ساحنا تورىندە وركەسترمەن بىرگە سكريپكاشى, قازاقستاننىڭ حالىق ءارتىسى ايمان مۇساقوجاەۆا, سيمفونيالىق وركەستردىڭ ءسوليسى داستان بالاعۇماروۆ ونەر كورسەتتى. سكريپكا مەن الت اسپاپتارىندا بەتحوۆەننىڭ, موتسارتتىڭ جانە وتاندىق كومپوزيتور الماس سەركەباەۆتىڭ تۋىندىلارىن ورىنداعان سوليستەر قالىڭ كورەرمەننىڭ زور ىقىلاسىنا بولەندى.
ايمان مۇساقوجاەۆا «قازاقكونتسەرتتىڭ» باس ساحناسىنداعى بۇل سيمفونيالىق كەش تاۋەلسىزدىكتىڭ 30 جىلدىعىنا ارنالعانىن ايتتى. «بۇل – ءبىزدىڭ كارانتيننەن كەيىن ۇزاق كۇتكەن كونتسەرتىمىز. بۇگىن ۇلكەن ساحنادا كورەرمەن قاۋىممەن ساعىنا كورىسىپ, قاۋىشتىق. جاڭا كونتسەرتتىك باعدارلاما ەرەكشە. ۇزاق ۋاقىت بويى كارانتيندە بولىپ, ءتۇرلى قيىندىقتارعا توتەپ بەرگەن كورەرمەن اتاقتى كومپوزيتورلاردىڭ مۋزىكاسى ارقىلى ءومىردىڭ باستى قۇندىلىقتارىنا جاڭاشا كوزقاراس قالىپتاستىرىپ, مۋزىكا قۇدىرەتى ارقىلى ءتۇرلى ەموتسيالاردى سەزىنە الادى. مۋزىكا ءاردايىم بارشامىزعا شابىت بەرىپ, رۋحاني كۇش-قۋات سىيلاسىن», دەدى سكريپكاشى.
سونداي-اق ديريجەرلىك تۇعىردا وركەسترمەن جۇمىس ىستەگەن وزبەكستاننىڭ ەڭبەك سىڭىرگەن ءارتىسى, ديريجەر كاموليددين ۋرينباەۆ تا وركەستر ونەرىن جوعارى باعالادى. «مۋزىكالىق ونەر شەكاراعا باعىنبايدى, مۋزىكا جانە تالانت – ءبىزدىڭ ورتاق ءتىلىمىز. وركەستردىڭ شەبەرلىگى جوعارى دەڭگەيدە. سونداي-اق قازاقستاندا كلاسسيكالىق ونەرگە ۇلكەن قولداۋ كورسەتىلەتىنى ەرەكشە قۋانتادى», دەدى ماەسترو.
ايتا كەتەيىك, بۇل مەرەكەلىك كەش ماۋسىم ايىنداعى جاڭا كونتسەرتتەردىڭ العاشقىسى عانا. بيىل ءوزىنىڭ 60-شى مەرەيتويلىق ماۋسىمىن وتكىزىپ جاتقان «قازاقكونتسەرت» ۇيىمى كورەرمەن قاۋىمدى جازدىڭ العاشقى ايىندا وفلاين فورماتتاعى تاعى 9 كونتسەرتپەن قۋانتپاق. اتالعان كونتسەرتتەر «جۇلدىزبەن ءبىر ساحنادا» اتتى جاڭا جوبا اياسىندا وتەدى.
