جاڭا تاراۋدا كاسىپكەرلىكتىڭ قانداي ءتۇرىن الەۋمەتتىك دەپ اتالاتىنى, بۇل مارتەبەنى قالاي الۋعا بولاتىنى جانە مۇنداي كاسىپكەرلەرگە مەملەكەت قانداي قولداۋ كورسەتەتىنى سيپاتتالادى.
«الەۋمەتتىك» دەپ اتالۋ ءۇشىن كاسىپورىندا حالىقتىڭ الەۋمەتتىك وسال توپتارىنىڭ وكىلدەرى جۇمىس ىستەۋى كەرەك. ولاردىڭ قاتارىنا ەرەكشە قاجەتتىلىكتەرى بار, مۇگەدەك بالانى تاربيەلەپ وتىرعان اتا-انالار, زەينەتكەرلەر, بالالار ءۇيىنىڭ تاربيەلەنۋشىلەرى, كوپبالالى وتباسىلار, قانداستار كىرەدى.
سونىمەن قاتار كاسىپورىن ولار ءۇشىن تاۋارلار وندىرە نەمەسە ساتا الادى, سونداي-اق مۇمكىندىگى شەكتەۋلى ادامدارعا ماڭىزدى ارنايى قىزمەتتەر كورسەتۋىنە بولادى.
الەۋمەتتىك كاسىپكەرلەرگە مەملەكەت قولداۋ كورسەتەدى. سەناتورلار گرانتتار بەرۋ, بانكتەردەگى پايىزدىق مولشەرلەمەنى سۋبسيديالاۋ, مەملەكەتتىك م ۇلىكتى جەڭىلدىك شارتتارىمەن جالعا بەرۋ سياقتى شارالاردى بەكىتتى. سونداي-اق قىزمەتكەرلەردى وقىتۋ جانە بىلىكتىلىگىن ارتتىرۋ ءۇشىن اقى تولەنگەن جاعدايدا تابىس سالىعىن ازايتۋ قاراستىرىلعان.
سەنات توراعاسى ماۋلەن اشىمباەۆ حالىقتىڭ الەۋمەتتىك وسال توپتارىن قولداۋ - پالاتانىڭ نەگىزگى باسىمدىقتارىنىڭ ءبىرى ەكەنىن اتاپ ءوتتى.
«مەملەكەت باسشىسى الەۋمەتتىك ماسەلەلەردى شەشۋگە, سونداي-اق از قامتىلعان جانە ەرەكشە قاجەتتىلىكتەرى بار ادامدارعا قولداۋ كورسەتۋگە ۇنەمى كوڭىل بولەدى. بۇل تۇرعىدا الەۋمەتتىك كاسىپكەرلىكتى دامىتۋدىڭ ماڭىزى زور. بۇل وزگەرىستەر مەن تولىقتىرۋلارعا باستاماشىلىق ەتكەن جانە دايىنداعان سەنات دەپۋتاتتارى ەكەنىن اتاپ وتكەن ءجون. وتاندىق زاڭنامادا العاش رەت الەۋمەتتىك كاسىپكەرلىككە انىقتاما بەرىلىپ وتىر», دەدى ماۋلەن اشىمباەۆ.
