تاۋەلسىزدىكتىڭ 30 جىلدىعى اياسىندا جانە اقىن ءجۇرسىن ەرماننىڭ 70 جىلدىق مەرەيتويىنا ارنالعان «ASSYL DOMBYRA» رەسپۋبليكالىق ايتىسىنىڭ ىرىكتەۋ كەزەڭدەرى بۇعان دەيىن نۇر-سۇلتان جانە الماتى قالالارىندا ۇيىمداستىرىلعان بولاتىن. سوڭعى, ءۇشىنشى ىرىكتەۋ كەزەڭى ورال قالاسىنداعى قادىر مىرزا ءالي اتىنداعى وبلىستىق مادەنيەت جانە ونەر ورتالىعىندا ءوتتى. ونى باتىس قازاقستان وبلىسى اكىمدىگى مادەنيەت باسقارماسىنىڭ قولداۋىمەن اتالمىش ورتالىق پەن «ASSYLTAS» قوعامدىق قورى ۇيىمداستىردى.
ورالدا وتكەن ايتىسقا 14 اقىن قاتىستى. قازىلار القاسىنىڭ شەشىمىمەن 10 اقىن جىل سوڭىندا شىعىس قازاقستان وبلىسى, اقسۋات اۋىلىندا وتەتىن فينالدىق سايىستىڭ جولداما الدى. ولار – باۋىرجان شيرمەدين ۇلى (باتىس قازاقستان وبلىسى), ابزال ماقاش (قاراعاندى وبلىسى), نۇرزات قارۋ (قىزىلوردا وبلىسى), ەركەبۇلان قاينازاروۆ (نۇر-سۇلتان قالاسى), قانات مىرزاحان (جامبىل وبلىسى), ەرشات قايبولدين (اقتوبە وبلىسى), ايتباي جۇماعۇلوۆ (قاراعاندى وبلىسى), رينات زايتوۆ (الماتى قالاسى), سەرىك قۋانعان (شىعىس قازاقستان وبلىسى), تىلەگەن ءادىلوۆ (قاراعاندى وبلىسى).
وسى سالتانات كەزىندە اقىن ءجۇرسىن ەرمان, قازاقستان جازۋشىلار وداعى توراعاسىنىڭ ورىنباسارى مەرەكە قۇلكەنوۆ جانە ايتىس جاناشىرى, مەتسەنات دۋلات تاستەكەي «ەڭبەك داڭقى» توسبەلگىسىمەن ماراپاتتالدى. توسبەلگىنى «قازاقستاندىق سالالىق مادەنيەت, سپورت, تۋريزم جانە اقپارات قىزمەتكەرلەرىنىڭ كاسىپتىك وداعى» قب بقو فيليالىنىڭ توراعاسى ايدار باتىرحانوۆ كاسىپوداق اتىنان تابىس ەتتى.
