ءماسليحاتتاردىڭ قۇزىرەتى ءبىرشاما اۋقىمدى. اتاپ ايتقاندا, ولار ءتيىستى اۋماقتى دامىتۋ جوسپارلارىن, ەكونوميكالىق جانە الەۋمەتتىك باعدارلامالاردى, جەرگىلىكتى بيۋدجەتتى جانە ولاردىڭ اتقارىلۋى تۋرالى ەسەپتەردى بەكىتەدى. اكىمشىلىك-اۋماقتىق بىرلىكتى باسقارۋ سحەماسىن اكىمنىڭ ۇسىنۋى بويىنشا بەكىتەدى, قۇرىلىس ماسەلەلەرىن شەشەدى, جىلۋ ماۋسىمىنا دايىندىق جانە ونى وتكىزۋ, قالالار مەن ەلدى مەكەندەر اۋماقتارىن اباتتاندىرۋ قاعيدالارىن بەكىتەدى. اكىمنىڭ ۇسىنىسى بويىنشا ءماسليحات سەسسياسىنىڭ شەشiمىمەن ءتيىستى اكىمدىكتىڭ دەربەس قۇرامىنا كەلىسىم بەرەدى.
سونىمەن قاتار ءماسليحاتتار اتقارۋشى ورگاندار باسشىلارىنىڭ ەسەپتەرىن تىڭدايدى جانە ءتيىستى ورگاندارعا ءماسليحات شەشىمدەرىن ورىنداماعانى ءۇشىن مەملەكەتتىك ورگانداردىڭ لاۋازىمدى ادامدارىن, سونداي-اق ۇيىمداردى جاۋاپقا تارتۋ تۋرالى ۇسىنىستار ەنگىزە الادى. بۇعان قوسا, ءماسليحاتتار اۋماقتىق جəنە ۋچاسكەلiك سايلاۋ كوميسسيالارىنىڭ مۇشەلەرiن سايلايدى. ءتىپتى جەرگىلىكتى بيۋدجەتتىڭ, اۋماقتى دامىتۋ باعدارلامالارىنىڭ اتقارىلۋىنا باقىلاۋ جاساۋ قۇزىرەتى دە بار. بيۋدجەتتىڭ اتقارىلۋى تۋرالى تەكسەرۋ كوميسسيالارىنىڭ جىلدىق ەسەبىن دە قاراپ, ءتيىستى ۇسىنىستار ەنگىزە الادى.
قۇزىرەتى وسىنشالىق مول بولعانىمەن, ءماسليحاتتاردىڭ قۇقىعى شەكتەۋلى سياقتى. ماسەلەن, قولدانىستاعى زاڭنامادا ءماسليحاتتاردىڭ اۋماقتى دامىتۋدىڭ جوسپارى مەن باعدارلامالارى بويىنشا باستاما جاساۋى تۋرالى ەشتەڭە قاراستىرىلماعان. سودان دا بولار, بۇل جونىندە ءماسليحاتتار ءۇن قاتپايدى. قازىر قوعامدىق ۇيىمدار مەن پارتيالار كەيبىر باستامالاردى كوتەرىپ, ايتالىق, سىبايلاس جەمقورلىققا قارسى كۇرەس نەمەسە «جاسىل قوزعالىس» ۇيىمداستىرىپ جاتقاندا حالىق سايلاعان ءماسليحاتتار ءلام-ميم دەمەي, تەك اكىمدىككە قاراپ ءۇنسىز وتىرادى. سوندىقتان جەرگىلىكتى وكىلدى ورگاندار اكىمنىڭ ۇسىنعان قۇجاتتارىن قاراپ, بەكىتۋمەن اينالىساتىن, دەربەستىگى جوق كوپ مەملەكەتتىك مەكەمەنىڭ ءبىرى سياقتى كورىنەدى.
بۇعان, ارينە, قولدانىستاعى زاڭناماداعى «اكىمنىڭ ۇسىنۋى بويىنشا» دەگەن مىندەتتى شارتتىڭ تىم كوپتىگى دە قۇرساۋ بولاتىن سياقتى. وزگەسىن ايتپاعاندا, ءتىپتى «اكىمدىك جانىنداعى كونسۋلتاتسيالىق-كەڭەسشى ورگانداردىڭ دەربەس قۇرامىن بەكىتۋ»; «وبلىستىڭ (قالانىڭ, اۋداننىڭ) قۇرمەتتى ازاماتى» اتاعىن بەرۋ; «وبلىستىڭ (قالانىڭ, اۋداننىڭ) قۇرمەت گراموتاسىمەن ناگرادتاۋ تۋرالى ەرەجەنى ازىرلەۋ جانە بەكىتۋ» سىندى قۇزىرەتتەرىنىڭ بارىنە «اكىمدىكتىڭ ۇسىنۋى بويىنشا» دەگەن سويلەم تىركەلىپ قويىلعان. اكىمدىك ۇسىنباسا, ءماسليحاتىمىز وسىنداي ماسەلەلەردى دە وزدىگىنەن شەشە المايدى.
ءماسليحاتتاردىڭ مارتەبەسىنىڭ ءىس جۇزىندە قانداي ەكەندىگى جوعارى لاۋازىمدى ساياسي قىزمەتشىلەر جۇمىس بابىمەن وبلىسقا كەلگەن كەزدە دە بايقالىپ قالادى. ولاردىڭ ءبارىن تەك وبلىس اكىمى نەمەسە ونىڭ ورىنباسارى قارسى الىپ, ساپار باعدارلاماسىنا سايكەس نىسانداردى ارالاتىپ كورسەتىپ جۇرەدى. وسى ءۇردىس اۋداندارعا دا تاراعان. وبلىس باسشىلارى جۇمىس ساپارىمەن كەلسە, قاسىندا تەك اۋدان اكىمى نەمەسە ونىڭ ورىنباسارى بىرگە جۇرەدى. مەملەكەتتىك باسقارۋدىڭ ەكىنشى قاناتىنىڭ باسشىلارى كوزگە ىلىنبەي قالادى. وسىنى كورىپ وتىرعان جەرگىلىكتى جۇرتشىلىقتىڭ ماسليحاتتارعا كوزقاراسى قالاي قالىپتاسارى ايتپاسا دا تۇسىنىكتى.
سولتۇستىك قازاقستان وبلىسى
