وقيعا • 07 ماۋسىم, 2021

الماتىدا ان-28 ۇشاعى اپاتىنا قاتىستى سوت اياقتالدى

212 رەت كورسەتىلدى

الماتى وبلىسى ىلە اۋدانىندا 3,5 جىل بۇرىن بەس ادام قازا تاپقان ان-28 ۇشاعى اپاتىنا قاتىستى سوت اياقتالدى. East Wing اۋەكومپانيا باسشىسى ۆاسيلي ماساليتين اقتالىپ شىقتى. الايدا ساراپشىلار ۇشاق بەلگىسىز ۇشۋ اپپاراتىمەن سوقتىعىسقانىن انىقتادى, دەپ حابارلايدى Egemen.kz ىلە اۋداندىق سوتىنا سىلتەمە جاساپ.

الماتىدا ان-28 ۇشاعى اپاتىنا قاتىستى سوت اياقتالدى

ۆيتالي ماساليتينگە «ابايسىزدا ادامداردىڭ ولىمىنە اكەپ سوققان قوزعالىس قاۋىپسىزدىگى نەمەسە اۋە كولىگىن پايدالانۋ ەرەجەلەرىن بۇزدى» جانە «باسقارۋعا قۇقىعى جوق ادامعا اۋە كەمەسىن باسقارۋعا رۇقسات بەردى» دەگەن ايىپ تاعىلعان بولاتىن. ول سوتتا كىناسىن مويىندامادى.

سوتقا دەيىنگى تەرگەۋ بارىسىندا ساراپشىلار قورىتىندىسىنداعى قاراما-قايشىلىقتارعا بايلانىستى سوت تالقىلاۋى جان-جاقتى جانە وبەكتيۆتى ءوتۋى ءۇشىن سۋديا كەشەندى ساراپتاما (مەديتسينالىق-كريميناليستيكالىق, سوت-مەديتسينالىق, كولىك-تراسولوگيالىق, زاتتار مەن بۇيىمداردىڭ جارىلىس-تەحنيكالىق ماتەريالدارى) تاعايىندادى.

«ۇشاق بەلگىسىز ۇشۋ اپپاراتىمەن سوقتىعىسقان. بۇل ۇشقىشتار كابيناسىنىڭ قىزىپ كەتۋىنە اكەلگەن جانە سوققى تولقىنىن تۋدىرعان», دەدى ىلە اۋداندىق سوتىنىڭ ءباسپاسوز قىزمەتى وكىلى.

ساراپشىلار شىعارعان قورىتىندىعا سۇيەنە وتىرىپ, سوت ءماساليتيننىڭ «كىناسى جوق» دەگەن قورىتىندىعا كەلدى. وسىعان بايلانىستى, سوت قىلمىستىق ءىس جۇرگىزۋ كودەكسىنىڭ 44-بابى 1-بولىگىنىڭ 3-تارماعىنا سايكەس انىقتالماعان ادامدارعا قاتىستى قىلمىستىق ءىستى جەكە ءىس جۇرگىزۋگە ءبولىپ, قۋدالاۋ تۋرالى ماسەلەنى شەشۋ ءۇشىن پروكۋرورعا جىبەردى. سونداي-اق سوتقا دەيىنگى تەرگەۋ بارىسىندا قىلمىستىق ءىس جۇرگىزۋ زاڭىن ورەسكەل بۇزۋعا جول بەرگەن قازاقستان باس پروكۋراتۋراسى اتىنا جەكە قاۋلى شىقتى.

ەسكە سالا كەتەيىك, 2017 جىلى 3 قازاندا East Wing اۋەكومپانياسىنىڭ ۇشاعى اەرودرومنان 28 شاقىرىم جەردە راداردان جوعالىپ كەتكەن بولاتىن. كەيىن ۇشاق جەرگە قۇلاپ, بارلىق ەكيپاج مۇشەلەرى مەن جولاۋشىلار قازا بولعان ەدى.