بىردە ۋنيۆەرسيتەتتىڭ عىلىمي كەڭەسىنە لەكتسيا وقۋ ءۇشىن سىرتقى ىستەر ءمينيسترىنىڭ ورىنباسارى قاسىم-جومارت توقاەۆ كەلدى. كەڭەستىك داۋىردە مۇنداي دەڭگەيدەگى شەنەۋنىكتەردىڭ وزدەرىن وزگەلەردەن جوعارى ۇستايتىنىن, كەز كەلگەنگە سالەم بەرە بەرمەيتىنىن جۇرت بىلەتىن. ال قاسىم-جومارت كەمەل ۇلىنىڭ كەۋدەمسوقتىعى جوق, كىشىپەيىل, ىزەتتى دە يناباتتى, بيىك ەرۋديتسيالى جان ەكەندىگى بىردەن بايقالدى. ونىڭ لەكتسيالارى مازمۇندىلىعى, قىزىقتىلىعىمەن ەسىمىزدە قالدى. اسا بىلگىرلىك, ۇلكەن مادەنيەت, زيالىعا ءتان ادەپ, يبامەن سويلەيتىن ول ستۋدەنتتەردى بىردەن باۋراپ الدى. ول كسرو-نىڭ سينگاپۋردەگى ەلشىلىگىندە, ماسكەۋدەگى كسرو سىرتقى ىستەر مينيسترلىگىنىڭ ورتالىق اپپاراتىندا قىزمەت ەتۋمەن قاتار, بەيجىڭدەگى قىتاي ءتىلى ينستيتۋتىندا دا وقىعان, ودان كەيىن كسرو ديپلوماتيالىق اكادەمياسىندا دا ءدارىس العان, قىتاي جانە اعىلشىن تىلدەرىن جاقسى مەڭگەرگەن, تاجىريبەلى مامان ەكەن. 1994 جىلى مينيستر بولىپ تاعايىندالعان سوڭ دا ۋاقىت تاۋىپ, حالىقارالىق قاتىناستار فاكۋلتەتىنىڭ ستۋدەنتتەرىنە, ياعني بولاشاق مامىلەگەرلەرگە لەكتسيا وقىپ تۇردى.
انىعىندا, ەل تاۋەلسىزدىگىنە دەيىن, نەگىزىنەن, پروتوكولدىق قانا مىندەتتەردى اتقارۋمەن كەلگەن قازاقستان سىرتقى ىستەر مينيسترلىگى باسشىلارىنىڭ بىرەن-سارانى بولماسا, كوپشىلىگى كاسىبي ديپلوماتتار ەمەس ەدى. قازۇۋ-دى ءبىتىرىپ, سىرتقى ساياسات ۆەدومستۆوسىنا قىزمەتكە بارعاندار قاسىم-جومارت كەمەل ۇلىنىڭ ءوز ءىسىنىڭ شەبەرى ءارى تالاپشىل باسشى ەكەندىگىن ايتاتىن. ول نەگىزگى قىزمەتىنە قوسا, قولىنا قالام الىپ, الەمدە بولىپ جاتقان ءتۇرلى وزەكتى ماسەلەلەر جايلى جازىپ ءجۇردى. سوعان قاراپ كوزىقاراقتى وقۋشى ونىڭ سىرتقى ىستەردىڭ, ديپلوماتيا سالاسىنىڭ قالامى قۋاتتى, ويشىل, شەبەر اناليتيگى ەكەندىگىن اڭعاردى. ماسەلەن, 1993 جىلى ونىڭ «كاك ەتو بىلو... حرونيكا ۆولنەني ۆ پەكينە (اپرەل-يۋن 1989)» اتتى ەڭبەگىن وقىپ, كورشىلەس الىپ ەلدى دۇرلىكتىرگەن تيانمەنمەن وقيعاسىنىڭ جاي-جاپسارىنا قانىقتىق.
