ءىس-شارانى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى, نۇرسۇلتان نازارباەۆ قورى, قازاقستان رەسپۋبليكاسى اقپارات جانە قوعامدىق دامۋ مينيسترلىگى ۇيىمداستىردى.
300 ادامدى قامتىعان فورۋمعا ازەربايجان, بەلارۋس, قىرعىزستان, رەسەي, اقش, تۇركيا, فرانتسيا جاستار ۇيىمدارىنىڭ وكىلدەرى, قازاقستان ايماقتارىنىڭ كوشباسشى جاستارى, قازاقستان پارلامەنتى مەن وبلىستىق, قالالىق ءماسليحاتتاردىڭ جاس دەپۋتاتتارى, كاسىپكەرلەر, عالىمدار, سپورتشىلار, «بولاشاق» باعدارلاماسىنىڭ تۇلەكتەرى, «قازاقستاننىڭ 100 جاڭا ەسىمى» جوباسىنىڭ جەڭىمپازدارى, ەرىكتىلەر جانە شىعارماشىل جاستار قاتىستى.
تۇڭعىش پرەزيدەنت نۇرسۇلتان نازارباەۆ قاتىسۋشىلارعا قۇتتىقتاۋ حات جولدادى. ونى فورۋم مودەراتورى, ەلباسى كىتاپحاناسىنىڭ ديرەكتورى باقىتجان تەمىربولات وقىدى: «جاستار – قوعامنىڭ قوزعاۋشى كۇشى, ۇكىلى ءۇمىتى. ەگەمەندىك جىلدارى ەلىمىزدە ساناسى ازات, ويى سەرگەك تۇتاس ءبىر جاڭا بۋىن قالىپتاسىپ, ءوسىپ جەتىلدى.
وزدەرىڭىز بىلەتىندەي, ءار ۇلتتىڭ باسەكەگە قابىلەتتى بولۋى ەڭ اۋەلى ءبىلىم ساپاسىمەن ولشەنەدى. سىزدەر زامان تالابىنا تەز بەيىمدەلىپ, قيىندىققا قاسقايا قارسى تۇرۋعا تيىسسىزدەر. بۇگىن دە, داعدارىستان كەيىن دە ەڭ ماڭىزدى دامۋ ترەندى – ادامي كاپيتالدىڭ ساپاسى. زەردەلى دە زەرەك, ءبىلىمدى دە بىلىكتى جاستارى بار ەلدىڭ قاشاندا ەڭسەسى بيىك, ەرتەڭى نۇرلى بولماق», دەلىنگەن ەلباسىنىڭ قۇتتىقتاۋ حاتىندا.
ءوز سوزىندە باقىتجان تەمىربولات قازاقستان رەسپۋبليكاسىنىڭ مەملەكەتتىك رامىزدەر كۇنىندە ءوتىپ جاتقان فورۋمنىڭ ماڭىزدىلىعىن اتاپ ءوتتى.
جيىنعا قاتىسقان مەملەكەتتىك حاتشى قىرىمبەك كوشەرباەۆ قۇتتىقتاۋ ءسوز سويلەدى (مەملەكەتتىك حاتشىنىڭ ءسوزى بولەك بەرىلىپ وتىر).
Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك جيىندا باس قوسقان جاستارعا جاھاندىق وزگەرىستەرگە ەلىمىزدىڭ ءار ازاماتى بەيىمدەلە ءبىلۋى كەرەكتىگىن ەسكە سالدى.
«قازىرگى كەزدە قارقىن العان جاھاندىق وزگەرىستەرگە ەلىمىزدىڭ ءار ازاماتى بەيىمدەلە ءبىلۋى كەرەك. بۇل رەتتە جاستارعا ارتىلاتىن سەنىم مەن جاۋاپكەرشىلىكتىڭ جۇگى زور. ەلباسى ايتقانداي, ءبىزدىڭ باستى ءۇش قاعيداتىمىز – جاۋاپكەرشىلىك, كوماندالىق رۋح جانە ءوزىمىزدىڭ قۇندىلىقتارىمىزعا بەرىك بولۋىمىز كەرەك. پارتيا مۇشەلەرىنە ارناپ ايتىلعان بۇل سوزدەر كەز كەلگەن جاس ءۇشىن دە تەمىرقازىق بولا الادى دەپ ەسەپتەيمىن. وسى ورايدا جەتىستىككە جەتكىسى كەلەتىن ءار جاس وسىلاردى ۇستانۋى كەرەك», دەدى پارتيا توراعاسىنىڭ ءبىرىنشى ورىنباسارى.
