يندۋسترياداعى يگىلىك
ءمينيستردىڭ ايتۋىنشا, ءتۇستى مەتاللۋرگياداعى ءوسىم 3 پايىزدى قۇرادى. بۇل 1,5 ترلن تەڭگەگە تەڭ. قارا مەتاللۋرگياداعى ءوندىرىس كولەمى 2,7 پايىزعا (789,2 ملرد تەڭگە) ۇلعايعان. ماشينا جاساۋ سالاسىنداعى ءوسىم 20 پايىزدى قۇرادى. سونداي-اق تەمىر جول تەحنيكاسى ءوندىرىسىنىڭ 49 پايىزعا وسكەنى بايقالىپ وتىر.
– ديزەنفەكتسيالىق قۇرالدار مەن مينەرالدى تىڭايتقىشتارعا دەگەن سۇرانىستىڭ ارتۋى حيميا ونەركاسىبى ءوندىرىسىنىڭ كولەمىن ۇلعايتتى. ءوسىم 11 پايىزدى نەمەسە 163,4 ملرد تەڭگەنى قۇرادى. قاڭتار-ءساۋىر ارالىعىندا فارماتسەۆتيكالىق ونەركاسىپتىڭ ءوندىرىس كولەمى 26 پايىزعا ءوستى. بۇگىندە كوروناۆيرۋستى ەمدەۋگە ارنالعان 44 دارىلىك زاتتىڭ 22-ءسى بويىنشا ىشكى نارىقتى ءوزىمىز قامتاماسىز ەتىپ وتىرمىز, – دەدى ب.اتامقۇلوۆ.
مينيسترلىك جەڭىل ونەركاسىپتىڭ دامۋىنا ەرەكشە كوڭىل ءبولىپ وتىر. بۇگىندە بۇل سالادا 27 مىڭعا جۋىق ادام جۇمىس ىستەيدى. ولاردىڭ 60 پايىزى – ايەلدەر. سالاداعى ءوسىم 5 پايىزعا تەڭ.
ۆەدومستۆو باسشىسى وڭىرلەردەگى ارنايى ەكونوميكالىق ايماقتاردىڭ جاي-كۇيىنە دە توقتالدى. بۇگىندە رەسپۋبليكا بويىنشا 13 ارنايى ەكونوميكالىق ايماق بار. 2021 جىلدىڭ ءتورت ايىندا ارنايى ايماقتاردا 285 ملرد تەڭگەگە 9 جوبا جۇزەگە اسىرىلعان. 1,5 مىڭ جۇمىس ورنى قۇرىلدى. وسىلايشا, توقىما, مەديتسينالىق بۇيىمدار مەن ءىت ونىمدەر ءوندىرىسى جولعا قويىلدى.
تەمىر جولداعى تۇرەن
ءمينيستردىڭ بايانداۋىنشا, كولىكتىڭ بارلىق تۇرىمەن جۇك تاسىمالداۋ كولەمى 1,07 ملرد توننانى قۇراعان.
– پاندەمياعا قاراماستان, ترانزيتتىك جۇكتەردى تاسىمالداۋدىڭ تۇراقتىلىعى مەن تيىمدىلىگىن كورسەتە الدىق. ماسەلەن, 2021 جىلدىڭ العاشقى ءتورت ايىندا ءترانزيتتىڭ جالپى كولەمى 7,3 ملن تونناعا تەڭ بولدى. بۇل وتكەن جىلدىڭ كورسەتكىشىنەن 4,1 پايىزعا ارتىق. ونىڭ ىشىندە تەمىر جول كولىگىمەن 6,6 ملن توننا, اۆتوموبيل كولىگىمەن 0,7 ملن توننا تاسىمالداندى. بيىل 25,3 ملن توننا كولەمىندە ترانزيتتىك جۇكتەردى تاسىمالداۋ جوسپارلانۋدا, – دەدى مينيستر.
بۇگىندە تەمىر جول سالاسىندا 135 مىڭ ادام جۇمىس ىستەيدى. ونىڭ 125 مىڭى – «قازاقستان تەمىر جولى» ۇلتتىق كومپانياسىنىڭ قىزمەتكەرلەرى. قالعانى جەكە كومپانيالارعا تيەسىلى. 2021 جىلدىڭ ءتورت ايىندا تەمىر جول ارقىلى 4,4 ملن جولاۋشى تاسىمالدانعان. قازىر پاندەمياعا بايلانىستى 41 پويىز, ونىڭ ىشىندە 21 حالىقارالىق بايلانىس توقتاتىلدى. جولاۋشىلار تاسىمالىن سۋبسيديالاۋعا 57 الەۋمەتتىك ماڭىزى بار مارشرۋتتارعا 44 ملرد تەڭگەدەن استام قاراجات ءبولۋ جوسپارلانۋدا. ونىڭ 15,5 ملرد تەڭگەسى ءبولىندى.