سويتكەن ازامات كوپ ۇزاماي سىرتقى ىستەر ءمينيسترىنىڭ ءبىرىنشى ورىنباسارى, ونان سوڭ سىرتقى ىستەر ءمينيسترى بولىپ تاعايىندالدى. سول جىلدارى ازيا, افريكا, ەۋروپا, اقش سەكىلدى ەلدەردە ەلشىلىكتەرىمىز بىرىنەن سوڭ ءبىرى اشىلىپ جاتتى. ءال-فارابي اتىنداعى قازمۋ-دىڭ حالىقارالىق قاتىناستار, شىعىستانۋ فاكۋلتەتتەرىن بىتىرگەن دارىندى جاستار دا ەلشىلىكتەرگە قىزمەتكە تارتىلدى. 1997 جىلى ساۋىردە مەن دە ساۋد ارابياسى كورولدىگىندەگى ەلشىلىگىمىزگە كەڭەسشى بولىپ تاعايىندالدىم.
ديپلوماتيالىق قىزمەتتە بولعاندىقتان دا ويعا تۇيگەنىم: قاسىم-جومارت توقاەۆتىڭ تۇسىندا سىرتقى ىستەر مينيسترلىگى ەلباسى نۇرسۇلتان نازارباەۆ ايقىنداعان قازاقستاننىڭ كوپۆەكتورلى سىرتقى ساياساتىن دۇرىس ءارى بيىك دەڭگەيدە جۇرگىزدى.
ۋاقىت جىلجىپ ءوتىپ جاتتى. قاسىم-جومارت كەمەل ۇلى 1999 جىلى پرەمەر-مينيستر بولىپ تاعايىندالىپ, 2002 جىلعا دەيىن وسى اسا جاۋاپتى لاۋازىمدا قىزمەت ەتتى. بۇل ەلىمىز اياعىنان ەندى عانا قاز تۇرىپ, ەگەمەندىگىن بەكەمدەي باستاعان قيىن شاق ەدى. وڭىرلەردە ەلەكتر جارىعى ءجيى ءسونىپ, قالالار كەشتەن تاڭعا دەيىن قاراڭعىلىق قۇشاعىندا قالىپ ءجۇردى. جۇرت ءۇيىن جىلىتۋ نەمەسە اس دايىنداۋ ءۇشىن كوشەلەردەگى اعاشتاردى كەسىپ, وتىن رەتىندە پايدالاندى. جۇمىسكەرلەر جالاقىلارىن, زەينەتكەرلەر زەينەتاقىلارىن بىردە السا, بىردە وعان قول جەتكىزە الماي قينالىپ ءجۇردى. ءتىپتى ديپلوماتيالىق قىزمەتتە جۇرگەن ءبىز دە قاراجات تاپشىلىعىنان دەمالىسقا شىعا الماعان كەزىمىز بولدى.
قاسىم-جومارت توقاەۆ ۇكىمەت باسشىسى رەتىندە وتە سابىرلى, قانداي ماڭىزدى ءىس بولسىن تەرەڭ ويلاپ بارىپ شەشەتىن ساياساتكەر رەتىندە تانىلدى.
قاسىم-جومارت توقاەۆ ودان كەيىنگى جىلدارى مەملەكەتتىك حاتشى – سىرتقى ىستەر ءمينيسترى قىزمەتىن اتقارىپ, ەلباسى نۇرسۇلتان نازارباەۆ تاپسىرعان ىستەردى ءاردايىم بيىك دەڭگەيدە ورىنداپ وتىردى. سونداي-اق ەلباسىنىڭ باستاماسىمەن قۇرىلعان ازياداعى ءوزارا ءىس-قيمىل جانە سەنىم شارالارى جونىندەگى كەڭەس شەشىمدەرىنىڭ ىسكە اسىرىلۋىنا جانە باسقا دا ستراتەگيالىق ماڭىزى بار ماسەلەلەردىڭ وڭتايلى ورىندالۋىنا بەلسەنە اتسالىستى. بىرىككەن ۇلتتار ۇيىمى باس حاتشىسىنىڭ ورىنباسارى ءارى جەنەۆاداعى بۇۇ بولىمشەسىنىڭ باس ديرەكتورى قىزمەتىندەگى ازيانىڭ العاشقى وكىلى بولدى. ول قىزمەتتە دە وزىندىك ءىز قالدىردى.
