«سەزىمىمدى سوزبەن ايتىپ جەتكىزە المايمىن. بىراق, شىنىمدى ايتسام, ءوزىمنىڭ قويىلىمىما 100 پايىز كوڭىلىم تولمادى. بۇل كارانتيننەن كەيىنگى العاشقى حالىقارالىق جارىس, سوندىقتان ءبارى ءالى الدا. جارىستا كۇتپەگەن جاعدايلار بولدى, مىسالى جۇرت الدىنا شىعار الدىندا كويلەگىمنىڭ بەلبەۋى جىرتىلىپ قالدى. ونى پاركەتكە شىعار الدىندا عانا تىكتى. اربام دا سىنىپ قالا جازدادى. بىراق, ءبىزدىڭ قۇرامامىزعا ەشنارسە كەدەرگى كەلتىرە المايدى», دەپ ءبولىستى ويىن ماليكا.
باسەكە گەنۋيا قالاسىندا ءوتتى. وندا قازاقستان نامىسىن 4 سپورتشى قورعادى. الەم كۋبوگى 2022 جىلى كورەيادا وتەتىن الەم چەمپيوناتىنا تىكەلەي ىرىكتەۋ بولىپ سانالادى. جارىسقا الەمنىڭ 12 ەلىنەن 300-دەن استام سپورتشى قاتىستى.
«مەن ەشقانداي نانىم-سەنىمگە سەنبەيمىن. مەنىڭ ومىرلىك ۇرانىم: «مەن بولماسام كىم؟» نەمەسە «مەنەن باسقا بۇل ماقساتقا كىم جەتەدى». پارا بي – مەن ءۇشىن ءوزىمدى فيزيكالىق تۇرعىدا شىڭداۋ, شىدامدىلىعىمدى تەكسەرۋ, ال ەڭ الدىمەن كوماندانىڭ بىرلىگى. وسىنىڭ ءبارى العا ۇمتىلۋىما موتيۆاتسيا بەرەدى», دەيدى ماليكا مۇحتاروۆا.
ايتا كەتەيىك, تورەشىلەر بريگاداسىنا قازاقستاننىڭ ەڭبەك سىڭىرگەن جاتتىقتىرۋشىسى, ەلوردالىق پارا بي مەكتەبىنىڭ جاتتىقتىرۋشىسى ءاليا مايدانقىزى شاقىرىلدى. ىرىكتەۋ ۇلتتىق پاراليمپيادا كوميتەتىنىڭ شەشىمىمەن جانە جەكە كوميسسيانىڭ شەشىمىمەن ءوتتى.
