ۇكىمەت باسشىسى قاشاعان كەن ورنىندا گازدى كەشەندى دايىنداۋ قوندىرعىسى – گاز وڭدەۋ زاۋىتىنىڭ قۇرىلىسىن باستاپ بەردى.
كاسىپورىننىڭ وڭدەۋ قۋاتى جىلىنا 1 ملرد م³ دەيىن شيكى كۇكىرتتى گازدى قۇرايدى, ودان 815 ملن م³ تاۋارلىق گاز جانە 119 مىڭ توننا سۇيىتىلعان گاز, 212 مىڭ توننا كۇكىرت جانە 35 مىڭ توننا گاز كوندەنساتى وندىرىلەتىن بولادى. ونى 2023 جىلعى 4 توقساندا پايدالانۋعا بەرۋ كوزدەلگەن.
جوبا ەلىمىزدىڭ گاز وڭدەۋ سالاسىن دامىتۋعا سەرپىن بەرەدى, قاشاعاندا مۇناي ءوندىرۋ دەڭگەيىن تاۋلىگىنە 450 مىڭ باررەلگە دەيىن ۇلعايتۋعا, ەلدى ودان ءارى گازداندىرۋ ءۇشىن رەسۋرستىق بازانى كەڭەيتۋگە جانە مۇناي-گاز ءوندىرىسىنىڭ ەكولوگيالىعىن ارتتىرۋعا مۇمكىندىك بەرەدى. قۇرىلىس كەزەڭىندە مۇندا 2500 دەيىن ۋاقىتشا, ال پايدالانۋ كەزەڭىندە 600 تۇراقتى جۇمىس ورنى قۇرىلادى.
پرەمەر-مينيستر جىلىنا 500 مىڭ توننا پوليپروپيلەن وندىرەتىن قازاقستانداعى العاشقى ينتەگراتسيالانعان گاز-حيميا كەشەنىنىڭ قۇرىلىس بارىسىن تەكسەردى. جوبانى «قازاقستان پەتروكەميكال ينداستريز (KPI)» جشس جۇزەگە اسىرادى. ينۆەستيتسيالاردىڭ جالپى كولەمى $2,6 ملرد قۇرايدى. ونى 2022 جىلعى ناۋرىز ايىندا پايدالانۋعا بەرۋ جوسپارلانعان. كاسىپورىندا 630-دان استام تۇراقتى جۇمىس ورنى اشىلادى. قازىرگى ۋاقىتتا جوبا كەستەسى بويىنشا جالپى پروگرەسس 87,19%-دى قۇرايدى. قۇرىلىسقا 39 قوسالقى مەردىگەر كومپانيا تارتىلعان, ونىڭ 36-سى — قازاقستاندىق. ۇكىمەت باسشىسى بيىل ءساۋىر ايىندا پوليپروپيلەن وندىرەتىن ينتەگراتسيالانعان گاز-حيميا كەشەنىنىڭ جۇمىسىن قامتاماسىز ەتۋ ءۇشىن ازوت جانە سىعىلعان قۇرعاق اۋا شىعاراتىن قوندىرعىسىنىڭ قۇرىلىسىن اياقتاعان «ەر ليكيد قاراباتان تەح گازى» قازاقستان-فرانتسۋز بىرلەسكەن كاسىپورنىنا باردى. زاۋىتتىڭ قۋاتتىلىعى 8 مىڭ نم3/س ازوت جانە 8,1 مىڭ نم3/س سىعىلعان قۇرعاق اۋانى قۇرايدى.
ا. مامين 2020 جىلعى تامىزدا پايدالانۋعا بەرىلگەن قۋاتى جىلىنا 36 مىڭ م² گرەيتينگ جانە 60 مىڭ توننا مىرىشتاۋدى قۇرايتىن «اتىراۋمۇنايماش» جشس گرەيتينگ جانە ىستىقتاي مىرىشتاۋ تسەحىنىڭ جۇمىسىمەن تانىستى. «كاسپي مۇناي» جشس ارالاۋ بارىسىندا پرەمەر-مينيسترگە اتىراۋ وبلىسىنىڭ جىلىوي اۋدانىنداعى «ايرانكول» كەن ورنىن 2019-2021 جىلدارى جۇرگىزىلگەن تسيفرلاندىرۋدىڭ ناتيجەلەرى تانىستىرىلدى – مۇناي ءوندىرۋ 10%-عا ارتتى, شىعىندار 30%-عا ازايدى, وپەراتسيالىق قىزمەت 80%-عا جەتىلدىرىلدى, مۇناي قالدىقتارىنىڭ كولەمى قىسقارتىلدى, پاندەميا كەزەڭىندە كەن ورنىن قاشىقتان باقىلاۋ جانە باسقارۋ مۇمكىندىگى ەنگىزىلدى.
ساپار بارىسىندا ۇكىمەت باسشىسى بەكىرە بالىعىن وسىرەتىن «Kaspi Bekiresi Limited» بالىق ءوسىرۋ شارۋاشىلىعىنىڭ قىزمەتىمەن تانىستى. قىسقا مەرزىمدى كەزەڭدە كاسىپورىننىڭ ءوندىرىس كولەمىن جىلىنا 30 توننا بالىق ەتى مەن 3 توننا ۋىلدىرىققا دەيىن جەتكىزۋ جوسپارلانۋدا.
پرەمەر-مينيسترگە سونداي-اق اتىراۋ قالاسىنىڭ تىنىس-تىرشىلىگىن قامتاماسىز ەتۋ ينفراقۇرىلىمىن دامىتۋ تۋرالى باياندالدى. جۇمىس ساپارىنا اتىراۋ وبلىسىنىڭ اكىمى ماحامبەت دوسمۇحامبەتوۆ, قر پرەزيدەنتىنىڭ كومەكشىسى قانات بوزىمباەۆ, ەنەرگەتيكا ءمينيسترى نۇرلان نوعاەۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, «سامۇرىق-قازىنا» اق باسقارما توراعاسى الماسادام ساتقاليەۆ, «قازترانسگاز» اق باسقارما توراعاسى قايرات شارىپباەۆ, «بايتەرەك» ۇبح» اق باسقارما توراعاسى ايدار ءارىپحانوۆ, «قازاقستاننىڭ دامۋ بانكى» اق باسقارما توراعاسى اباي سارقۇلوۆ جانە ت. ب. قاتىستى.