اقپارات جانە قوعامدىق دامۋ ءمينيسترىنىڭ مىندەتىن اتقارۋشى سەرىك ەگىزباەۆ «بابالارىمىز ەرتەدەن اڭساعان تاۋەلسىزدىگىمىزگە قول جەتكىزىپ, ۇلى دالا تورىنە الەم مويىنداعان مەملەكەت قۇرعانىمىزعا بيىل 30 جىل تولىپ وتىر. بۇل ارالىقتا ەلىمىز تۇراقتى دامۋ جولىنا ءتۇسىپ, تاريحتا بۇرىن-سوڭدى بولماعان زور جەتىستىكتەرگە قول جەتكىزدى. الەمدەگى باسەكەگە قابىلەتتى 50 ەلدىڭ قاتارىنا ەندى. تۇڭعىش پرەزيدەنتىمىز – ەلباسى نۇرسۇلتان نازارباەۆ: «مەملەكەتتىك رامىزدەر – ءبىزدىڭ مەملەكەتىمىزدىڭ, ءبىزدىڭ ەگەمەندىگىمىزدىڭ بەرىك نەگىزىنىڭ ءبىرى. ولار تاۋەلسىزدىكتىڭ قاسيەتتى بىرىكتىرۋشى وبرازىن بىلدىرەدى», دەگەن بولاتىن», دەدى.
«ەجەلدەن اتا-بالالارىمىز ءوز اتامەكەنىن, وتانىن, ءتىلى مەن مادەنيەتىن, سالت-ءداستۇرى مەن مەملەكەتتىك رامىزدەرىن جۇرەكپەن سۇيە بىلگەن, قورعاعان ءارى كەلەشەك ۇرپاعىنا دا سول وتانسۇيگىشتىك تاربيەنى بەرگەن. جاستار – سىزدەر بولاشاقتىڭ ماڭگىلىك قوزعاۋشىسى, ۇلكەن كۇشسىزدەر. وعان دالەل – ەل نامىسىن بايراقتى باسەكەلەر مەن ءدۇبىرلى دودالاردا قورعاپ, كۇن استىندا قىرانى قالىقتاعان كوك تۋىمىزدى بيىكتەن جەبىرەتىپ جۇرگەن جاس جەرلەستەرىمىزدىڭ جەتىستىكتەرى. قازاقستان حالقىنىڭ ءار بەسىنشى ازاماتى 14-تەن 29 جاس ارالىعىنداعى ەل جاستارى سانالادى. مەملەكەت باسشىسى قاسىم-جومارت توقاەۆ: «قازاقستانىڭ بولاشاعى سانالى ءارى تالاپتى ۇرپاقتىڭ قولىندا» دەگەن بولاتىن. جاستارىمىزدىڭ دامۋىنا مەملەكەت تاراپىنان بارلىق مۇمكىندىك پەن جاعداي جاسالىپ جاتىر. ولاردىڭ ءال-اۋقاتىن جاقسارتۋ مەن بولاشاققا سەنىمىن ارتتىرۋ – ەل پرەزيدەنتى جۇرگىزىپ جاتقان جاستار ساياساتىنىڭ باستى باعىتى», دەدى سەرىك ەگىزباەۆ.
سونداي-اق ەلوردا اكىمى التاي كولگىنوۆ, نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى, «حالىقارالىق باعدارلامالار ورتالىعى» اق ديرەكتورى اينۇر كاربوزوۆا, حالىقارالىق جاستار ۇيىمدارىنىڭ باسشىلارى جيىنعا جينالعان جاستاردى قۇتتىقتاپ, يگى تىلەكتەرىن ءبىلدىردى.
