ادامى اۋرۋدان قىسىلىپ جاتقان ۇيگە جەدەل جاردەم ماشينالارى جاقىنداي الماي, كوشەگە توقتاپ, سىرقات جاندى جاياۋ الىپ شىعۋعا ءماجبۇر. ال ءورت شىققان وسىنداي ۇيلەرگە جاقىنداي الماۋ زارداپ شەگۋشى ادامداردىڭ قاسىرەتىن ارتتىرا تۇسەدى. ويتكەنى ءاربىر مينۋت ساناۋلى ساتتە ءورت سوندىرۋشىلەر جان-جاعىن تۇگەل قورشاپ تاستاعان ءۇيدىڭ قاقپالارىن بۇزىپ اشۋعا الەكتەنىپ, ۋاقىتتارىن جوعالتادى.
وسىنداي وقيعانىڭ ءبىرى جۋىردا بولدى. قالا ورتاسىنداعى پ.ۆاسيلەۆ كوشەسىندەگى 7 پاتەرلى ءۇش قاباتتى, تۇرعىندارى جان-جاعىن تۇگەل قورشاپ العان ەليتالىق ۇيدە ءورت شىققاندا سوندىرۋشىلەر جۇمىس ىستەي الماي كوپ قينالدى. ايتەۋىر, جاس جىگىتتەر بيىك اۋلانىڭ ىشىنە سەكىرىپ ءتۇسىپ, سۋ اتاتىن شلانگىنى وتكىزە الدى.
ء«بىرىنشى قاباتتان ءۇشىنشى قاباتقا دەيىنگى جالىنعا ورانعان بالكوندارعا ءبىز كىرە الماي جۇرگەندە كۇشەيىپ العان وتتىڭ قىزۋى جاقىنداتپاعان سوڭ تومەننەن سوندىرە الماي, ءۇيدىڭ توبەسىنە شىعىپ وشىرۋگە تۋرا كەلدى. ءورت ءسوندىرۋ بارىسىندا 12 ادامدى ەۆاكۋاتسيالاپ, 2 ادامدى ورتتەن الىپ شىقتىق. ايتەۋىر, قازا بولعاندار مەن زارداپ شەككەندەر جوق. تەك پاتەرلەردىڭ تەرراساسى مەن بارلىق 3 قاباتتاعى بالكوندار جويىلىپ, پاتەرلەردىڭ پلاستيكالىق كونسترۋكتسيالارى زاقىمدالدى», دەدى وبلىستىڭ توتەنشە جاعدايلار دەپارتامەنتى باستىعىنىڭ ورىنباسارى, ازاماتتىق قورعاۋ پولكوۆنيگى ورال ءابدىراحمانوۆ.
سوڭعى كەزدە جيىلەپ كەتكەن ءورت وقيعالارى وسىنداي كەدەرگىلەردى جويۋعا ءماجبۇر ەتىپ وتىر. جۋىردا «ارنايى كولىككە – جاسىل جارىق!» ءىس-شاراسى قولعا الىندى. ونىڭ اياسىندا پەتروپاۆل قالاسى تج باسقارماسىنىڭ جەكە قۇرامى مەن سولتۇستىك قازاقستان وبلىستىق تج دەپارتامەنتىنىڭ ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى بىرلەسىپ, وبلىس ورتالىعىنىڭ اۋلالارىندا رەيد وتكىزدى. ونىڭ ماقساتى – تۇرعىندارى قاۋىپسىزدىك ەرەجەلەرىنىڭ تالاپتارىنا نەمقۇرايدى قارايتىن اۋلالاردى انىقتاۋ, اۋلالارعا كىرەبەرىستەرگە قويىلعان تەمىربەتون بلوكتار مەن قورشاۋلاردى جويۋ. توتەنشە وقيعا ورنىنا شۇعىل كەلەتىن, قاجەتتى كومەك كورسەتەتىن, ادام ءومىرىن قۇتقاراتىن ءورت سوندىرۋشىلەر مەن جەدەل جاردەمنىڭ جانە ت.ب. ارنايى كولىكتەردىڭ ءوتۋ جولدارىن بوساتۋ. رەيد ناتيجەسىندە نازارباەۆ, بولاتباەۆ, حيمەنكو, ءۋاليحانوۆ جانە شۋحوۆ كوشەلەرىندەگى كوپ قاباتتى ۇيلەردىڭ اۋلالارىنان 8 بەتون بلوك پەن 11 مەتالل قورشاۋ الىندى. جولى كەدەرگىلەرگە تولى باسقا كوشەلەردەگى ۇيلەردىڭ تۇرعىندارىمەن جينالىستار وتكىزىلىپ, جادىنامالار تاراتىلدى.
جازدىڭ ىستىق كۇندەرىنىڭ جۇرتتى ابىگەرگە سالعان تاعى ءبىر قاسىرەتى – سۋعا باتۋشىلاردىڭ جيىلەۋى. تج دەپارتامەنتىنىڭ باستىعى, ازاماتتىق قورعاۋ پولكوۆنيگى راميل كامالوۆتىڭ ايتۋىنا قاراعاندا, وبلىس اۋماعىندا 12 كول مەن ەسىل وزەنىنىڭ جاعاسىندا ورنالاسقان 58 جاعاجايدا عانا شومىلۋعا رۇقسات ەتىلگەن. قالعاندارىندا شومىلعان ادامدار ءتارتىپ بۇزۋشىلار بولىپ سانالادى. بىراق وعان قاراپ جاتقان ەشكىم جوق. مامىردىڭ مي قايناتار ىستىعى ادامداردى ەڭ جاقىن سۋ قويمالارىنا قۋىپ تىقتى. سوڭعى 7 جىلدا وبلىس بويىنشا 180 ادام سۋعا كەتكەن, ونىڭ ىشىندە 24 بالا بار. ال بىلتىر 9 ادام سۋعا باتقان ەدى, ونىڭ بىرەۋى بالا.
تج دەپارتامەنتى باستىعىنىڭ ورىنباسارى, مايور مۇرات قانعوجينوۆ: «بۇگىنگى كۇنى شومىلۋ جانە بالىق اۋلاۋ ورىندارى بويىنشا 34 پاترۋلدەۋ جۇرگىزىلدى, 1300-دەن استام جادىناما مەن بروشيۋرا تاراتىلدى, اڭگىمەلەر مەن دارىستەر وتكىزىلدى», دەدى. سونداي-اق ول سۋدا ارقاشان دا ساق بولىپ, جابدىقتالماعان ۋچاسكەلەردە, ماس كۇيىندە, تۇنگى ۋاقىتتا شومىلۋدىڭ, بالالاردى سۋ قويمالارىنىڭ جانىندا قاراۋسىز قالدىرۋ قاۋىپتى ەكەنىن ايتتى.
سولتۇستىك قازاقستان وبلىسى
