«قازاقستان رەسپۋبليكاسىنىڭ ىشكى نارىعىندا تاۋارلىق گازدى كوتەرمە ساۋدادا وتكىزۋدىڭ 2021 جىلعى 1 شىلدەدەن باستاپ 2022 جىلعى 30 ماۋسىمدى قوسا العان كەزەڭگە ارنالعان شەكتى باعالارى بەكىتىلدى. وسى بۇيرىققا سايكەس تاۋارلىق گازدى كوتەرمە ساۋدادا وتكىزۋدىڭ شەكتى باعالارى وڭىرگە بايلانىستى ورتا ەسەپپەن 11 پايىزعا كوتەرىلدى», دەلىنگەن قر ەم ءباسپاسوز قىزمەتى حابارلاماسىندا.
ۆەدومستۆو مالىمەتى بويىنشا, رەسپۋبليكاداعى ىشكى گازبەن جابدىقتاۋ جۇزەگە اسىرىلاتىن نەگىزگى ماگيسترالدار بەلگىلەنگەن رەسۋرستارىن وتەدى جانە دياگنوستيكالىق تەكسەرىستەردىڭ ناتيجەسى بويىنشا ولاردىڭ توزۋ دەڭگەيى جوعارى. ەنەرگەتيكالىق قاۋىپسىزدىكتى قامتاماسىز ەتۋدە تەك وڭىرلەر بولىنىسىندە عانا ەمەس, ەل اۋقىمىندا دا ستراتەگيالىق ماڭىزدى گاز ينفراقۇرىلىمىنىڭ 70 پايىزىن پايدالانۋ مەرزىمى 40 جىلدان اسادى.
قازىرگى ۋاقىتتا ىشكى نارىقتا بەكىتىلگەن تاۋارلىق گازدىڭ شەكتى كوتەرمە ساۋدا باعالارى جەتكىزىلەتىن گازدىڭ وزىندىك قۇنىنان تومەن. ءارتۇرلى وڭىردە بەكىتىلگەن كوتەرمە ساۋدا باعالارى وزىندىك قۇنىنان 1,5-نان 2,5 ەسەگە دەيىن تومەن.
«وسىعان بايلانىستى, تاۋارلىق گازدى كوتەرمە ساۋدادا وتكىزۋدىڭ شەكتى باعالارىن قازىرگى دەڭگەيدە بەكىتكەن جاعدايدا ۇلتتىق وپەراتوردىڭ شىعىندارى ۇلعايار ەدى, ال ينۆەستيتسيالىق باعدارلامالاردىڭ ورىندالماۋى اقىر سوڭىندا گاز قۇبىرلارىنىڭ شەكتىك اقاۋلار سانىنىڭ ارتۋىنا اكەپ سوعادى, بۇل ەلىمىزگە ورنى تولماس نۇقسان كەلتىرەرى ءسوزسىز», دەدى ەنەرگەتيكا مينيسترلىگى ءباسپاسوز قىزمەتى وكىلى.
