ۋاقىت ءۇنىن ءادىل تارازىلاعان مۇنداي كارتينالار كورەرمەندى ءدال سول كەزەڭگە, تاپ سول مەكەنگە ءيىرىپ اكەتكەندەي اسەرگە قالدىراتىنى بار. سولاردىڭ ىشىندەگى ەڭ ىرگەلى تۋىندىلار ءا.قاستەەۆ اتىنداعى ونەر مۇراجايىنىڭ قورىندا ساقتاۋلى تۇر. كۇنى كەشە ونەر ورداسىنىڭ زاماناۋي شەتەل ونەرى قورىنان جيناقتالعان رەسەي شەبەرلەرىنىڭ قولتاڭباسىنان سىر شەرتەتىن كورمە ەسىك اشتى.
ۆلاديمير رۋتشتەيننىڭ 1957 جىلى جازعان «جەڭىستەن سوڭ» دەپ اتالاتىن جۇمىسى ءوزىنىڭ اتاۋىمەن دە, ەموتسيونالدىق مازمۇنىمەن دە بۇكىل كورمەنىڭ وزەگىن ۇستاپ تۇر. سۋرەتتە – كوركەم دە جىگەرلى جاس جىگىتتەر فۋتبول ماتچىندا جەڭىسكە جەتكەن زاۋىت كومانداسىنىڭ وكىلدەرى ەكەنى بايقالادى. ولاردىڭ جۇزدەرىنە شۋاق ۇيالاتقان جەڭىس قۋانىشى, جەڭىس شاتتىعى. شاكىرتتەر جىگەرىنە ريزا بولعان جاتتىقتىرۋشىنىڭ تۇلعاسى دا ەستە قالارلىقتاي. اننا كوستينانىڭ «مەكتەپ ءبىتىرۋ كەشى» دەپ اتالاتىن جارىق پەن باقىت سەزىمىنە تولى سەرپىندى جۇمىسى دا قۇرىلىمى جاعىنان الدىڭعى كومپوزيتسياعا جاقىن.
كورمەدە قازاقستان تاقىرىبى ايرىقشا ءۇن قاتادى. بۇكىل ەلدىڭ باسىن قوسقان تىڭ يگەرۋ تاريحي وقيعاعا اينالعانى ءمالىم. 1954 جىلى كوكتەمدە ون مىڭداعان ادام دالا ءتوسىن تىلگىلەپ جاڭا جەرلەردى باعىندىرۋعا اتتاندى. بۇل وقيعادان سۋرەتشىلەر دە شەت قالعان جوق. كورمەدەگى ليريكالىق ەكپىنگە تولى ۆالەنتين بوگدانوۆتىڭ «دوستاردان حات», يرينا ۆيتماننىڭ «جاڭا جەردە», روستيسلاۆ سلەتوۆتىڭ «تىڭعا» جۇمىستارى جاس تىڭ يگەرۋشىلەردىڭ «شاتىرداعى» ءومىرىن كورسەتەدى. كورمەدەگى پاۆەل كوريننىڭ ماسكەۋ مەتروسىنداعى بەكەتتىڭ ساندىك جابدىقتارىنا ارنالعان ەسكيزدەرى الماتىلىق كورەرمەننىڭ نازارىنا العاش رەت ۇسىنىلىپ وتىر. اسىرەسە نوۆوسلابوتسكايا مەتروسى ۆيتراجدارىنىڭ ەسكيزدەرى ەرەكشە قىزىقتى. ولاردىڭ نەگىزىندە ەسكىلىكتى ماتالاردىڭ ورنەكتەرىمەن ورىلگەن وسىمدىكتەكتەس گۇلدى ناقىشتاردان قۇرالعان كۇردەلى كومپوزيتسيالار دا كورمە قابىرعاسىنان ورىن العان.
كورمەدە ايەلدەر بەينەسى باسىم. سەرگەي گەراسيموۆ پەن لەونيد كاباچەكتىڭ, ستەپان دۋدنيك پەن الەكساندر ءپۋشنيننىڭ كەسكىندەمەلەرىندەگى اۋىلدىڭ ەڭبەككەر ايەلدەرى اسەرلى بەينەلەنگەن. كوشپەلى كورمەگە كەلگەن جۇمىسشى قىزدار كونستانتين دوروحوۆ كارتيناسىنىڭ نەگىزگى كەيىپكەرلەرىنە اينالعان. ساياباقتا سەرۋەن قۇرعان قۇربى قىزدار الەكسەي تكاچەۆتىڭ شابىتىنا دەم بەرسە, جول جيەگىندە نەمەرەسىن جەتەكتەگەن اجەيلەر گلەب ساۆينوۆتىڭ قىلقالامىنا ىلىككەن.
كورمە جەتەكشىسى گالينا سىرلىباەۆانىڭ ايتۋىنشا, 1960-جىلدارى ماسكەۋدىڭ كوركەمسۋرەت كورمەلەرى ديرەكتسياسى مۋزەيگە بىرقاتار تۋىندىسىن سىيعا تارتقان. ال كەيبىر تۋىندى اۆتورلاردىڭ وزىنەن تىكەلەي ساتىپ الىنسا كەرەك. ايتالىق, ۆيكتور ورەشنيكوۆتىڭ «سۋرەتشى ا.ف.كوستينانىڭ پورترەتى». پەتر كونچالوۆسكيدىڭ «بالالايكا ۇستاعان بالا» جانە «سۋقۇيعىشتاعى جۇپارگۇل», اريستارح لەنتۋلوۆتىڭ «قىرىققابات بەينەلەنگەن ناتيۋرمورت», الەكساندر وسمەركيننىڭ «ەرەۆان ناتيۋرمورتى» اتتى جۇمىستارى كەڭەس ونەرىندەگى ءىرى سۋرەتشىلەردىڭ تىكەلەي مۇراگەرلەرىنەن الىنعان.
الماتى
