«نورما شىعارماشىلىقتى جەتىلدىرۋ بويىنشا شارالار قابىلداندى. ءتيىستى زاڭعا بيىلعى 12 ناۋرىزدا قول قويىلدى. زاڭ شىعارۋ پروتسەسىنە جاڭا كەزەڭدەردى ەنگىزۋ, زاڭ جوبالارىنىڭ ساپاسىن قامتاماسىز ەتۋ جانە زاڭ شىعارۋ پروتسەسىنە جۇرتشىلىقتى كەڭىنەن تارتۋ كوزدەلەدى», دەدى م.بەكەتاەۆ. ونىڭ ايتۋىنشا, ۇلتتىق زاڭنامانىڭ نەگىزگى سالالارىن جەتىلدىرۋ اياسىندا مينيسترلىك مەملەكەتتىك ورگاندارمەن جانە وتاندىق عالىمدارمەن بىرلەسىپ, 2030 جىلعا دەيىنگى قۇقىقتىق ساياسات تۇجىرىمداماسىنىڭ جوباسى ازىرلەگەن.
«تۇجىرىمداما ۇلتتىق قۇقىقتى, قۇقىق قورعاۋ جانە سوت جۇيەسىن, سىرتقى ساياسي جانە سىرتقى ەكونوميكالىق قىزمەتتى, سونداي-اق قۇقىقتىق ءبىلىم مەن قۇقىقتىق ناسيحاتتى دامىتۋدىڭ باسىم باعىتتارىن ايقىندايدى. قۇقىقتىق جۇيەنى جەتىلدىرۋ جونىندەگى وسى شارالار قازاقستاننىڭ ودان ءارى ورنىقتى دامۋىنىڭ قاجەتتى قۇقىقتىق العىشارتتارىن قالايدى دەپ پايىمدايمىز», دەدى مينيستر.
ودان بولەك, جىلجىمايتىن مۇلىكتىڭ كەپىلىن تىركەۋ مەرزىمى 1 جۇمىس كۇنىنە دەيىن قىسقارتىلاتىنى ءمالىم بولدى.
«جىلجىمايتىن م ۇلىك كەپىلىن ەلەكتروندى تىركەۋ ەنگىزىلدى. ەندى بانكتەر مەنشىك يەسىمەن كەپىل شارتىن جاساسقاننان كەيىن ونى ەلەكتروندى تىركەۋگە جىبەرە الادى, بۇل ازاماتتاردىڭ حالىققا قىزمەت كورسەتۋ ورتالىقتارىنا جۇگىنۋىن توقتاتادى. كەپىلدى تىركەۋ مەرزىمى 3 جۇمىس كۇنىنەن 1 جۇمىس كۇنىنە دەيىن قىسقارتىلدى», دەپ حابارلادى ۆەدومستۆو باسشىسى.
مينيستر اتاپ وتكەندەي, سونىمەن بىرگە جىلجىمايتىن مۇلىكتىڭ بىرىڭعاي مەملەكەتتىك كاداسترىن قۇرۋ جۇمىستارى جۇرگىزىلۋدە. بۇل جۇيەنى قولدانۋ ازاماتتارعا ءبىر ءوتىنىش نەگىزىندە جەر ۋچاسكەسىنە قۇقىقتى تىركەۋگە مۇمكىندىك بەرەدى. وسىلايشا, قىزمەتتەردى كورسەتۋ مەرزىمدەرى جانە سايكەسىنشە ازاماتتاردىڭ قارجىلىق شىعىندارى ازايادى.
ءمينيستردىڭ ايتۋىنشا, Nur Otan پارتياسىنىڭ سايلاۋالدى باعدارلاماسىن ىسكە اسىرۋ ماقساتىندا مەملەكەت كەپىلدىك بەرگەن زاڭ كومەگىن 2024 جىلعا دەيىن 2 ەسەگە ۇلعايتۋ ماسەلەسى پىسىقتالۋدا.
«مەملەكەت كەپىلدىك بەرگەن زاڭ كومەگىن كورسەتۋ ساپاسىن ارتتىرۋ ماقساتىندا بيىلعى جىلدىڭ ناۋرىز ايىنان باستاپ, رەسپۋبليكا بويىنشا «ە-زاڭ كومەگى» اقپاراتتىق جۇيەسى قاناتقاقتى رەجىمدە ەنگىزىلدى. بۇگىنگى تاڭدا تەرگەۋ ورگاندارى مەملەكەت كەپىلدىك بەرگەن زاڭ كومەگى اياسىندا 1042 ادۆوكاتتى تاعايىندادى», دەدى مارات بەكەتاەۆ.