ال پارلامەنت سەناتىنىڭ توراعاسى رەتىندە اسا جاۋاپتى ىستەردىڭ ءبىرى – الەمدىك ءداستۇرلى دىندەر كوشباسشىلارىنىڭ سەزدەرىنىڭ استانادا جوعارى دەڭگەيدە وتۋىنە بارىنشا كۇش سالعانىنا كۋامىز. ادەتتە باستارى قوسىلماق تۇگىل, ءبىر كوشەنىڭ بويىمەن دە جۇرە بەرمەيتىن ءتۇرلى ءدىن وكىلدەرىنىڭ ءبىر-بىرىنە قول بەرىپ, ىزەتپەن سالەم بەرگەنى دە وسى ماڭىزدى ءىس-شارانىڭ ناتيجەسى دەر ەدىك. بۇل وڭاي شارۋا ەمەس-ءتى.
سەزگە الىستان كەلگەن ءبىر قوناق: «قازىر دۇنيە ءجۇزىنىڭ كوپتەگەن ەلى قازاقستانداعىداي كوپۇلتتى ەلدە ورناعان ساياسي تۇراقتىلىق پەن حالىقتار اراسىنداعى دوستىقپەن ماقتانا المايدى. سىزدەر ءوزارا كەلىسىم جولىمەن ساياساتتا دا, ەكونوميكادا دا ۇلكەن جەتىستىكتەرگە جەتىپ كەلەسىزدەر. كونفەسسياارالىق كەلىسىم مەن توزىمدىلىكتى ورناتۋدا قازاقستاننىڭ تابىسى بۇكىل الەمگە ۇلگى-ونەگە», دەپ ءادىلىن ايتسا, ال تاعى ءبىرىنىڭ: «دىندەر سەزى, مەنىڭ بىلۋىمشە, بۇرىن-سوڭدى ەش جەردە ءدال وسىنداي اۋقىمدا وتكەن ەمەس. بۇل – قازاقستان پرەزيدەنتى نۇرسۇلتان ءابىش ۇلى نازارباەۆتىڭ تاعى ءبىر الەمدىك قوعامداستىق تاراپىنان ۇلكەن قولداۋعا يە بولعان باستامالارىنىڭ ءبىرى. ءبىزدىڭ حالىق قازاقستانداعى ءاربىر جاڭالىققا ەلەڭدەپ, ءاربىر وقيعاعا قۋانىپ وتىراتىنىن بىلەسىزدەر», دەگەنى دە جايدان-جاي ايتىلا سالعان ءسوز ەمەس.
سول جىلداردىڭ بىرىندە قاسىم-جومارت توقاەۆ باستاعان سەنات دەپۋتاتتارى مەن ەلىمىزدەگى ءداستۇرلى دىندەر كوشباسشىلارىنان قۇرالعان دەلەگاتسيا ارنايى ۇشاقپەن «بەيبىتشىلىك جولىندا» اتتى دىندەرارالىق حالىقارالىق فورۋمعا قاتىسۋ ءۇشىن يتاليانىڭ نەاپول قالاسىنا بارعانىمىز ەسىمدە. الەمدىك دىندەردىڭ 200-دەن استام وكىلى قاتىسقان جاھاندىق ءماجىلىس «زورلىق-زومبىلىقسىز دۇنيە: دىندەر مەن مادەنيەتتىڭ قاتىسۋى» تاقىرىبىندا ءوتتى. وسى ايتۋلى ءىس-شارانىڭ اشىلۋ سالتاناتىندا ءسوز العان يتاليانىڭ سول كەزدەگى پرەمەر-ءمينيسترى رومانو پرودي, نەاپول مەرى رۋسسو يەرۆولينو جەر بەتىندەگى بەيبىتشىلىك پەن ىنتىماقتا ءومىر ءسۇرۋ – الەم حالىقتارىنىڭ اڭساۋمەن كەلە جاتقان ارمانى ەكەندىگىن باسا ايتىپ, وسى ورايدا استانادا ءوتىپ كەلە جاتقان ءداستۇرلى دىندەر كوشباسشىلارىنىڭ سەزدەرىنە ۇلكەن باعا بەردى. فورۋمدا, سونداي-اق دىنارالىق بىرلىك پەن ىنتىماقتى ساقتاۋداعى قازاقستان تاجىريبەسى مەن اتقارىپ وتىرعان ءىس-شارالارى تۋرالى قاسىم-جومارت كەمەل ۇلى ارنايى بايانداما جاساپ, ەل ابىرويىن بيىك بەلەسكە كوتەرىپ تاستاعانىن كوزىمىز كورىپ, قۇلاعىمىز ەستىدى. وسى رەتتە ەرەكشە اتاپ وتەرلىك ءبىر جايت – اتالعان فورۋمعا يتاليانىڭ سول كەزدەگى پرەزيدەنتى دجوردجيو نەاپوليتانو مىرزا دا قاتىسىپ, قازاقستان رەسپۋبليكاسىنىڭ سەنات توراعاسى مەن ول باستاپ كەلگەن دەلەگاتسياعا قۇرمەت كورسەتكەن ەدى.
