سپورت • 08 ماۋسىم، 2021

«كريتەريۋم ديۋ دوفينەنىڭ» ۆيتسە-چەمپيونى

22 رەت كورسەتىلدى

ۆەلوسپورتتان قازاقستان چەمپيونى الەكسەي لۋتسەنكو فرانتسيا تاس جولدارىندا وتكەن «كريتەريۋم ديۋ دوفينەنىڭ» سوڭعى تاۋلى كەزەڭىندە جالپى ەسەپتەگى جۇلدەلى ورنىن ءساتتى قورعاپ، ءبىر اپتاعا سوزىلعان كوپكۇندىكتە 2-ورىنعا يە بولدى.

لا لەشەر مەن لە-جە قالالارىن جالعاعان سوڭعى تاۋلى كەزەڭدە قازاقستاندىق ۆەلوشاباندوز تاماشا ونەر كورسەتىپ، مارە سىزىعىن 7-ءشى بولىپ كەستى. بۇل ناتيجە وعان «كريتەريۋم ديۋ دوفينە-2021» ۆەلوجارىسىنىڭ ۆيتسە-چەمپيونى اتانۋعا جەتكىلىكتى بولدى. ال بۇعان دەيىن پاريج – نيتستسا جانە تۋرە داۋن اندەر جارىستارىندا ەكى مارتە جەڭىسكە جەتىپ، شۆەيتساريا تۋرى، كاتالونيا ۆۋەلتاسى جانە رومانديا تۋرىندا ۇزدىك شىققان اۋستراليالىق ريچي پورت (Ineos Grenadiers) كوپكۇندىكتىڭ جەڭىمپازى اتاندى. Ineos Grenadiers كومانداسىنىڭ تاعى ءبىر وكىلى بريتانيالىق گەراينت توماس ۇزدىك ۇشتىكتى تۇيىندەدى.

سونداي-اق Astana-Premier Tech-تىڭ تاعى ءبىر شاباندوزى – يون يساگيررە سوڭعى ەكى شەشۋشى تاۋلى كەزەڭدە لۋتسەنكوعا قولداۋ كورسەتىپ، جالپى ەسەپتە 7-ورىنعا يە بولدى. ال سوڭعى بيىك تاۋلى كەزەڭ مارك پادۋننىڭ (Bahrain Victorious) جەڭىسىمەن اياقتالدى. دەگەنمەن ۋكراينالىق ۆەلوشاباندوز قاتارىنان كەيىنگى ەكى بيىك تاۋلى كەزەڭدە جەڭىسكە جەتكەنىمەن، جالپى ەسەپتە ۇزدىكتەر قاتارىنان كورىنە المادى. ەكىنشى ورىندى دانيالىق ۆەلوشاباندوز يوناس ۆينگەگور (Jumbo-Visma) يەلەنسە، اۋستراليالىق پاتريك كونراد (Bora-Hansgrohe) ءۇشىنشى ساتىعا تابان تىرەدى.

«جالپى ەسەپتە ۇزدىكتەر قاتارىنان كورىنگەنىمە قۋانىشتىمىن. مۇنداي ءىرى جارىستى ەكىنشى بولىپ اياقتاۋ جانە كەزەڭدەردىڭ بىرىندە جەڭىسكە جەتۋ مەن ءۇشىن كەرەمەت ناتيجە دەپ ايتا الامىن. بۇل جارىستا مىقتى سپورتشىلار كوپ بولدى. سوندىقتان ريچي پورت جانە گەراينت توماسپەن قاتار جەڭىس تۇعىرىنا كوتەرىلۋ – ەرەكشە جەتىستىك. كوماندا اپتا بويى جارىس­تى جوعارى دەڭگەيدە وتكىزدى. ماعان كومەك كورسەتكەن جىگىتتەردىڭ بارلىعىنا، اسىرەسە يونعا العىسىم شەكسىز. ولار سوڭعى ەكى كۇندە ماعان ۇلكەن قولداۋ كورسەتتى. سونىڭ ارقاسىندا جەڭىس تۇعىرىنا كوتەرىلدىم. ەندى «تۋر دە فرانسقا» دەيىن ءبىراز دەمالىپ، قايتا بابىما كەلەمىن»، دەدى الەكسەي لۋتسەنكو.

 

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

ۇقساس جاڭالىقتار