– شامامەن 2,6 مىڭ جولاۋشىلار ۆاگونى بار. ولاردىڭ ورتاشا توزۋ كورسەتكىشى 46 پايىز. حالىق تاراپىنان ۆاگونداردىڭ جاي-كۇيىنە قاتىستى شاعىمدار تۇسۋدە. ءبىز مۇنى ءادىل دەپ سانايمىز. شىنىندا دا, پاركتىڭ جارتىسىن اۋىستىرۋ قاجەت. بىلتىر مەملەكەتتىك قولداۋ شەڭبەرىندە ۇلتتىق تاسىمالداۋشى 40 ملرد تەڭگەگە «تۇلپار» زاۋىتىنىڭ 100 ۆاگونىن ساتىپ الدى. بيىل 14,7 ملرد تەڭگەگە 31 جولاۋشىلار ۆاگونىن ساتىپ الۋ جوسپارلانىپ وتىر. اتالعان ۆاگوندار الماتى – ماڭعىستاۋ جانە الماتى – اتىراۋ باعىتتارىنا جەتكىزىلەدى. جالپى, 2025 جىلعا دەيىن بيۋدجەتتىك نەسيەلەندىرۋ اياسىندا 295 ۆاگوندى جاڭارتۋ جوسپارلانۋدا, – دەدى ب.اتامقۇلوۆ.
سونداي-اق تەمىر جول ينفراقۇرىلىمىن دامىتۋعا ەرەكشە نازار اۋدارىلۋدا. بۇل رەتتە تۇركىستان – شىمكەنت – تاشكەنت ۋچاسكەسىندە جوعارى جىلدامدىقتى تەمىر جول جەلىلەرىن سالۋ جانە دوستىق – مويىنتى ترانزيتتىك ۋچاسكەسىن جاڭعىرتۋ جوسپارلانۋدا. بۇدان بولەك الداعى ۋاقىتتا الماتى اينالما ستانساسىنىڭ قۇرىلىسى جانە داربازا – ماقتاارال تەمىر جول جەلىسى جوبالارى ىسكە اسىرىلماق.
قۇرىلىستاعى قارقىن
ۆەدومستۆو باسشىسى 5 جىلدا ازاماتتارعا جەكە تۇرعىن ءۇي سالۋعا بەرىلەتىن 235 مىڭ جەر ۋچاسكەسى قاجەتتى ينفراقۇرىلىممەن قامتاماسىز ەتىلەتىنىن جەتكىزدى. ونىڭ 125 مىڭى – وبلىس ورتالىقتارىندا, شاعىن قالالاردا, ال 110 مىڭى اۋىلدىق جەرلەردە بولماق. ونىڭ ىشىندە بيىل 17 ملن شارشى مەتر جاڭا تۇرعىن ءۇي نەمەسە 163,1 مىڭ تۇرعىن ءۇي سالۋ مىندەتى تۇر.
– رەسپۋبليكالىق بيۋدجەت ەسەبىنەن «نۇرلى جەر» باعدارلاماسى شەڭبەرىندە 24,8 مىڭ وتباسى الەۋمەتتىك تۇرعىن ۇيمەن قامتاماسىز ەتىلەتىن بولادى. سونداي-اق بانكتەر «باقىتتى وتباسى», «شاڭىراق» جانە «7-20-25» باعدارلامالارى بويىنشا 23 مىڭ جەڭىلدەتىلگەن قارىز بەرمەك. نەگىزىنەن قولداۋ شارالارىمەن كەزەكتە تۇرعاندار, ونىڭ ىشىندە جەتىم بالالار, مۇگەدەكتەر, از قامتىلعان كوپبالالى وتباسىلار, مۇگەدەك بالالاردى تاربيەلەپ وتىرعان وتباسىلار جانە مەگاپوليستەردىڭ جۇمىسشى جاستارى قامتىلادى. 4 ايدىڭ قورىتىندىسى بويىنشا 3,5 ملن شارشى مەتر نەمەسە 28,9 مىڭ تۇرعىن ءۇي پايدالانۋعا بەرىلدى. بۇل – جىلدىق جوسپاردىڭ 21 پايىزى, – دەدى ب.اتامقۇلوۆ.
بۇگىندە اكىمدىكتەردە 562 مىڭ ادام كەزەكتە تۇر. بۇل رەتتە وتباسى مۇشەلەرىنە شاققاندا تابىسى ەڭ تومەنگى كۇنكورىس دەڭگەيىنەن تومەن 185 مىڭ ادام ءۇشىن جالداۋ اقىسىن سۋبسيديالاۋ تەتىگى ەنگىزىلمەك. نەگىزىنەن بۇعان كوپبالالى وتباسىلار, جەتىم بالالار, مۇگەدەك بالالارى بار وتباسىلار جانە حالىقتىڭ باسقا دا الەۋمەتتىك وسال توپتارى جاتادى. نۇر-سۇلتان جانە الماتى قالالارى بويىنشا جالداۋ اقىسىنىڭ 31 ايلىق ەسەپتىك كورسەتكىشى (90 427 تەڭگە), وزگە وڭىرلەر بويىنشا 21 ايلىق ەسەپتىك كورسەتكىشى (61 257 تەڭگە) جانە اۋىلدىق جەرلەر ءۇشىن 15 ايلىق ەسەپتىك كورسەتكىشى (43 755 تەڭگە) مەملەكەت ەسەبىنەن سۋبسيديالانباق.
ەڭ تومەنگى كۇنكورىس دەڭگەيىنەن جوعارى تابىسى بار قالعان 377 مىڭ ادام «وتباسى بانكى» ارقىلى كرەديتتىك تۇرعىن ۇيمەن جانە جەڭىلدەتىلگەن قارىزبەن قامتاماسىز ەتىلەدى. بۇل توپقا مەملەكەتتىك قىزمەتشىلەر, بيۋدجەت قىزمەتكەرلەرى, تولىق ەمەس وتباسىلار جانە كەزەكتە تۇرعان باسقا دا ساناتتار جاتادى.