2004 جىلى سىرتقى ىستەر ءمينيسترى كەزىندە قاسىم-جومارت كەمەل ۇلى ەلباسىنىڭ ساۋد ارابياسى كورولدىگىنىڭ استاناسى – ار-رياد پەن قاسيەتتى مەككە مەن مەديناعا رەسمي ساپارىنىڭ بيىك دەڭگەيدە ءوتۋىن ۇيىمداستىردى. تۇڭعىش پرەزيدەنتىمىز قاسيەتتى قاعباعا كىرىپ ءمىناجات ەتتى. مەدينادا پايعامبارىمىزدىڭ (c.ع.س.) مەشىتتەرى مەن تۇرعان مەكەنجايلارىندا بولدى.
قاسىم-جومارت كەمەل ۇلى – وزىنە ەلباسى تاپسىرعان قانداي قىزمەت بولسىن ارقاشان ونىڭ بەدەلىن ارتتىرىپ, بيىك بەلەسكە كوتەرىپ وتىراتىن ءوز ءىسىنىڭ بىلگىرى ەكەندىگىن تالاي مارتە تانىتتى.
قاسىم-جومارت توقاەۆتىڭ «قازاقستان
رەسپۋبليكاسىنىڭ ديپلوماتياسى» اتتى كىتابى (2001) قازاقستان تاۋەلسىزدىگىنىڭ 10 جىلدىعىنا ارنالعان. وندا قازاقستاننىڭ سىرتقى ساياساتىنىڭ قالىپتاسۋى مەن دامۋ ۇدەرىسىنە جان-جاقتى تالداۋ جاسالعان. اۆتور شەتەلدەردە قازاقستاندىق مەملەكەتتىلىكتىڭ ارحيتەكتورى رەتىندە تانىلعان پرەزيدەنت نۇرسۇلتان نازارباەۆتىڭ حالىقارالىق قىزمەتىنە ايرىقشا نازار اۋدارعان. ال كەلەسى «جارىق جانە كولەڭكە» كىتابىندا قازاقستاننىڭ سىرتقى ساياسي باعىتىنىڭ قالىپتاسۋ تاريحى, دامۋى مەن نىعايۋىن ءسوز ەتەدى. وندا اۆتور ەلباسىنىڭ سان قىرلى حالىقارالىق قىزمەتىنە كەڭىنەن توقتالعان. سونداي-اق زامانىمىزدىڭ كورنەكتى ساياساتكەرلەرى مەن ديپلوماتيا تۇلعالارىنا قاتىستى ويلارىن دا ورتاعا سالعان. بۇل رەتتە دۇنيەجۇزىلىك ساياساتتانۋ ادەبيەتتەرىندە جاريالانباعان بىرەگەي ماتەريالدار مەن مالىمەتتەردى قولدانعان. كىتاپتا قازىرگى قازاقستاننىڭ دامۋى تۋرالى كەڭ تۇسىنىك بەرەتىن تاريحي فاكتىلەر دە بار.
