قازاقستاندا كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ 2021 جىلعى 28 مامىرداعى شەشىمىنە سايكەس قازاقستان مەن پولشا اراسىنداعى تۇراقتى اۋە قاتىناسى قايتا قالپىنا كەلتىرىلەدى.
«10 ماۋسىمنان باستاپ ۆارشاۆا جانە نۇر-سۇلتان قالالارى اراسىنداعى رەيستەر اپتاسىنا 1 رەت جيىلىگىمەن «LOT Polish Airlines« پولياك اۋە كومپانياسىمەن قايتا جاڭعىرتىلادى دەپ جوسپارلانىپ وتىر.
ۆارشاۆا – نۇر-سۇلتان – ۆارشاۆا العاشقى رەيسى وسى جىلدىڭ 10 ماۋسىمىندا ورىندالادى.
بۇدان ءارى ەكى مەملەكەتتىڭ استانالارى اراسىنداعى رەيستەر دۇيسەنبى سايىن B – 737 ءتيپتى اۋە كەمەسىندە ورىندالاتىن بولادى», دەلىنگەن حابارلامادا. قازاقستان مەن پولشا اراسىنداعى رەيستەردىڭ ودان ءارى ۇلعايۋى ەپيدەميولوگيالىق جاعدايعا جانە ۆەدومستۆوارالىق كوميسسيانىڭ ءتيىستى شەشىمدەرىنە بايلانىستى بولادى.
رەيستەر سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ جانە اۋەكومپانيا سايتىندا جاريالانعان كەستەگە سايكەس جاسالادى.
