ەكونوميكا • 10 ماۋسىم، 2021

دۇنيەجۇزىلىك بانك الماتى وبلىسىنا ينۆەستيتسيا سالۋعا ءازىر

13 رەت كورسەتىلدى

الماتى وبلىسىنىڭ اكىمى اماندىق باتالوۆ دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتوندى قابىلدادى. ەكىجاقتى كەزدەسۋ بارىسىندا الماتى وبلىسى مەن دۇنيەجۇزىلىك بانكتىڭ ىنتىماقتاستىق ماسەلەلەرى تالقىلاندى، دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.

رەسمي دەلەگاتسيانى قارسى العان اماندىق باتالوۆ ءوڭىر ەكونوميكاسىنىڭ نەگىزگى باعىتتارى تۋرالى قىسقاشا باياندادى.

«ەلىمىزدە ترانسۇلتتىق كومپانيانىڭ قاتىسۋىمەن 16 جوبا ىسكە اسىرىلىپ جاتسا، سونىڭ 9-ى – ءبىزدىڭ الماتى وبلىسىندا. ءوڭىر اگروونەركاسىپتىك سالادا، قانت قىزىلشاسى، سويا، جۇگەرى وسىرۋدە كوشباسشى سانالادى. اۋىل شارۋاشىلىعى ونىمدەرىن وڭدەۋدە ىرگەلى جوبالار بار. بالامالى ەنەرگەتيكادا دا جەمىستى جۇمىستار جاسالىپ جاتىر. ءبىز سىزدەرمەن وسى سالالاردا، سول سياقتى تۋريزم، تۇرعىن ءۇي-كوممۋنالدىق شارۋاشىلىق، سونىڭ ىشىندە گازداندىرۋ، كوشەنى جارىقتاندىرۋ، كارىز جۇيەلەرىن جاڭعىرتۋ، سونىمەن بىرگە يرريگاتسيالىق جۇيەلەردى قالپىنا كەلتىرۋ باعىتتارىندا ىنتىماقتاستىق ورناتۋعا پەيىلمىز. تالدىقورعاندا جەو سالۋ جوسپاردا بار. بۇل دا - ماڭىزدى ءارى قاجەتتى جوبا. الدا ناقتى باعىتىمىزدى بىرلەسىپ انىقتاپ، جەمىستى ەڭبەك ەتۋگە سىزدەردىڭ دە، ءبىزدىڭ دە تاجىريبەمىز جەتەدى دەپ ويلايمىن»، دەدى اماندىق باتالوۆ.

ءوز كەزەگىندە  دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتون جەتىسۋلىقتاردىڭ جىلى قابىلداۋىنا ريزاشىلىعىن ءبىلدىرىپ، دۇنيەجۇزىلىك بانكتىڭ جۇمىس ەرەكشەلىگىنە، بانكتىڭ قولداۋىمەن الماتى وبلىسىندا جۇزەگە اسىرىلىپ جاتقان جوبالارعا توقتالدى. سولاردىڭ اراسىندا «الماتى-قورعاس» جولىنىڭ ينفراقۇرىلىمدىق جوباسى، 2 مەكتەپ پەن بالاباقشانى قامتيتىن ەنەرگيا تيىمدىلىگىن ارتتىرۋ جوباسى، سول سياقتى جاستاردى قوعامدىق ومىرگە تارتۋعا، ولاردىڭ ومىرلىك ماشىقتارىن دامىتۋعا باعىتتالعان جاستار كورپۋسىنىڭ جوباسى بار.

ىنتىماقتاستىقتى ودان ءارى دامىتۋ ماقساتىندا جان-فرانسۋا مارتون ءبىلىم بەرۋ، تسيفرلاندىرۋ، جول ينفراقۇرىلىمى، يرريگاتسيا، الەۋمەتتىك سالالاردا، اسىرەسە، مەملەكەتتىك-جەكەمەنشىك ارىپتەستىك اياسىنداعى جوبالاردى قارجىلاندىرۋعا دايىن ەكەندىكتەرىن ايتتى.

ء«بىز وبلىس اۋماعىندا ىنتىماقتاسۋعا قىزىعۋشىلىق ءبىلدىرىپ وتىرمىز. بۇعان دەيىن ءبىز ەل ۇكىمەتى ارقىلى عانا جۇمىس ىستەدىك. ەندى وبلىس باسشىلىقتارىمەن تىكەلەي جۇمىس ىستەۋ ءۇشىن بىرقاتار قۇجاتتارعا وزگەرىستەر ەنگىزىپ جاتىرمىز. بۇل باعىتتا الماتى وبلىسىنىڭ اكىمدىگىمەن بىرلەسىپ جۇمىس ىستەۋگە نيەت ءبىلدىرىپ وتىرمىز»، دەدى جان-فرانسۋا مارتون.

كەزدەسۋ بارىسىندا حالىقارالىق قارجى كورپوراتسياسىنىڭ قازاقستانداعى كەڭسەسىنىڭ باسشىسى ەكاتەرينا بەندجامين دە ارىپتەستىك بايلانىستارىن جانداندىرۋعا ىقىلاس ءبىلدىردى.

ء«بىز وبلىستىڭ الەۋمەتتىك-ەكونوميكالىق دامۋىنا وڭ ىقپال ەتەتىن ۇزاق مەرزىمدىك جوبالاردى، سونىڭ ىشىندە قالدىقتاردى جويۋ جانە يرريگاتسيا باعىتتارىنداعى جوبالاردى بىرگە اتقارۋعا دايىنبىز»، دەپ اتاپ ءوتتى ول.

اماندىق باتالوۆ الەۋمەتتىك ماڭىزدى جوبالاردى جۇزەگە اسىرۋعا ىقپال ەتەتىن ەكى جاقتى ارىپتەستىك بايلانىستاردىڭ ماڭىزدىلىعىن اتاپ ءوتتى.

ء«بىزدىڭ ىنتىماقتاستىعىمىزعا ودان ءارى سەرپىن بەرەتىن بۇگىنگى كەزدەسۋگە كەلگەندەرىڭىزگە قۋانىشتىمىن. بۇل جۇزدەسۋدىڭ ناقتى جەمىسى كوپ كۇتتىرمەيدى دەپ ويلايمىن»، دەدى ءسوزىنىڭ قورىتىندىسىندا وبلىس اكىمى.

اتاپ وتسەك، الماتى وبلىسىنىڭ 2021-2030 جىلدارعا ارنالعان ينۆەستيتسيالىق قورجىنىندا جالپى قۇنى 5،5 ملرد تەڭگە بولاتىن، 45 مىڭ جۇمىس ورنىن قۇراتىن 592 جوبا بار. سونىڭ ىشىندە قۇنى 112،8 ملرد تەڭگەلىك، 3500 جۇمىس ورنىن قۇراتىن 66 جوبا بيىلعى جىلى ىسكە اسىرىلادى، 41 جوبا – اوك سالاسىندا، 11 – وڭدەۋ ونەركاسىبىندە، 4 – جەك جانە باسقا دا سالالاردا ىسكە اسىرىلادى.

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار