ءبىلىم • 10 ماۋسىم، 2021

سەنات دەپۋتاتى بايقوڭىرداعى مەكتەپتەردىڭ ماسەلەسىن كوتەردى

41 رەت كورسەتىلدى

بيىل بايقوڭىر قالاسى مەن تورەتام ەلدى مەكەنىن دامىتۋعا 2،1 ملرد تەڭگە جۇمسالادى. بۇل تۋرالى قارجى ءمينيسترى ەربول قاراشوكەەۆ ايتتى، دەپ حابارلايدى Egemen.kz

«1994 جىلعى 10 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن جالعا بەرۋ شارتىنا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن تالقىلاۋ كەزىندە سەنات دەپۋتاتى بەكبولات ورىنبەكوۆ بايقوڭىرداعى ورتا ءبىلىم ماسەلەسىن كوتەردى.

«تاريحي عارىش كەشەنى ورنالاسقان 76 مىڭنان اساتىن تۇرعىنى بار، ونىڭ ىشىندە 49 مىڭنان استام قازاقستان رەسپۋبليكاسىنىڭ ازاماتى بار بايقوڭىر قالاسىن دامىتۋ كەزەڭىندە بىرقاتار پروبلەما تۋىنداپ وتىر. اتاپ ايتقاندا، رەسەي تاراپىنان قولدانىستاعى يفنراقۇرىلىمدى كۇتىپ ۇستاۋعا عانا قاراجات بولىنۋدە. قالاداعى تۇرعىن ءۇي قورى جاڭارتىلمايدى جانە ينجەنەرلىك ينفراقۇرىلىم مەن الەۋمەتتىك نىسانداردىڭ توزىعى جەتكەن. قازاقستان تاراپى دا قولدانىستاعى زاڭنامالار نەگىزىندە بايقوڭىر قالاسىنىڭ ينفراقۇىرىلىم جوبالارىن تىكەلەي قارجىلاندىرا المايدى. سونىمەن قاتار قارجى جەتىسپەۋشىلىگى سالدارىنان قر ازاماتتارىن ساپالى بىلىممەن قامتاماسىز ەتۋ كەزەڭىندە پروبلەما ورىن الىپ وتىر، اتاپ ايتقاندا، قالادا 9200 وقۋشى ءتالىم الاتىن 12 مەكتەپ بار. ونىڭ ىشىندە رەسەي فەدەراتسياسىنىڭ 7 مەكتەبىندە 4000 وقۋشى جانە قازاقستاننىڭ 5 مەكتەبىندە 5200 وقۋشى ءبىلىم الۋدا. رەسەيلىك مەكتەپتەردەگى 4000 وقۋشىنىڭ 1408-ءى – قازاقستان رەسپۋبليكاسىنىڭ ازاماتتارى. ولاردىڭ رەسەيلىك ءبىلىم بەرۋ باعدارلاماسىن وقۋىنا بايلانىستى مەملەكەتتىك گرانتپەن جوعارى وقۋ ورنىنا ءتۇسۋ كەزىندە قيىندىقتار تۋىندايدى»، دەدى دەپۋتات.

سەنات وكىلى قالاداعى 11 مىڭ پاتەردىڭ يەسى ءوز باسپانالارىن ءوز اتتارىنا قاراتا الماي جۇرگەنىن دە ەسكە سالدى.

«قولدانىستاعى زاڭنامالارعا وزگەرىس ەنگىزىپ، جالعا الۋ كەزىندە تولەنەتىن تۇسىمدەر ەسەبىنەن بايقوڭىر قالاسى مەن وعان ىرگەلەس جاتقان تورەتام مەن اقاي ەلدى مەكەندەرىن دامىتۋدى قارجىلاندىرۋ جۇمىستارى قاشان جانە قالاي ىسكە اسىرىلماق؟ بايقوڭىر قالاسىنىڭ 11606 پاتەرىندە تۇرىپ جاتقان قر ازاماتتارىنىڭ باسپاناسىن جەكەشەلەندىرۋ ماسەلەسى قاشان جانە قالاي شەشىمىن تابادى»، دەپ سۇرادى بەكبولات ورىنبەكوۆ.

قارجى ۆيتسە-ءمينيسترى ەربول قاراشوكەەۆتى ايتۋىنشا، «بايقوڭىر» كەشەنىنەن ءتۇسىپ جاتقان جالداۋ اقىسىن نىسانالى تۇردە بايقوڭىر قالاسى مەن تورەتام، اقاي ەلدى مەكەندەرىنىڭ دامۋىنا جىبەرۋ –تۇجىرىمدامالىق ماسەلە.

«مۇددەلى مەملەكەتتىك ورگاندار اراسىندا ول ماسەلە تالقىلانعان. ءتۇسىپ جاتقان جالداۋ اقىسى نەگىزى سالىق ەمەس ءتۇسىم بولعاندىقتان، بىرىڭعاي بيۋدجەتكە تۇسەدى. ونىڭ ءبىر بولىگىن ارنايى تۇردە ءبولىپ الىپ، وسى ەلدى مەكەندەردىڭ دامۋىنا جىبەرۋ مۇمكىن ەمەس. سەبەبى ول بيۋدجەتتىك پرينتسيپتەرگە قايشى كەلەدى»، دەگەن مينيسترلىك وكىلى.

سونىمەن بىرگە ول وسى ەلدى مەكەندەردىڭ، بايقوڭىر قالاسىنىڭ ينفراقۇرىلىمىن قارجىلاندىرۋعا تولىق مۇمكىندىك بار ەكەنىن اتادى.

«2021 جىلى بايقوڭىر قالاسى مەن تورەتام ەلدى مەكەنىن قارجىلاندىرۋ ءۇشىن نىسانالىق ترانسفەرت ارقىلى بيۋدجەتتەن 2،5 ملرد تەڭگە قۇيۋ جوسپارلانعان. جالپى قىزىلوردا وبلىسىنا رەسپۋبليكالىق بيۋدجەتتەن 22،7 ملرد تەڭگە كوزدەلىپ وتىر. سول سەبەپتى مۇمكىنشىلىك بار. نىسانالى ترانسفەرت ارقىلى وسى ماقساتتارعا اقشانى جىبەرۋگە دايىنبىز. ول ءۇشىن ءاربىر مينيسترلىك ءوز قۇزىرەتتەرىندە بىزگە ۇسىنىستارىن ەنگىزۋى قاجەت»، دەدى ۆيتسە-مينيستر.

ۆەدومستۆو وكىلى بايقوڭىر قالاسىنداعى 11 مىڭنان استام پاتەردى جەكەشەلەندىرۋ ماسەلەسىن ءبىرجولا شەشۋگە باعىتتالعان پروتسەس باستالعانىن دا ايتتى.

«ول ءۇشىن قولدانىستاعى تۇرعىن ءۇي زاڭناماسىن وزگەرىستەر ەنگىزۋدىڭ قاجەتى جوق. بىرىنشىدەن، ول قىزىلوردا وبلىسىنىڭ اكىمدىگىنىڭ قۇزىرەتى. جەكەشەلەندىرۋ پروتسەسىن باستاۋ ءۇشىن اۋەلى وبلىس اكىمدىگى سول پاتەرلەردى رەسەي تاراپىنىڭ جالداۋىنان شىعارۋى كەرەك. جالداۋدان شىعارۋ ءۇشىن «بايقوڭىر» كەشەنىنىڭ ماسەلەلەرى جونىندەگى ۇكىمەتارالىق كوميسسيانىڭ كۇن تارتىبىنە ەنگىزىپ، رەسەي تاراپىنان، «بايقوڭىر» اكىمشىلىگىنەن كەلىسىم الۋ كەرەك. رەسەيدىڭ جالداۋىنان شىعارىلعاننان كەيىن قىزىلوردا وبلىسى اكىمدىگىنىڭ كوممۋنالدىق مەنشىگىنە وتكىزىپ، وسىندان كەيىن قولدانىستاعى زاڭناما بويىنشا جەكەشەلەندىرۋ پروتسەسى جۇرگىزىلەدى. ول جۇمىس باستالدى، قازىر جۇرگىزىلىپ جاتىر»، دەدى ەربول قاراشوكەەۆ.

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار