاسقا تولعانعا دەيىن مۇگەدەكتىگى بار بالانىڭ, 18 جاستان اسقان بالا كەزىنەن ءبىرىنشى توپتاعى مۇگەدەكتىگى بار ادامنىڭ كۇتىمى بويىنشا جاردەماقى (2020 جىلى 1,4 ەڭ تومەنگى كۇنكورىس دەڭگەيى مولشەرىندە 104 مىڭ ادام جالپى سوماسى 57,6 ملرد تەڭگەگە جاردەماقى الدى; 2021 جىلى وسى جاردەماقىنى تولەۋگە شامامەن 110 مىڭ ادامدى قامتي وتىرىپ, 65,2 ملرد تەڭگە ءبولىندى).
سونىمەن قاتار, جۇمىس ىستەيتىن ايەلدەر ءۇشىن مەملەكەتتىك الەۋمەتتىك ساقتاندىرۋ قورىنان الەۋمەتتىك تولەمدەر قاراستىرىلعان.
جۇكتىلىككە جانە بوسانۋعا بايلانىستى الەۋمەتتىك تولەمنىڭ ورتاشا مولشەرى 541,3 مىڭ تەڭگەنى, ال ءبىر جاسقا دەيىنگى بالا كۇتىمى بويىنشا اي سايىنعى تولەم 32,3 مىڭ تەڭگەنى قۇرايدى.
زەينەتاقى تاعايىنداۋ كەزىندە ايەلدەردىڭ الەۋمەتتىك قورعالۋىن ارتتىرۋ ءۇشىن ءۇش جاسقا دەيىنگى بالا كۇتىمى كەزەڭى ەڭبەك وتىلىنە ەسەپتەلەدى. سونىمەن بىرگە, ايەلدەرگە ءبىر جاسقا دەيىنگى بالا كۇتىمى بويىنشا دەمالىس كەزەڭىندە مىندەتتى زەينەتاقى جارنالارى سۋبسيديالانادى.
«وتكەن جىلى انا مەن بالانى قولداۋعا 635 ملرد تەڭگەدەن استام قاراجات جۇمسالدى. 2021 جىلى 756 ملرد تەڭگە كوزدەلگەن, بۇل وتكەن جىلعى شىعىنداردان 19%-عا ارتىق», دەپ حابارلادى سەرىك شاپكەنوۆ.
