1986 جىلى «قازاقفيلم» كينوستۋدياسىنىڭ تاپسىرىسىمەن, بەلگىلى رەجيسسەر ءدامىر ماناباەۆ اتالعان پوۆەستىڭ جەلىسىمەن كينو ءتۇسىردى. فيلمگە تۇسكەن اكتەرلەر دە تالعاممەن ىرىكتەلگەن. اسىرەسە باس كەيىپكەر – اسپاننىڭ زايىبى قامقانى سومداعان اكتريسانىڭ تۇنىق جانارى مەن ويلى كوزى, سابىرلى قيمىلى, قازاق ايەلىنە ءتان توزىمدىلىگى كورگەن ادامدى بىردەن باۋراپ الدى. وسى كەيىپكەردى ەلورداداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ تالانتتى اكتريساسى زيباگۇل قارينا سومدادى.
زيباگۇل جاقسىلىققىزى – ول كەزدە مولدىرەپ تۇرعان جاس, تورعاي وبلىستىق دراما تەاترىنىڭ تاماشا رولدەرىمەن جۇرتشىلىققا تانىلىپ قالعان دارىندى اكتريساسى. بىردە وعان الماتىداعى «قازاقفيلم» كينوستۋدياسىنان ناتاليا الەكساندروۆنا دەگەن كىسى قوڭىراۋ شالىپ: «جازۋشى ورالحان بوكەيدىڭ شىعارماسى بويىنشا كينو تۇسىرمەكپىز. بىزگە قاراپايىم قازاق ايەلىنىڭ وبرازى كەرەك. ءسىزدىڭ فوتوڭىز كينوستۋديادا بار ەكەن. الماتىعا جەدەل تۇردە ءبىر-ەكى كۇنگە كەلىپ, بايقاۋعا قاتىسىپ كەتسەڭىز, جول شىعىنىڭىزدى تولەيمىز» دەگەن ءوتىنىشىن ايتادى.
– سودان الماتىعا ۇشىپ كەلدىم. «قازاقفيلمنىڭ» دۇركىرەپ تۇرعان شاعى. ءبىزدى سونداعى ۇلكەن الاڭدا سىناقتان وتكىزدى. الدىمەن ستسەناريمەن تانىستىم, ونى بولات مانسۇروۆ جازىپتى. ءفيلمنىڭ قويۋشى رەجيسسەرى – ءدامىر ماناباەۆ. سول كىسى بىزگە كينونىڭ مازمۇنىن قىسقاشا ءتۇسىندىرىپ, ەكەۋارا ايتاتىن ديالوگتاردى بەردى. كينوداعى باس كەيىپكەر اسپاننىڭ جىگىت كەزىندەگى ءرولىن نۇرلان ەسىمعاليەۆ سومدادى. مەن ونى تانىمايمىن. العاش كورىپ تۇرمىن. وعان قالاي جاقىندارىمدى بىلمەيمىن. اكتريسا بولعاننان كەيىن قيالىڭىزدى دامىتۋ كەرەك. اۋىلدا سوعىستان اياعى نەمەسە قولىنان ايىرىلىپ كەلگەن اكەلەرىمدى بىلەمىن. سولاردى كوز الدىما ەلەستەتىپ ءوز وبرازىما ەندىم, سول كوميسسيانىڭ دا كوڭىلىنەن شىققان سەكىلدى. «سىزبەن ءتۇسىرۋ الاڭىندا كەزدەسۋگە ۇمىتتەنەمىز» دەپ شىعارىپ سالدى, – دەيدى زيباگۇل اپاي.
ەندى ول كىسى الماتىدان جاقسى جاڭالىق كۇتىپ, كوڭىلى الاڭداپ جۇرگەندە, ءبىر كۇنى: «سىزگە كوميسسيا بىردەن ەكى ءرولدى بەكىتتى. قامقا مەن ونىڭ قىزى ماليكانى وينايسىز. ءسىزدىڭ جاسىڭىز ماليكاعا ءدال كەلەدى» دەگەن قۋانىشتى حابار جەتەدى.
بۇل فيلم ورالحان اعامىزدىڭ تۋعان جەرى كاتونقاراعايدا ءتۇسىرىلدى. سودان بولار كينودا التايدىڭ اسقاق سۇلۋلىعى مەن سۇستى بەينەسى بارىنشا اشىلعان. ادام مەن تابيعات اراسىنداعى تىلسىم سىردى رەجيسسەر تاپ باسا بىلگەن. اۋەلدە اسپان شالدىڭ ءرولىن ويناۋعا ىدىرىس نوعايباەۆ ەمەس, كەنەنباي قوجابەكوۆ بەكىتىلىپتى. الايدا كەنەنباي اعا سول كەزدە سىرقاتتانىپ قالىپ, ونى اياق استىنان ىدىرىس اعا سومداۋعا تۋرا كەلگەن. الايدا قازاق ونەرىندە ءوز ورىندارى ايتۋلى ەكى تۇلعانىڭ قاي-قايسىسى دا باس كەيىپكەردى كەلىستىرىپ وينايتىنى انىق.
زيباگۇل اپاي ءبىر سوزىندە, قالامگەر ورالحان بوكەي تۋعان جەرىندە ءتۇسىرىلىم توبىمەن باستان-اياق بىرگە جۇرگەندىگىن ايتادى. ءتىپتى ءتۇسىرىلىم توبىن اۋىلداعى اكە-شەشەسىنىڭ ۇيىنە قوناققا شاقىرىپ, ءدام تاتتىرىپتى.
– جازۋشى كەيىپكەرىنىڭ ءپروتوتيپى ومىردە بار ادام. سول كاتونقاراعايدا تۇرادى. سوندىقتان مەن ونى كوزىممەن كورىپ, جاقىنىراق تانىسقىم كەلدى. ايتپاقشى, كينوداعى ءبىر ەپيزودتا سول كىسىنىڭ ءوزى تۇسكەنى بار. بىراق وندا ونىڭ ءجۇزىن كورە المايسىز, تەك كەرەۋەتتەن ءتۇسىپ, ارقاسىمەن كەتىپ بارا جاتادى. سودان ءتۇسىرىلىم توبىنىڭ مۇشەلەرى سول كىسىنىڭ ۇيىنە باردىق. ءبىزدى جانى قالماي كۇتىپ, قارسى الدى. ەكى اياعىنان ايىرىلعان اعانىڭ ايەلى – وتە قاراپايىم جان. بىزگە ەسىكتەن سىعالاپ قارايدى, تۋرا قارامايدى. اپاي كۇيەۋىنىڭ تىزەسىنە ەسكى كۇپايكەنى قاباتتاپ تىگىپ بەرىپتى. ەسىكتىڭ الدىندا ۇلكەن ساكى بار. ول كىسى سول بيىك ساكىدەن سەكىرىپ اتقا مىنەدى. اڭگىمەلەسىپ وتىرعاندا ءۇي يەسى: «قازىر پروتەز اياق شىعىپتى دەپ ەستيمىن. شىركىن, سونى كيىپ, ءوز اياعىمەن ءجۇرىپ كەتسەم عوي», دەپ ءبىر ارمانىن ايتتى. ەندى ول كىسىنىڭ ومىرگە دەگەن قۇشتارلىعى كەرەمەت, وتە ەڭبەكقور ەكەندىگىن تانىدىم, – دەيدى ول.
كوركەم فيلم جارىققا شىققاننان كەيىن ونى كورەرمەندەر جىلى قابىلدادى. ءبىز ءسوز ەتىپ وتىرعان تالانتتى اكتريسا «سايتان كوپىردەن» كەيىن كورنەكتى اقىن ولجاس سۇلەيمەنوۆتىڭ پوەماسىنىڭ جەلىسىمەن جازىلعان «بالكون» فيلمىندە – جاننا مەن جازۋشى سماعۇل ەلۋبايدىڭ «اق بوز ءۇي» رومانى بويىنشا تۇسىرىلگەن «سۇراپىل سۇرجەكەيدەگى» اۋىلنايدىڭ ايەلىن ايشىقتى سومداپ, كينو ونەرىندەگى قولتاڭباسىن دارالادى. ودان كەيىن دە بىرقاتار فيلم مەن تەلەحيكاياعا ءتۇسىپ, جۇرتشىلىقتىڭ قوشەمەتىنە بولەندى.
الايدا تەاترسۇيەر قاۋىم زيباگۇل قارينانى دارىندى دراما اكتريساسى رەتىندە جاقسى كورەدى. وتكەن عاسىردىڭ سەكسەنىنشى جىلدارىنىڭ باسىندا الماتىداعى تەاتر جانە كوركەمسۋرەت ينستيتۋىن تامامداعاننان كەيىن ول العاشقى ەڭبەك جولىن تورعاي وبلىستىق دراما تەاترىندا, ودان سوڭ جەزقازعان قالاسىنداعى قازاق مۋزىكا دراما تەاترىندا, 1995 جىلدان بەرى باس قالاداعى قاللەكي تەاترىندا جەمىستى ەڭبەك ەتىپ, كيەلى ساحنادا شىڭعىس ايتماتوۆتىڭ «انا-جەر-اناسىندا» – ايشانى, عابيت مۇسىرەپوۆتىڭ «قوزى كورپەش – بايان سۇلۋىندا» – باياندى, مۇحتار اۋەزوۆتىڭ «قاراقىپشاق قوبىلاندىسىندا» – كۇنەكەيدى, ءابدىجامىل نۇرپەيىسوۆتىڭ «قان مەن تەرىندە» – بايبىشەنى, اكىم ءتارازيدىڭ «ۇكىلى جۇلدىزىندا» – ءبيدى جانە تاعى باسقا بىرنەشە عاجايىپ كەيىپكەرلەر گالەرەياسىن جاساپ, ونەر ورىندە ءوز ورنەگىن ايشىقتى قاشادى.
