سولتۇستىك قازاقستان وبلىسىنداعى بەسكول كەنتى وبلىس ورتالىعىنان ون شاقىرىم جەردە عانا ورنالاسقان ۇلكەن ەلدىمەكەن. ول قىزىلجار اۋدانىنىڭ اكىمشىلىك ورتالىعى. قىزىلجارعا جاقىن بولعاندىقتان باسقا اۋدان ورتالىقتارىمەن سالىستىرعاندا ينفراقۇرىلىمى ءبىرشاما جوعارى دامىعان. قولى ۇزىن قىزىلجارلىقتاردىڭ ءبىرازى مۇندا جەر ۇيلەر, ءبىرازى كوتتەدجدەر دە تۇرعىزىپ العان. مىنە, وسى مەكەندە جۋىردا كۇتپەگەن توتەنشە وقيعا ورىن الدى.
اۋداندىق سانيتارلىق-ەپيدەميولوگيالىق باقىلاۋ باسقارماسىنىڭ باسشىسى جانگەلدى ىبىراەۆتىڭ ايتۋىنا قاراعاندا وسىنداعى اۋداندىق اۋرۋحاناعا سوڭعى مالىمەتتەرگە قاراعاندا 105 ادام جۇرەگى اينىپ قۇسۋدان, تەمپەراتۋراسى كوتەرىلىپ, ءىشى وتۋدەن شاعىمدانعان. الدىن الا جاسالعان دياگنوز: «انىقتالماعان ەنتەروۆيرۋستىق ينفەكتسيا».
سانيتارلىق-ەپيدەميولوگيالىق قىزمەت ماماندارىنىڭ تەكسەرۋىنە قاراعاندا قاتەر ەسىل وزەنىنەن الىناتىن اۋىز سۋدىڭ ۋلانعانىنان كەلگەن دەپ بولجانىپ وتىر. اۋىرعان ادامداردىڭ ۇيىنەن الىنعان ىشەتىن سۋلار ساراپقا سالىنعاندا ولاردىڭ باكتەرولوگيالىق كورسەتكىشتەرى نورمادان جوعارى دەپ تانىلعان. دەمەك اۋرۋ ىشەتىن سۋدان كەلگەن دەگەن قورىتىندى جاسالىپ, قازىر ارنايى ەكسپەرتتىك ساراپ تاعايىندالدى.
سوڭعى كەزگە دەيىن بولعان ىستىقتا حالىق جاپپاي سۋعا ءتۇسىپ, وزەننىڭ سۋىنا ءتۇرلى ۆيرۋستار تۇسكەن بولۋى كەرەك. وسىعان قارسى ەپيدەمياعا قارسى شارالار بەلگىلەنىپ, ونى جۇزەگە اسىرۋ دا قاراستىرىلۋدا.
كەشە اۋرۋحاناعا 18 ادام تۇسكەن. ونىڭ 17 بالالار. قازىر ولاردىڭ جاعدايلارى بىرقالىپتى, ەم-دوم شارالارى قولدانىلۋدا. ەپيدەميانىڭ شەكتەن شىعىپ, ادام شىعىنىنا سوقتىرعان جاعدايى جوق. بىراق وعان قاراماي ەپيدەميولوگيالىق قىزمەت حالىقتى ساق بولۋعا شاقىرىپ وتىر. سونىڭ ىشىندە اۋىز سۋدى تەك قانا قايناتىپ ىشۋگە كەڭەس بەرىلگەن. سونىمەن بىرگە تەك تەتراپاكەت ىدىستارداعى سۋدى قولدانۋ ۇسىنىلعان.
سوڭعى ەكى كۇندەگى كۇرت تۇسكەن سالقىندىق حالىقتى سۋدىڭ جاعاسىنان ءبىر-اق كۇندە جوق قىلعان. ايتسە دە كۇن قايتا جىلت ەتسە سۋعا جۇگىرۋگە دايىن وتىرعان بالا-شاعانى دا ەسكەرتىپ, تەك رۇقسات ەتىلگەن جەرلەردە سۋعا ءتۇسۋ تالاپ ەتىلدى.
