جاقىندا ورال قالاسىنىڭ ءۇش اۋدانىندا سپورتتىق جانە بالالارعا ارنالعان ويىن الاڭدارى پايدالانۋعا بەرىلدى. بالالاردى قورعاۋ كۇنى اياسىندا اشىلعان بۇل نىساندار قالا بالالارى ءۇشىن ۇلكەن سىي بولعانى انىق.
– قالامىزدا كوپقاباتتى ۇيلەردىڭ اۋلالارىن جاڭارتۋ, اسىرەسە بالالار مەن جاسوسپىرىمدەردىڭ ويىنى مەن جاتتىعۋلار جۇرگىزۋىنە قولايلى جاعداي جاساۋ باعىتىندا كوپ جۇمىس جاسالىپ جاتىر. جىل اياعىنا دەيىن تاعى 16 الاڭدى پايدالانۋعا بەرەمىز. بۇل الاڭداردىڭ قۇرىلىسىن قالالىق قۇرىلىس ءبولىمىنىڭ تاپسىرىسىمەن «جايىق سيتي» مەكەمەسى اتقارۋدا, – دەيدى ورال قالالىق سپورت ءبولىمىنىڭ باسشىسى ارتۋر شەرعاليەۆ.
جاستار مەن بالالاردىڭ قۋانىشىن بولىسۋگە ورال قالاسىنىڭ اكىمى ابات شىنىبەكوۆ, ءماسليحات دەپۋتاتتارى قاتىستى. ايتا كەتەيىك, جاڭادان اشىلعان الاڭداردا ەڭ كىشكەنتاي بۇلدىرشىندەرگە ارنالعان ويىن كەشەنىنەن باستاپ, جاسوسپىرىمدەر مەن ەرەسەكتەردىڭ سپورتپەن اينالىسۋىنا قاجەتتى قۇرىلعىنىڭ ءبارى بار.
قازىردىڭ وزىندە باتىس قازاقستان وبلىسىنىڭ ورتالىعىندا 60-تان استام سپورتتىق الاڭ حالىققا قىزمەت كورسەتىپ تۇر. سونىڭ 50-ءى – «ورال» سپورت كلۋبىنىڭ قاراماعىندا. سپورت الاڭدارى, قىسقى جانە جازعى ويىن قوراپتارى اۋداندار مەن اۋىلداردا دا جاپپاي اشىلىپ جاتىر. بۇل حالىقتى, اسىرەسە جاستاردى سالاماتتى ءومىر سۇرۋگە, سپورتقا باۋلۋعا اسەر ەتەدى.
باتىس قازاقستان وبلىسى