پرەزيدەنتتىڭ 2020 جىلدىڭ قاڭتارىندا جاريالانعان «اباي جانە ءححى عاسىرداعى قازاقستان» اتتى ماقالاسى دا ويلى دۇنيە. ءبىز ابايدى ۇلىقتاۋ ارقىلى ەلىمىزدى تانىتىپ, بەدەلىن اسقاقتاتاتىنىمىز ءسوزسىز. مەملەكەت باسشىسى اباي جايلى ساليقالى وي تۇيە وتىرىپ, بىرقاتار كەلەلى ماسەلەنى كوتەرگەن. ماقالا حالىقتىڭ رۋحىن كوتەرىپ, پرەزيدەنتكە دەگەن ريزاشىلىعىن ارتتىرا ءتۇستى.
سونداي-اق قاسىم-جومارت توقاەۆ: ء«ابۋ ناسىر ءال-فارابي – وتىراردىڭ ۇلى پەرزەنتى, ادامزاتتىڭ كەمەلدىلىككە ۇمتىلۋ جولىنداعى ماڭىزدى باعدار. قازاق حالقى ءال-ءفارابيدى قادىرلەيدى, ونى ورتا عاسىرلارداعى سياقتى, قازىرگى XXI عاسىردا دا ادامزاتتىڭ ەڭ جاقسى ۇلدارىنىڭ قاتارىنا جاتقىزادى», دەيدى.
قاسىم-جومارت كەمەل ۇلى – قازاق ديپلوماتتارى اراسىنان العاش رەت 5 تومعا جيناقتالعان ساياسي ماقالالار جازعان, جازۋ ءستيلى مەيلىنشە ادەمى جانە جەكە كوزقاراستارىنداعى العىرلىق پەن وي بيىكتىگى ايرىقشا قايراتكەر ەكەندىگىن ايتقان ءجون. ول اسا جاۋاپتى قىزمەتتەردە ءجۇرىپ, عىلىممەن دە اينالىستى. اۋەلى 1998 جىلى «ازيا-تىنىق مۇحيت مەملەكەتتەرى قازاقستاننىڭ سىرتقى ساياساتىندا» كانديداتتىق ديسسەرتاتسياسىن, ال 2001 جىلى «الەمدىك جاڭا ءتارتىپتىڭ قالىپتاسۋ كەزىندەگى قازاقستان رەسپۋبليكاسىنىڭ سىرتقى ساياساتى» تاقىرىبىندا دوكتورلىق ديسسەرتاتسياسىن قورعادى. وسى عىلىمي ەڭبەكتەرىندەگى ويلى تالداۋلاردان ونىڭ شالقار ءبىلىمى, جان-جاقتى تەرەڭدىگى بايقالادى.
2019 جىلعى 19 ناۋرىزدا ەلباسى نۇرسۇلتان نازارباەۆ قازاقستان حالقىنا ۇندەۋىن جاريالاپ: «تاۋەلسىز قازاقستان مەملەكەتىنىڭ نەگىزىن قالاۋشى رەتىندەگى الداعى مىندەتىم – باسشىلاردىڭ جاڭا بۋىنىنىڭ بيلىككە كەلۋىن قامتاماسىز ەتۋ. ولار ەلىمىزدى جاڭعىرتۋ پروتسەستەرىن جالعاستىراتىن بولادى.
قازاقستانداعى بيلىك ساباقتاستىعى كونستيتۋتسيالىق تۇرعىدان رەتتەلگەن. پرەزيدەنتتىڭ وكىلەتتىگى مەرزىمىنەن بۇرىن توقتاتىلعان جاعدايدا ونىڭ وكىلەتتىگى قالعان مەرزىمى اياقتالعانعا دەيىن سەنات توراعاسىنا بەرىلەدى. سودان كەيىن جاڭا پرەزيدەنت سايلاۋى بولادى.
قازىر پارلامەنت سەناتىنىڭ توراعاسى – قاسىم-جومارت كەمەل ۇلى توقاەۆ. ونى سىزدەر جاقسى بىلەسىزدەر. ول ماسكەۋ مەملەكەتتىك حالىقارالىق قاتىناستار ينستيتۋتىنىڭ تۇلەگى, عىلىم دوكتورى. اعىلشىن جانە قىتاي تىلدەرىن ەركىن مەڭگەرگەن. باسشىلىق لاۋازىمداردا قىزمەت ەتىپ, مول تاجىريبە جينادى. ەلىمىزدىڭ سىرتقى ساياساتىنىڭ قالىپتاسۋ جىلدارىندا سىرتقى ىستەر ءمينيسترى, پرەمەر-ءمينيستردىڭ ورىنباسارى جانە پرەمەر-مينيستر, سەنات توراعاسى بولدى. ەلىمىزدى, ونىڭ ەكونوميكاسى مەن ساياساتىن جەتىك بىلەدى.
بىرىككەن ۇلتتار ۇيىمى باس حاتشىسىنىڭ ورىنباسارى بولىپ جۇمىس ىستەدى. بۇل – ونىڭ ديپلومات رەتىندە سىڭىرگەن ەڭبەگىنىڭ جانە قازاقستانعا دەگەن زور سەنىمنىڭ جەمىسى.
ول قازاقستان تاۋەلسىزدىگىنىڭ العاشقى كۇندەرىنەن باستاپ مەنىمەن بىرگە جۇمىس ىستەپ كەلەدى. مەن ونى جاقسى بىلەمىن. ول – ادال ءارى جاۋاپكەرشىلىگى جوعارى ازامات. ەلىمىزدىڭ ىشكى جانە سىرتقى ساياساتىن جان-جاقتى سەزىنەدى. ول بارلىق باعدارلامالاردى ازىرلەۋگە جانە قابىلداۋعا اتسالىستى.
قاسىم-جومارت كەمەل ۇلى قازاقستاندى باسقارۋعا ناعىز لايىقتى ازامات دەپ سەنەمىن», دەپ مالىمدەپ, تاريحي دا كورەگەندىك شەشىمىن قابىلدادى.
تۇڭعىش پرەزيدەنتىمىز ادام تاني بىلەدى. سول سەبەپتى دە ول ءوزى قۇرىپ, نەگىزىن قالاعان تاۋەلسىز مەملەكەتىمىزدىڭ تاعدىرى مەن بولاشاعىن ەل باسىنداعى قيلى كەزەڭدە ءوزىنىڭ سەنىمدى سەرىگى بولا بىلگەن قاسىم-جومارت كەمەل ۇلىنا سەنىپ تاپسىردى. ەلباسىنىڭ تاڭداۋىن حالقىمىز دا قولداپ, 2019 جىلدىڭ ماۋسىم ايىندا كەزەكتەن تىس وتكەن پرەزيدەنت سايلاۋىندا قاسىم-جومارت توقاەۆتىڭ كانديداتۋراسىن جاقتاپ داۋىس بەردى.
قاسىم-جومارت توقاەۆ بيلىك تىزگىنىن ۇستاعالى نەبارى ەكى-اق جىل ءوتتى. بۇل – تاريح ءۇشىن وتە قىسقا مەرزىم. بىراق وسى مەرزىم ىشىندە پرەزيدەنتىمىز تۋعان ەلىن بيىك بەلەسكە كوتەرۋ جولىندا كوپ ەڭبەك ءسىڭىردى. سونىڭ ىشىندە حالقىمىز ءۇشىن ەڭ ماڭىزدىسى – ۇزاققا سوزىلعان جەر ماسەلەسىن شەشىپ, داۋعا نۇكتە قويدى. «حالىق ۇنىنە قۇلاق اساتىن مەملەكەت» تۇجىرىمداماسىن ۇسىنىپ, بيلىك پەن بۇقارا اراسىن جاقىنداتۋعا, قوعامدا الەۋمەتتىك ادىلدىك پەن ءتارتىپ ورناتۋعا, سىبايلاس جەمقورلىقتى اۋىزدىقتاۋعا, وڭىرلەردى وركەندەتىپ, ەل ىرگەسىن بەكىتۋگە, كاسىپكەرلىكتى ورىستەتۋگە, ۇلتتىق قۇندىلىقتارىمىزدى ۇلىقتاۋعا باسا كوڭىل ءبولىپ وتىر. مۇقتاج جاندارعا ۇنەمى كومەك قولىن سوزىپ كەلەدى. پرەزيدەنتتىك جاستار كادرلىق رەزەرۆى جاساقتالدى.
ەكى جىل ىشىندە سىنعا تۇسكەن بىرنەشە كۇتپەگەن وقيعا دا بولدى. 2019 جىلدىڭ مامىرىندا ارىس قالاسىندا الدەكىمدەردىڭ جاۋاپسىزدىقتارىنان وق-دارىلەر جارىلىپ, حالىق قاسىرەتكە دۋشار بولعاندا پرەزيدەنتىمىز حالقىنىڭ قاسىنان تابىلدى. جانىنا جۇبانىش بولىپ, جۇرتتى سابىرعا شاقىرىپ, ەلىنە كومەك كورسەتۋدى ۇيىمداستىرا ءبىلدى. قوردايداعى قاقتىعىسقا بايلانىستى جەرگىلىكتى تۇرعىندارمەن جولىعىپ, جاعدايدى تۇراقتاندىردى.
2020 جىلى ماۋسىم ايىندا وزبەكستانداعى ساردوبا بوگەتى جارىلىپ, جويقىن سۋ كوپىرى ماقتاارال اۋدانىن باسىپ, جۇرت مال-مۇلكىنەن ايىرىلىپ, سۋ استىندا قالىپ ابىرجىعاندا دا حالقىن سابىرعا شاقىرۋمەن قاتار, كومەكتىڭ دەر كەزىندە جاسالۋىنا ۇيىتقى بولدى. ءار جولى قازاقستان سىندى قۋاتتى مەملەكەتتىڭ ەشكىمدى دە قايعى-قاسىرەتىمەن جەكە, قاراۋسىز قالدىرمايتىنىنا كوز جەتكىزدى. حالىقتى جۇباتىپ, ءۇي-جاي سالىنۋىن ءوز باقىلاۋىنا الدى.
بۇكىل الەمدى ءدۇر سىلكىندىرگەن كوروناۆيرۋس پاندەمياسى ءبىزدىڭ ەلدى دە شارپىماي قويعان جوق. ونىمەن كۇرەسكە جاۋاپتى تۇلعالار اۋەلگىدە ابدىراپ قالدى. ايتسە دە پرەزيدەنت قاسىم-جومارت توقاەۆ جاعدايدى دەرەۋ ءوز قولىنا الىپ, قاتەرلى ىندەتكە قارسى شارالار پارمەندى دە تاباندى جۇرگىزىلۋ ۇستىندە. مەملەكەتىمىز ادام ءومىرى ءۇشىن قولدان كەلگەننىڭ ءبارىن جاساۋدا. بۇل قيىنشىلىقتان دا, ينشاللا, ەلىمىز ابىرويمەن شىعاتىنىنا كۇمان جوق.
حالقىن سۇيەتىن, حالقى دا ونى قادىرلەيتىن پرەزيدەنتىمىز ەلباسىنىڭ ۋاقىت سىنىنان وتكەن سارابدال ساياساتىن لايىقتى جالعاستىرىپ, قاي سالادا بولسىن سىندارلى ساباقتاستىقتى ساقتاپ, تالاي سىننان سۇرىنبەي, ابىرويمەن ءوتتى. حالقىن اۋىزبىرلىككە, ىنتىماققا شاقىرا وتىرىپ, قازاقستاندى العا – جارقىن بولاشاققا باستاپ كەلەدى. ەڭ باستىسى – ەلى وعان سەنەدى.
ءابساتتار قاجى دەربىسالى,
ۇعا اكادەميگى, فيلولوگيا عىلىمدارىنىڭ دوكتورى, پروفەسسور
