1 ماۋسىم كۇنى مادەنيەت جانە سپورت مينيسترلىگىنە قاراستى 92 كىتاپحانادا 160-تان اسا ءىس-شارا ۇيىمداستىرىلدى. سونداي-اق فەستيۆال اياسىندا الەۋمەتتىك جەلىلەردە بەلگىلى قوعام قايراتكەرلەرى, ارتىستەر مەن وقىرمانداردىڭ قاتىسۋىمەن «كىتاپ وقىپ, رۋحاني باي بول!» رەسپۋبليكالىق ونلاين-چەللەندجى وتكىزىلگەن.
بالالار ادەبيەتىنىڭ كىتاپتار كورمە-جارمەڭكەسى, «التىن ساپا» سىيلىعىنىڭ لاۋرەاتى, بەلگىلى ەتنوديزاينەر ىرزا تۇرسىنزادانىڭ تالىمگەرلەرىنىڭ قاتىسۋىمەن «كورپە fest – 2021» اياسىندا «اتا كاسىبى – بالا ءناسىبى» مەگا كورمە-جارمەڭكەسى دە كەلۋشىلەر نازارىنا ۇسىنىلدى. سونىمەن قاتار بەلگىلى سۋرەتشى-يلليۋستراتور قايرات جايىربەك پەن تانىمال ديزاينەر راحيما مۇكىشەۆانىڭ جەكە كورمەلەرى تانىستىرىلدى.
فەستيۆالدىڭ باستى ءىس-شاراسى كىتاپحانا جانىنان «بالا TIME» بالالار تەلەارناسىنىڭ سالتاناتتى اشىلۋى بولىپ وتىر. سونداي-اق ءىس-شارا بارىسىندا بىرقاتار بەلگىلى اۆتور مەن جاس دارىننىڭ جاڭا كىتاپتارىنىڭ تۇساۋكەسەرى ءوتتى.
جيىنعا مادەنيەت جانە سپورت ۆيتسە-ءمينيسترى نۇرعيسا داۋەشوۆ, پارلامەنت ءماجىلىسىنىڭ دەپۋتاتى بەرىك ابدىعالي ۇلى, جازۋشى بايانعالي ءالىمجان, بالالار جازۋشىلارى مەن ادەبيەتتانۋشىلار قاتىستى.
