كونتسەرتتىك باعدارلاماعا ورىس مۋزىكالىق ءرومانتيزمى داۋىرىندەگى ۆوكالدىق مينياتيۋرالار ەنىپ, م.بالاكيرەۆ, م.مۋسورگسكي, ا.بورودين, ن.ريمسكي-كورساكوۆ, تس.كيۋي سىندى كومپوزيتورلاردىڭ ۇزدىك تۋىندىلارى شىرقالدى. بۇل شىعارمالاردىڭ پوەتيكالىق نەگىزىن ءحىح عاسىردىڭ ءبىرىنشى جارتىسىنداعى ورىس اقىندارىنىڭ ولەڭدەرى قۇرادى. رومانستارمەن جۇمىس ىستەي وتىرىپ, كومپوزيتورلار ءمان-ماعىناعا, پوەتيكالىق ءماتىندى تاڭداۋعا, ونى جۇزەگە اسىرۋدىڭ ەكسپرەسسيۆتى قۇرالدارىنا ۇلكەن تالاپتار قويدى.
كەش بارىسىندا تىڭدارماندار مۋزىكالىق شەدەۆرلەردى ارتىستەرمەن ءبىر ساحنادا وتىرىپ تاماشالادى. قازاقستاننىڭ ەڭبەك سىڭىرگەن قايراتكەرى, «قازاقكونتسەرتتىڭ» كوركەمدىك جەتەكشىسى تيمۋر ۋرمانچەەۆ اتاپ وتكەندەي, كورەرمەندەر كونتسەرتتىڭ تىكەلەي قاتىسۋشىسى بولىپ, ەرەكشە اسەر الدى.
«جۇلدىزبەن ءبىر ساحنادا» جوباسىنىڭ ارقاسىندا كورەرمەندەر ارتىستەرگە جاقىن بولا ءتۇسىپ, ەرەكشە شىعارماشىلىق پروتسەستىڭ قىر-سىرىن تەرەڭىرەك سەزىنە الدى. ورىنداۋشى مەن تىڭداۋشى اراسىنداعى ءدال وسىنداي بايلانىس جاڭا كونتسەرتتەر مەن تۋىندىلاردىڭ پايدا بولۋىنا شابىت بەرىپ, مادەني بايلانىستى ارتتىرا تۇسەدى. بۇگىنگى كەش – جاڭا جوبامىزدىڭ العاشقى كونتسەرتى. الداعى ۋاقىتتا بۇل جوبا تۇراقتى تۇردە وتكىزىلەدى. «قازاقستان» ورتالىق كونتسەرت زالىنىڭ باس ساحناسى تولىققاندى كامەرالىق زالدىڭ فۋنكتسياسىن اتقاردى. زالدىڭ تاماشا اكۋستيكاسى وسىنداي جاڭا تاجىريبەلەرگە جاقسى مۇمكىندىك بەرىپ وتىر» دەدى ماەسترو.
FORTE-TRIO مەملەكەتتىك تريوسىمەن بىرگە ساحنادا قازاقستاننىڭ ەڭبەك سىڭىرگەن قايراتكەرلەرى ايگۇل نيازوۆا (سوپرانو) مەن ازامات جىلتىركوزوۆ (باريتون) ونەر كورسەتتى.
ايتا كەتەيىك, جاڭا جوبا اياسىندا ماۋسىم ايىندا ەلوردالىق كورەرمەننىڭ نازارىنا ءتۇرلى مۋزىكالىق باعىتتاعى كونتسەرتتەر ۇسىنىلادى. ولاردىڭ قاتارىندا قازاق ۇلتتىق مۋزىكاسى, فولكلورلىق اسپاپتىق اۋەندەر, كلاسسيكالىق كونتسەرتتەر, زاماناۋي مۋزىكا, اۆتورلىق كەشتەر, حور-كونتسەرت پەن سپەكتاكلدەر بار.