جوبانى ىسكە اسىرۋ ادۆوكاتتاردى تاعايىنداۋ جانە ولاردىڭ ەڭبەگىن تولەۋ پروتسەسىنىڭ اشىقتىعىن قامتاماسىز ەتەدى.
2020 جىلى سوت اكتىلەرىن ورىنداۋدىڭ تيىمدىلىگىن ارتتى-
رۋعا باعىتتالعان «اتقارۋشىلىق ءىس جۇرگىزۋ تۋرالى» زاڭعا تۇزەتۋلەر قابىلداندى. قولدانىستاعى زاڭنامانى بۇزعانى ءۇشىن جەكە سوت ورىنداۋشىلارىنىڭ جاۋاپكەرشىلىگى قاتاڭداتىلدى, ءبىر مەزگىلدە ۋاكىلەتتى جانە قاداعالاۋ ورگاندارىنىڭ, سونداي-اق جەكە سوت ورىنداۋشىلارىنىڭ رەسپۋبليكالىق پالاتاسىنىڭ وكىلەتتىكتەرى كۇشەيتىلىپ, كەڭەيتىلدى.
«قابىلدانعان زاڭنامالىق شارالار ناقتى ورىندالعان قۇجاتتار سانىنىڭ 45% ارتۋىنا ىقپال ەتتى», دەدى ادىلەت ءمينيسترى.
ۆەدومستۆو باسشىسىنىڭ ايتۋىنشا, بىرنەشە جىل بويى جۇرگىزىلىپ جاتقان دايەكتى رەفورما جانە اتقارۋشىلىق ءىس جۇرگىزۋدىڭ ەلەكتروندى فورماتقا كوشۋى ءوزىنىڭ قابىلەتتىلىگىن كورسەتتى. ەلدەگى توتەنشە جاعداي كەزەڭىندە اتقارۋشىلىق ءىس جۇرگىزۋ ورگاندارىنىڭ اۆتومات-
تاندىرىلعان اقپاراتتىق جۇيەسى ماجبۇرلەپ ورىنداۋ شارالارىن ۇزدىكسىز قابىلداۋعا جاعداي جاسادى.
«حالىققا اتقارۋشىلىق ءىس جۇرگىزۋ تاراپتارىنىڭ كابينەتى ارقىلى اتقارۋشىلىق قۇجاتتاردى ونلاين رەجىمدە بەرۋ مۇمكىندىگى بەرىلدى», دەدى مارات بەكەتاەۆ. ال 2021 جىلعى مامىردان باستاپ جەرگىلىكتى مەملەكەتتىك باسقارۋ ورگاندارىنىڭ نورماتيۆتىك قۇقىقتىق اكتىلەرىن مەملەكەتتىك تىركەۋدى ادىلەت مينيسترلىگى ورتالىقتاندىرىلعان فورماتتا جۇزەگە اسىراتىن بولدى. نورماتيۆتىك قۇقىقتىق اكتىلەردى تىركەۋدىڭ ورتالىقتاندىرىلعان راسىمىنە كوشۋ بىرىڭعاي قۇقىق قولدانۋ پراكتيكاسىن جانە وڭىرلىك نورما شىعارماشىلىعى سالاسىنداعى ماسەلەلەردى ۋاقتىلى وزەكتىلەندىرۋدى قامتاماسىز ەتەدى. بۇرىن بۇل ءراسىمدى ادىلەت مينيسترلىگىنىڭ اۋماقتىق بولىمشەلەرى جۇزەگە اسىرعان.
ادىلەت مينيسترلىگىنىڭ اقپاراتى بويىنشا اۋماقتىق ادىلەت ورگاندارىنىڭ شتات سانى وڭتايلاندىرىلدى. ۇنەمدەۋ شامامەن 250 ملن تەڭگەنى قۇرايدى.
بۇعان دەيىن ادىلەت مينيسترلىگى نۇر-سۇلتان قالاسى مەن قاراعاندى وبلىسىنىڭ جەرگىلىكتى مەملەكەتتىك ورگاندارىنىڭ نورماتيۆتىك قۇقىقتىق اكتىلەرىن مەملەكەتتىك تىركەۋدى جۇزەگە اسىرۋ بويىنشا قاناتقاقتى جوبانى ءساتتى ىسكە اسىردى, بۇل وڭ ناتيجە مەن جەرگىلىكتى مەملەكەتتىك ورگانداردىڭ نورماتيۆتىك قۇقىقتىق اكتىلەرىن مەملەكەتتىك تىركەۋدىڭ ورتالىقتاندىرىلعان فورماتىن ەنگىزۋدىڭ ورىندىلىعىن كورسەتكەندىگىن ايتا كەتكەن ءجون.
