«اننا احماتوۆا». بۇل وسىناۋ كوركەم تۋىندىنىڭ اتى. پورترەتتىڭ يەسى كەڭەستىك اۆانگارد سۋرەتشى ناتان التمان. ەشقانداي كانونداردى مويىنداماعان شەبەر. وقيعانى وقىرمانعا جەتكىزۋ ءۇشىن بارلىق قاعيداعا نەمقۇرايدى قاراپ, جانرلاردىڭ جابايى قوسپاسىن دا قولدانعان. سەنساتسيا جاساۋعا جانى قۇشتار شەبەر كەيىپكەرىنە ايانىشپەن قارامايدى. بۇل وقىرماندى ەلەڭ ەتكىزۋ ءۇشىن جاسالعان قادام.
پورترەت اقىننىڭ شىنايى بولمىسىن اشىپ تۇر. ونى ۇلى لەۆ گۋميليوۆ تە بىردەن تانىعان. اناسىنىڭ بۇدان وزگە جاقسى جازىلعان پورترەتتەرى بولسا دا, وسى شىعارما اقىننىڭ سول داۋىردەگى جاعدايىن جاقسى جەتكىزگەنىن ايتقان ەكەن. ونىڭ جۇمساق ءارى ليريكالىق رۋحاني ءبىتىمى كۋبيزمنىڭ جۇرناعى جوق تالاي كارتيناعا شابىت سىيلاعانى ەل جادىندا. دەسە دە ن.التماننىڭ وسى ءبىر تۋىندىسى اقىننىڭ تالايلى تاعدىرىن تارقاتىپ تۇرعانداي.
تۋىندىنىڭ وتكىر تۇستارى كوپ. بوياۋلار بۇزىلعان. احماتوۆا تىزەسىن العا شىعارىپ, ۇستەل ۇستىندە اياعىن ايقاستىرا وتىرادى. قويۋ كوك ءتۇستى كويلەكتىڭ ەتەگى توبىعىنا دەيىن تۇسكەن. يىعىنا جامىلعان سارى ورامال تومەن سىرعىپ كەتپەۋى ءۇشىن قولدارىن بۇكتەپ ۇستاعان. فون وتە جالپىلانعان. بىراق اياق استىنداعى اعاش ورىندىق, سۇر ەدەن, قاتقىل جيەكتەر پارادوكستى تۇردە گۇلدەردى ەسكە تۇسىرەدى. بۇكىل پوزادا, جازۋ تاسىلىنە سايكەس ىشىندە الاۋى بار, قاتال ءھام قاراپايىم ايەل پايدا بولادى.
شىعارما وتكىر بۇرىشتاردىڭ كوپتىگىمەن ەرەكشەلەنەدى. اۆتور بۇرىن-سوڭدى كۋبيزم باعىتىندا مۇنداي تۋىندىعا ءۇشبۇرىشتى كوپ قولدانباعان ەكەن. ايتسە دە ونىڭ ءمانى وسىندا. رەپرەسسياعا ۇشىراعان, جىرلارى جاريالانباعان, ەكى كۇيەۋىنەن ايىرىلعان اننا احماتوۆا كەز كەلگەن شابۋىلعا تويتارىس بەرۋگە, ءومىردىڭ ءار بۇرىشىنداعى جاۋلارىنا قارسى تۇرۋعا دايىن ەكەنىن وتكىر جۇزىمەن اڭعارتادى. جاسامپاز جىرلارىن, اياققا باسقان قوعامعا دەگەن قارسىلىعىن ونىڭ كوزقاراسىنان تانۋعا بولادى.
ەگەر ونىڭ جۇزىنەن وكىنىش پەن اياۋشىلىق بايقالسا, پورترەت ءوز بيىگىن جوعالتقان بولار ەدى. قالامگەر ءسال سولعا قارايدى, ونىڭ بەت-جۇزىندە ادامدى ويعا باتىراتىن مىسقىل بار. ديدارى جالىن اتىپ تۇر. سۋرەتشى سول جالىندى قاعازعا تۇسىرگەن. بۇلت اراسىن جارىپ شىققان جارىق كۇندەي جۇرەككە ىستىق. كوڭىلدى سەلت ەتكىزەدى. قۇددى تاعدىرىنا تەرىس قاراپ, كۇلىپ تۇرعانداي.
